Adlezenn 15 - Bibl Koad 21: Ar Bibl e Brezhoneg evit ar Vretoned

Pennad 15 Ar bloavezh-ehan. Dieubiñ ar sklaved. Re gentañ-ganet al loened

¹ Da zibenn pep seizh vloaz e ri un ehan.

² Setu penaos e vo graet an ehan: M'en devo prestet d'e nesañ ur c'hredour, en em zistardo eus e wirioù, ne hasto ket e nesañ pe e vreur pa vo bet embannet ehan an AOTROU.

³ Bez' e c'helli hastañ an diavaeziad, met diwar-benn ar pezh a zo dit gant da vreur, en em zistardi eus da wirioù.

⁴ Evel-se ne vo ket a beorien ganeoc'h, rak an AOTROU a vennigo ac'hanout a-dra-sur er vro a ro dit an AOTROU da Zoue da berc'hennañ evel hêrezh,

⁵ gant ma senti ouzh mouezh an AOTROU da Zoue, o virout an holl c'hourc'hemennoù a gemennan dit hiziv hag oc'h ober diouto.

⁶ An AOTROU da Zoue a vennigo ac'hanout evel m'en deus lavaret, hag e presti da galz a bobloù, n'ampresti ket, te a vestronio kalz a bobloù, ne vestrognint ket ac'hanout.

⁷ Pa vo unan eus da vreudeur paour ez kreiz, e-barzh da zorojoù, er vro a ro dit an AOTROU da Zoue, ne galetai ket da galon ha ne serri ket da zorn e-keñver da vreur paour,

⁸ met e tigeri frank da zorn dezhañ, hag e presti dezhañ ar pezh en devo ezhomm, ar pezh a vanko dezhañ.

⁹ Diwall da vezañ ur soñj ez kalon drouk ha ma lavarfe: Emañ ar seizhvet bloaz o tostaat, ar bloavezh-ehan! Diwall da vezañ ul lagad didruez e-keñver da vreur paour evit tremen hep reiñ netra dezhañ. Krial a rafe etrezek an AOTROU a-enep dit, hag e vefe ur pec'hed evidout.

¹⁰ A-dra-sur e roi dezhañ, ha da galon ne vo ket dilaouen, rak abalamour da-se an AOTROU da Zoue a vennigo ac'hanout ez holl labourioù, e kement a ri gant da zaouarn.

¹¹ Peorien e vo dalc'hmat er vro, setu perak e roan dit ar gourc'hemenn-mañ hag e lavaran dit: digeriñ a ri da zorn da'z preur, d'ar paour ha d'an ezhommeg a vo ez pro.

¹² Ma en em werzh dit da vreur, a-douez an Hebreed, den pe gwreg, e servijo ac'hanout c'hwec'h vloaz, d'ar seizhvet bloaz e kasi anezhañ frank eus da di.

¹³ Pa gasi anezhañ frank eus da di, n'en kasi ket kuit er c'houllo,

¹⁴ te a roio dezhañ eus da dropell, eus da leur hag eus da waskell, eus ar madoù en devo an AOTROU da venniget drezo.

¹⁵ Dalc'h soñj ez out bet sklav e bro Ejipt, hag en deus dasprenet ac'hanout an AOTROU da Zoue, setu perak e roan dit ar gourc'hemenn-mañ hiziv.

¹⁶ Mar lavar dit: Ned in ket eus da di, rak karout a ra ac'hanout ha da diegezh hag en em gav mat ganit,

¹⁷ e kemeri ur minaoued hag e toulli e skouarn dezhañ ouzh an nor, hag e servijo ac'hanout da viken. Evel-se e ri ivez da'z matezh.

¹⁸ Ne vo ket diaes dit kas anezhañ frank eus da di, rak servijet en devo ac'hanout e-pad c'hwec'h vloaz hag en devo talvezet div wech ur mevel gopret. Hag an AOTROU da Zoue a vennigo ac'hanout e kement a ri.

¹⁹ Kement par kentañ-ganet a vo ganet eus da loened bras pe bihan a vo santelaet d'an AOTROU da Zoue. Ne labouri ket gant ar c'hentañ-ganet eus da vuoc'h ha ne douzi ket ar c'hentañ-ganet eus da zeñved.

²⁰ Debriñ a ri anezhañ dirak an AOTROU da Zoue, el lec'h dibabet gantañ, te ha da diegezh, bep bloaz.

²¹ M'en deus ur si bennak, mard eo kamm pe dall, mar en deus ur si fall all, n'aberzhi ket anezhañ d'an AOTROU da Zoue.

²² Debriñ a ri anezhañ e-barzh da zorojoù. An hini dic'hlan hag an hini glan a zebro, evel ma vez debret ar c'hazelenn pe ar c'harv.

²³ Nemet ne zebri ket ar gwad, en skuilhi war an douar evel dour.