Mateus 6:25 - Kaxinawá Bíblia (BR)

²⁵ ana hatu yuikĩ: —Eska bestiwẽ taea matũmebi mã hamapaiwẽ dabanã imisbukiri matu yusĩnũ nĩkakãwẽ. Hiwe bestia pepakũkaĩnũ ika piti pi inũ tari sawenũ ika hawẽ dabanã iyamakubaĩshãkãwẽ. Hiwea hayairã, pitiwẽ besti nũ itirubumaki. Yura hayairã, tari sawe bestinũ ika nũ itirubumariki. Haskakẽ ha dabewẽ taea nũ hiwenũ Deusũ nuku hiwea inãma iniki.

Kashinawa : Diosun Jesúswen taexun yuba bena yiniki

²⁵ ana jatu yuikin: —Eska bestiwen taea matunmebi man jamapaiwen dabanan imisbukidi matu yusinun ninkakanwen. Jiwe bestia pepakunkainun ika piti pi inun tadi sawenun ika jawen dabanan iyamakubainxankanwen. Jiwea jayaidan, pitiwen besti nun itidubumaki. Yuda jayaidan, tadi sawe bestinun ika nun itidubumadiki. Jaskaken ja dabewen taea nun jiwenun Diosun nuku jiwea inanma iniki.

Mateus 6:25 Referencias Cruzadas

Mateus 10:19

Hakia atxishũ shanẽ ibu kuxipabu anu matu iyuabu hawara mã yuitirukiri Deusũ Yushĩ Pepatũ matu unãmashanikiki. Haskakẽ hawa dateama harakiri yuishãpa? ikĩ bebũkiri xinãyamakubaĩshãkãwẽ,

Mateus 13:22

Hamapai hawẽ hiweawẽs kemui heneama hawẽs besti nuitxakayamakĩ Deusũ hãtxa nĩkabiakĩ ana tapĩkatsi ikama mabuwẽs besti kemui pepaisbumaki, haskatũ yabua hãtxa pepa txibãma yurabu mibã bimiuma keskabuirã.

Mateus 6:31

Haskakẽ yura dasibibu mai hirabi anuabu piti inũ tariwẽ kemukĩ benakubaũmisbuki. Hakia maturã, mã betsaki. Matũ Epa Deus nai anuatũ matu unaĩwẽ taea ha piti inũ tari mã bikatsis imisrã, ana has xinaĩ hawẽ dabanã iyamakubaĩshãkãwẽ.

Mateus 6:34

Haskakẽ mexukiri mĩ hawara washanaiwẽ dabanã iki dateyamakubaĩshãkãwẽ. Hakia shaba tibi hawãra mia itimaska wai tashnikũkaĩmis xinãkãwẽ— iwanã,

Marcos 4:19

hamapai hawẽ hiweawẽs kemui heneama hawẽs besti nuitxakayamakĩ Deusũ hãtxa nĩkabiakĩ ana tapĩkatsi ikama mabuwẽs besti kemui itxa bestiwanũ ika pepaisbumaki, haskatũ yabua hãtxa pepa txibãma yurabu mibã bimiuma keskabuirã.

Lucas 12:11

Haska inũ, matuki sinatakĩ hau matu kupinũbũ hatũ itxati hiwe anu kasmai shanẽ ibu betsa anu kasmai matu iyushũ hatũ shanẽ ibubu anu matu nitxiãbu: “Harakiri yuishãpa?” iki dateyamashãkãwẽ.

Lucas 8:14

Ha inũ, heshe betsa musha anu niri ikarã, habũ Deusũ hãtxa abubiai hatũ hiweawẽ nui inũ mabu betsa betsapawẽ kemutxakayamai hayakatsis ikĩ hatũ hatu yabua Deusũ hãtxa nĩkabiai tapĩkatsi ikama unãshubira henekubaĩmisbuki, yurabu mibã bimiuma keskabuirã.

Romanos 8:32

Haska inũ, hawẽ bake hawa yauxitaskama yunua tashnitã mawakĩ nukubu nukũ txakabu nuku buashuniwẽ taeshũ nũ habu Jesus Cristoki dasiabu hawẽ taeshũ nuku duawakĩ hamapai tibi hawẽ bakewẽ nuku ashunishũ Deusũ nuku ashũkubainikiki.

1 Coríntios 7:32

Haskawẽ taea mã ana bika tenei itimaskayamanũbũ ẽ matu yuiai nĩkakãwẽ. Tsuabura aĩumabũ hawẽ Shanẽ Ibu Jesus dayashũkĩ ha besti txibãkĩ benimawatiruki.

Filipenses 4:6

Haska inũ, ana hamapaiwẽ dabanã iyamakãwẽ. Hakia Deusbe hãtxakĩ yukai inũ kẽwaĩnã, mĩ hamapai hakiri shabakabi yui txanikubaĩkãwẽ. Hanushũ Deusũ matu nĩkashũ ashũkẽ hawẽ duapa kẽwãkubaĩkãwẽ.

2 Timóteo 2:4

Uĩwẽ. Txanima soldado unãnepatũ hawẽ shanẽ ibũ yunua besti dayashũkatsi hawa hamebi hawẽ xinãnẽ abuai atirumaki, hawẽ shanẽ ibu besti benimawanũ ikarã.

1 Pedro 5:7

Ha inũ, hawara tibiwẽ mã bika tenei teai niti imis tibi Deus inãkubaĩkãwẽ, hatũ matukiri xinaĩkikirã.