Mateus 6 - Kaxinawá Bíblia (BR)

Haskai pepatikiri Jesusũ hatu yusĩnikiaki, na hãtxarã

¹ ana hatu yuikĩ: —Yura betsabu mã merabewai hau matu uĩ bestikĩ kẽwãnũbũ haskayamakubaĩshãkãwẽ. Hakia yurabũ berubi besti mã hatu merabewakĩ duawamiskenã, Epa Deus nai anuatũ hawa ana betsawẽ matu manakuama ishanikiki, kẽwãmarã.

² Haskakẽ nuitapaibu mã merabewairã, tsua hatu banabimakĩ shabakabi hatu uĩmakĩ pawayamakubaĩshãkãwẽ. Hakia habu beparamemisbũ nuitapaibu hatu merabewakĩ hau yurabũ ea kẽwãnũbũ, iwanã, itxati hiwe anushũ inũ bai namakishũ hawara hatu inãkĩ shabakabi wamisburã, yurabũ manakuti ma hayabuki. Haskawẽ taeshũ ikũ kẽmisbu Deusũ ana hatu kẽwãma ishãkanikiki.

³ Nuitapaibu merabewakĩ tsua yuiyamakubaĩshãkãwẽ, mĩ haibuhaira yuikĩ unãmamarã.

⁴ Hune pepa aki pepakubaĩshãkãwẽ. Hawara hune mã hatu ashũmis matũ Epa Deusũ unãkĩ ana manakuti pepa betsa tibi matu inãshanikiki— iwanã.

Deus dayuikĩ yukatikiri Jesusũ hatu yusĩnikiaki, ha hãtxarã

⁵ ana hatu yuikĩ: —Ha inũ, betsarã, ha hatũmebi kẽmisbũ itxati hiwe anu kasmai hemaĩtĩ anu nishũ hau ea nĩkakĩ kẽwãnũbũ ika hui kuxipawẽ Deus kẽwãmisbuki. Haska waibu Deusũ abuama yurabũ besti hatu abumisbuwẽ taea maturã, haskayamakubaĩshãkãwẽ.

⁶ Hakia matunã, Deus dayuikatsis iki hanu tsua niama anu ka hune habe hãtxakubaĩshãkãwẽ. Mã haskai Epa Deusũ dasibi hune unaĩwẽ taeshũ nĩkatã pepawẽ matu manakushanikiki.

⁷ Ha inũ, matu Deusbe hãtxairã, hau Deusũ ea nĩkanũ, ika habias hãtxa hawẽtxaĩs yuiyamakubaĩshãkãwẽ, haska Deus ikũwãbumã amisbu keska wamarã, hamẽ hãtxawaĩnã.

⁸ Hawa mã hayama mã yukakatsis ikai mã yukariama matũ Epa Deusũ unaĩwẽ taeshũ has xinãkĩ hawẽtxaĩs yukayamashãkãwẽ.

⁹ Eska watiki, dayuikinã: —Nukũ Epa nai anuatuũ, mĩ kena meribirã, mia duawakĩ hau mia kẽwãkubainũbũwẽ.

¹⁰ Nai anushũ mĩ yunua haska txibãmisbu keska wakĩ nenushũri dasibibũri hau mĩ xinã besti txibãkubainũbũwẽ.

¹¹ Ha inũ, nuku mekekĩ na habiatiã nũ piyunũ haska mĩ xinaĩwẽ piti nuku inãwẽ.

¹² Ha inũ, nuku txakabuwaibu hatu hakimawakĩ hatũ txakabu nũ ana haska xinãmawẽ taeshũ nũ mia txakabuwai buashũtã ana haskakiri nuku xinãmayamawe.

¹³ Nuku mekekĩ hawẽ txakabuti tibi nuku kaĩmashũyamawe. Ha inũ, hawara txakabu tibi nuku nemashũriakubaĩwẽ, atiki— atã

¹⁴ ana hatu yusĩkĩ: —Yura betsã matu txakabuwaxina haki sinatabiatã hawaira habe daekubaĩkãwẽ, ana has xinãmarã. Mã haskaibu matũ txakaburi Deusũ matu buashũtã ana xinãma iriashanikiki.

¹⁵ Hamẽ yura betsabũ matu itxakawabu ha xinãkĩ mã pewamakẽ matũ Epa Deusũ matũ txakaburi buama ishanikiki.

Haskai samaketikiri Jesusũ hatu yusĩnikiaki, na hãtxarã

¹⁶ —Matu samakeirã, besu atimapatã iyamakubaĩkãwẽ, habu beparamei kẽmisbu samakei amua mapumisbu keskamarã. Habu beparamei kẽmisbu hatũ besu atimapa uĩkĩ ma samakeaibu hau ea unãnũbũ ika haska mapumisbuki. Txanima yurabũ uĩkĩ hatu kẽwaĩbu hawẽ besti hatũ manakuti bimisbuki.

^17-18 Hakia Deus xinaĩ mã samakeai hau tsuã matu unãyamanũ betxukitã bueshekei pekubaĩshãkãwẽ. Samakei mã haskai matũ Epa Deusũ dasibi hune unaĩtũ mã ikai uĩkubaĩkĩ kẽwãkĩ matu manakushanikiki— iwanã,

Deus hiweshuni pepatikiri Jesusũ hatu yusĩnikiaki, na hãtxarã

¹⁹ ana hatu yuikĩ: —Na mai anushũ huni itxapabu hiweshũ mabuwẽ kemukĩ itxawamisbuki. Hakia matunã, mabuwẽ kemukĩ itxawayamashãkãwẽ. Hawara bikĩ mã itxawa hawẽ masãnẽ pesa pesa akĩ inũ nakashã piriatiruki, matu benũkinã. Ha inũ, huni yumetsubũ matũ hiwe anu hikitã matũ mabu dasibi mã aru pewabiakẽ matu biãbaĩtirubuki.

²⁰ Haskakẽ yura betsabu ikaibu keskakĩ kemukĩ mabu itxawama Epa Deus besti benimawakubaĩshãkãwẽ. Mã haskakubaĩmisbuwẽ taeshũ Deusũ matu manakukĩ hawara hawẽ masãnẽ pesa pesa aisma inũ huni yumetsubũ mia biãbaĩtirubumawẽ matu duawashanikiki, hiwekuĩmakinã.

²¹ Tsuabura hawẽ hiweti mabuwẽ kasmai Deuskiri xinaĩ mã Deus hiweshunairã, habiariri matũ xinãnẽ mã nuiai hayaki, nai anu kasmai mai anurã.

²² —Ha inũ, matũ yura anurã, matũ berurã, bĩ txasha keskaki. Haskakiri matu yusĩnũ nĩkakãwẽ. Matũ beruwẽ mã uĩmiski. Matũ xinãwẽ matũ yura pepa haya kemuama mã shabakabi meke pewaki.

²³ Hakia beru txakabuya haska xinã txakabu haya kemukĩ uĩtxakakĩ mã kanemiski. Ha inũ, Deusũ xinaĩ unãbiakĩ tsuãra xinã pewama kanei txakabuhairamisbuki. Maturã, haskayamashãkãwẽ.

²⁴ —Ha inũ, haratura dayarũ hawẽ shanẽ ibu dabe dayashũkĩ ha dabe merabewatirumaki, betsa abukĩ txibãkĩ betsa abuama danãkĩ nĩkamarã. Habiaskari wakĩ pei inũ Deusri txibãkĩ ha dabe haska washũ mã duawatirumaki— iwanã,

Deusũ ikũwaĩbu dasibi mekemiskiaki, na hãtxarã

²⁵ ana hatu yuikĩ: —Eska bestiwẽ taea matũmebi mã hamapaiwẽ dabanã imisbukiri matu yusĩnũ nĩkakãwẽ. Hiwe bestia pepakũkaĩnũ ika piti pi inũ tari sawenũ ika hawẽ dabanã iyamakubaĩshãkãwẽ. Hiwea hayairã, pitiwẽ besti nũ itirubumaki. Yura hayairã, tari sawe bestinũ ika nũ itirubumariki. Haskakẽ ha dabewẽ taea nũ hiwenũ Deusũ nuku hiwea inãma iniki.

²⁶ Uĩkãwẽ, peiyabukirirã. Nai anu peiyabunã, habũ hawa banama inũ hawa bimi tsekatã habũ piti aruti hiwe hayamabiakẽ matũ Epa Deus nai anuatũ hatu pimakubaĩmiski. Haskakẽ Deusũ matu abukĩ peiyabu matu binumakubaĩmiski, merabewakinã.

²⁷ Ha inũ, tsuabura ibubis nuikĩ hawẽ mabu inũ hawẽ piti xinaĩwẽ taeshũ hawẽ hiwea ana txaipawatirumahairaki.

²⁸ Haskai tariwẽ taea xinaĩ mã hawẽ dabanã imisbumẽ? Uĩkãwẽ. Ha hua yumei ewamisbukiri xinãkãwẽ. Hua dayakĩ tari timaisbumabia hua hawẽrua tuemisbuki.

²⁹ Hua haskabiamiskẽ nukũ shenipabu shanẽ ibu Salomão mabuhairayatũ hawẽ tari hawẽrua karuhaira saweshũ hawẽruakĩ hua binuama iniki.

³⁰ Hakia ni mashu huaya sepaxĩshũ kuamisbuki. Deusũ hua hawẽruawamistũ ha hua binumakĩ Deus matuwẽ nuikĩ matu tari sawematiruki, mã ikũ beshmas wabiayarã.

^31-32 Haskakẽ yura dasibibu mai hirabi anuabu piti inũ tariwẽ kemukĩ benakubaũmisbuki. Hakia maturã, mã betsaki. Matũ Epa Deus nai anuatũ matu unaĩwẽ taea ha piti inũ tari mã bikatsis imisrã, ana has xinaĩ hawẽ dabanã iyamakubaĩshãkãwẽ.

³³ Hakia hawara Deusũ abuai txibãkĩ ha dukũ Deus shanẽ ibuwakĩ xinãkubaĩshãkãwẽ. Mã haska wai ha katxu hawẽ hiweti piti inũ tari mã hayakũkaĩshanaii, Deusũ matu merabewarã.

³⁴ Haskakẽ mexukiri mĩ hawara washanaiwẽ dabanã iki dateyamakubaĩshãkãwẽ. Hakia shaba tibi hawãra mia itimaska wai tashnikũkaĩmis xinãkãwẽ— iwanã,