Mateus 11 - Kaxinawá Bíblia (BR)

¹ Hanushũ nũ hawẽ 12 tsuma kuxipayabu yusĩ menetã Jesusũ nuku nitxiã nũ kaya mae betsa betsapa anuari habia dapikeari hatu yusĩriakubaunaya

Jesus anu Joãonẽ hawẽ tsumabu yununikiaki, na hãtxarã

^2-3 Naximanika João bitxiti hiwe anu bitximabu hiweshũ haska Jesus Cristõ akubainaikiri banabimatãtanabu Joãonẽ nĩkatã hawẽ tsuma hatira kenashũ yunukĩ: —Jesus anu bushũ: “Mekenika Cristo Deusũ nukũ shenipabu yubani ha hushanairã, mĩ habiamẽ? Betsa daka nũ manai?” akĩ ea yukashũtãkãwẽ— hatu wa bushũ yukabu

⁴ Jesusũ hatu yuikĩ: —Hawara uĩkĩ mã nĩkakubainairã, haska Joãoki txaniritãkãwẽ, eskaibukirirã.

⁵ Bekũ inũ beshushbũ uĩaĩbu inũ, haska mapuisbuma mapuaibu inũ, habu bitxiki dasibi txami betsaniki dakemisbu maĩ sakara iki keyuaibu inũ, patabũ nĩkakĩ keyuaibu inũ, mawa ana besteaĩbu inũ, habu nuitapaibũ hatũ pashati kakape nĩkatã benimaiburã, haska João yuitãkãwẽ.

⁶ Tsuãra ea ikũwaĩ hawa hawẽ xinã txakabui txĩtuĩsmarã, ikũ benimashãkanikiki!— hatu wa

⁷ João anu buaibũ ha dapi mapubaunabu Jesusũ Joãokiri hatu yui taewakĩ: —Hanu tsua hiweabuma anuarã, hawa mã uĩtãtanimamẽ? Tawa pei niwẽ bubi bubi wai keska wakĩ hunĩ hawẽ xinã betsa betsapa maewakeakeimamẽkaĩ?

⁸ Haskamẽ? Haskamaraka? Haskara hakiri kaĩaĩ mã uĩtãtanimamẽ? Hunĩ tari pepa sawea daka? Tari pepa sawea mabu akũhairayabu hatũ shanẽ ibũ hiwe hawẽrua anu besti hiwea ikaibu mã uĩtiruki.

⁹ Haskakenã, hawa mã uĩtãtanimamẽ? Deusũ hãtxa yuishunikamẽkaĩ? Haki. Joãonã, ikũ Deusũ hãtxa yuishunikaki. Ha inũ, yuishunika betsabu Deusũ yununi Joãonẽ ma hatu binuaki.

¹⁰ Ha inũ, Deusũ hawẽ bake nitxĩkatsi Joãokiri yuikĩ: ‘Nĩkawe. Hanu mĩ kashanũ hau pewai kanũ ẽ hãtxa yuishunika betsa bebũkiri ẽ yunushanaii, ẽ mia nitxĩriamarã’, akĩ hakiri hawẽ kaka kenenibuki.

¹¹ Ikũ ẽ matu yuiaii. Yura dasibibũ Deus dayashũkĩ tsuã João binuama ibianibũ hanu Epa Deus shanẽ ibuaitiã ikũwaĩbu haki dasiabu beshmashairabiabũ João binushãkanikiki.

^12-13 Naximanika João huriama matũ itxati hiwe tibi anushũ Moisés yusĩa inũ Deusũ hãtxa yuishunikabũ yusĩpauni matu yusĩ bestikubainimabuki. Hakia João hushũ Deus shanẽ ibushanaikiri bebũkiri hawẽ kaka pepa yusĩkubainaya huni pubenẽ detekatsis ikĩ Deus shanẽ ibushanai ewamamakĩ beshtenũ ika ikanikiki.

^14-15 Mã pabĩkiyabuki. Nĩkatã hakimayamashãkãwẽ. Deusũ hãtxa yuishunika Elias hau ana hushanũ Deusũ yubani Joãonã, habiaki. Mã ikũwãkatsi ikairã, hawẽ hãtxa ikũwãkãwẽ— iwanã,

¹⁶ —Nukunabu na habiatiã hiweabunã, haskara xinãkanimẽkaĩ? Matu yuinũ nĩkakãwẽ. Mae namakis hemaĩtĩ anu beyuskĩ hatũ ibubu imis mawai bake mixtĩbu shuku dabea tsaushũ shuku betsã yuikĩ:

¹⁷ “Teperewe nũ mawabiaya benimai mã nawamaki. Hanua nũ kashei ikaskĩ nũ nuiti nawa mawabiaya mã kashamariki”, hatu wabu hawawẽra beyusti unãbuma keskabuki, nukunaburã. Matũ xinã txãkãti hubiakẽ mã benimamaki. Hamẽ matũ txakabu xinaĩ kashakatsi ikama mã xinã betsa waismaki.

¹⁸ Habiaskariai ha dukũ Naximanika João hushũ matu yusĩkubaĩkĩ misi pepa piama vinho paepa akama matube beyusamakẽ hakiri hãtxakĩ: “Yushĩ txakabu hayaki”, iwanã, mã yuiakeakeimaki.

¹⁹ Hanua eari matũ Hutxi Kayabi Iuwa hushũ misi pepa pikĩ vinho paepa aki ẽ matube nawabiakũkainaya ea yuãkĩ: “Uĩwẽ. Pikeki. Paẽkĩ Romano pei bishunika txakabubu inũ yura txakabu betsabu haibu wamiski”, ikĩ mã eari yuãmiski. Hamẽ nuku dabe nũ pepabiakẽ Deusunabu kayabibu besti unãnepakĩ habũ nukũ yusĩa nĩkatã nuku txibãkanikiki— iwanã,

Mae betsa betsapa anushũ Jesus nĩkabumakẽ hatu ha anikiaki, na hãtxarã

²⁰ Hanushũ Jesusũ hatu yusĩkĩ taewaimanu mae betsa betsapa anushũ yurabu uĩmakĩ dami atimaska hatu washũbia hawa hatũ xinã betsa wama ikimabukiri yurã kaiã Jesusũ hatu yuikĩ:

²¹ —Corazim inũ Betsaida anu mã hiweabu matũ txakabu henetã mã xinã betsa wakatsi ikamarã, mã nuitapahairashãkanaii. Hakia Corazim inũ Betsaida anushũ hawẽ unãti dami kuxipa betsa betsapa ẽ matu uĩmakubainima keska Tiro inũ Sidom anu hiweabũri habiaskari uĩtã hatũ txakabu henenũ, iwanã, huĩti nixmahairatã saku wati tari besha sheni sawetã txi mapuwẽ mapu tukutã hatũ xinã betsa watã Deus ikũwãkeanibuki.

²² Haskawẽ taeshũ hanu kupiaitiã ha nawabu Tiro inũ Sidom anu hiweabu hatu kupi mirĩkĩ Corazim inũ Betsaida anu hiweaburi xinã betsa wabuma Deusũ hatu kupihairashanikiki.

²³ Ha inũ, Cafarnaum anu hiweabũ mã xinãkĩ: “Nũ pepabuwẽ taeshũ Deusũ nuku kẽwãshanikiki”, ibiakĩ mã ea ikũwãbumawẽ taeshũ hanu txi nukaisma anu Deusũ matu yunushanikiki. Hakia Cafarnaum anushũ hawẽ unãti dami kuxipa betsa betsapa ẽ matu uĩmakubainima keska Sodoma anu hiweabutiãri haskari uĩtã hatũ txakabu henenibunã, hatũ bababuri nuku dapi hiwekeãkanaii.

²⁴ Haskawẽ taeshũ hanu kupiaitiã ha nawabu Sodoma anu hiwenibu hatu kupi mirĩkĩ Cafarnaum anu hiweabu xinã betsa wabuma Deusũ hatu kupihairashanikiki, haska Sodoma ani keska binumakinã— iwanã,

Jesus bestitũ Deus unaĩkiri hatu yusĩnikiaki, na hãtxarã

²⁵ hanua Jesus xinã txãkaĩ benimakĩ yuikĩ: —Epaã, nai inũ mai hirabi minaski. Mĩ duapa hãtxa ha unãnepai kẽmisbu mĩ hatu unãmama habu keĩsbuma besti mĩ hatu unãmakubainaiwẽ taeshũ ẽ mia kẽwaiĩ— iwanã

²⁶ —Epaã, ikũ haska wakatsi mekenishũ mĩ ma hatu unãmaii— itã yura betsabu mapushũ nĩkaibũ

²⁷ Jesusũ hatu yuikĩ: —Ẽ Epã hawẽ kuxipa dasibi ea yununirã, tsuã ẽ hawẽ bake ea unãbumaki. Hakia ẽ Epã besti ea unã keyuikiki. Hakia tsuã ẽ Epa unãmariki. Ea hawẽ bakẽ besti ẽ Epa ẽ unã keyuriaii. Hakia habũ ea txibaĩbu ẽ Epa ẽ hatu unãmamiski.

²⁸ Tsuabũra shãkama ia inũ dayatxakayamai keskai mã punu nukaburã, ẽ matu huĩrukũmakĩ merabewanũ eanu bekãwẽ.

²⁹ Ha inũ, ina awa dabeki hi tekishkũshũ hawara shãkama bumabu bika dayabiai merabenaĩ punu nukaisbumaki. Habiaskariai earã, duapakĩ matu merabewakĩ ina awa hi tekishkũrabea merabenãmisbu keskai mã ea txibãyã ẽ kuxipawẽ ẽ matu merabewakubaĩshanaii, mã bika tenebiaya matu huĩrukũmakinã.

³⁰ Hanua ebe hi tekishkũrabea keskashũ hawara bikahaira ana tenehairama ebe merabenaĩ nũ shãkapa aka wabaĩtirubuki— hatu anikiaki.