Joel 2 - Kaxinawá Bíblia (BR)

Shinibube Senhor Deus hushanikiaki, na hãtxarã

^1-2 Tsuãra Mati Sião anushũ trombeta mawakĩ txã txã akĩ Senhor Deusũ mati meribi anushũ mese huaikiri hawẽ unãmati hatu banabimakãwẽ. Senhor Deusũ hatu kupiaitiã nai kuĩ meshupa inũ nai kuĩ uta shabatiã meshua yamea dakashanai ma kemaiwẽ taea Judá mai pakea anu hiwebaunabu dasibi datei saki saki ishãkanikiki. Detenamenikabu kushipahaira mirima mati matipa anu bebirã bebirani ma penai shabakiranai keska dasibi nati ikabu uĩshãkanikiki. Haskaibu uatiã tsuã uiãma inibu inũ ana haska kaiaĩ unuri ana uiãma ishãkanikiki, ana ha keska betsa tashniama ishanairã.

³ Hanua shini txi keska nukuriabuma mai pepa anu mibã hawẽrua dakakẽ txi here hi hi ikai keska bekĩ dasibi kuakĩ atxibaĩkĩ binukaĩriama dasibi menui keyubainaya hanua ha txi ma binukainaya habias mai anu mibã hawẽrua ibiaima hanu tsua ana hiweama yẽkẽ dakashanikiki, hawa teshe betsa henebainamarã.

⁴ Ha shinĩ yurarã, cavalo keskaki, detenamei haki katsaumebaini kushibiranaibu keskarã.

⁵ Mati matipa mamaki ha shini ishtxu ishtxu ibiranirã, hawẽ hui kaĩmabiranairã, detenamei cavalo hawẽ tarãbaĩti tarãmekainai hui keskabuki. Tarush tarush ibiranaibu keska nisa pei tsusĩ kua sakara sakara ibainai keskabuki. Detenamenikabu mirima unãhairaibu shukuabu tibi detenamekatsi ma pehaira watã beaibu keskabuki.

⁶ Ha shini uĩ yurabu dasibi datei saki saki iki besu hushua mapuabũ

⁷ huni detenamenika mẽtsisipabu keska kushibirani mae kenekauna hanu inanũ ika niti ikama bui kekubaini hawa binui yushtuama

⁸ hawa betsa tu ikama bestibu tibi habias bai besti txibaĩbu hatukiri pia mirimahaira bishku bishku abiabu hawa dateama ha shukubainaibu hawa pua iki pashkama

⁹ mae kenebaunibu anu ishtxubaĩbaini inatã butubaini hiwe tibi hikikaĩ yumetsubu hawa txaniama keska hanu uĩti shui anu hikibaĩkĩ maewã hirabi atxi keyuaibũ

¹⁰ haskaibũ hatu bebunua mai saki saki iki nai tari tari iki bari inũ ushe ibubis meshui bishi mawaira ana txashama

¹¹ hatu bebũ kakĩ hawẽ hui tĩ ikaĩkainai keska hawẽ tsumabu Senhor Deusũ hatu nĩkamakubirani hawẽ yunuti hãtxa nĩkakĩ ashũkĩ menemisbu mirimahaira tsuã tana keyutiruma ishãkanikiki. Hanua Senhor Deusũ hanu kupishanai shaba mesehairatiã hawẽ kushipa uĩkĩ tsuã hawa nemakĩ beshtetiruma ishanikiki.

Senhor Deus nuikipa hatuwẽ dabanã ishanikiaki, na hãtxarã

¹² Hanushũ Senhor Deusũ hawẽ hãtxa txanima mestẽwãkĩ eska matu yuikĩ: “Samakei bis bis iki kashakĩ matũ huĩti hirabiwẽ shinã betsa watã ea anu txĩtũrikãwẽ”, matu waikiki.

¹³ Matũ txakabu henetã shinã betsa wakĩ matũ Mekenika Senhor Deus anu txĩtũtã ha besti txibãkĩ hawẽ hãtxa ikũwãkubaĩkãwẽ. Senhor Deus nuikipa duapa hĩ hĩ isma unãshubira sinatakũkaĩmis betxipainamenikahaira matu kupikatsi ikamabia matu kupitiruwẽ taeshũ nui bika tenekĩ matũ tari mã ushnimis keska wakĩ matũ huĩtinĩ mã txakabumis uĩmakĩ matũ tari ushnia keska wakãwẽ.

¹⁴ Mã haskaibũ matu kupinũ ishũ shinãbiai ana haska shinãma shinã betsa washanimẽkaĩ. Haskatã nukũ Mekenika Senhor Deus mã ha tsekashũ inãkuinũ shekiwã trigo inũ uva vinho matu inãtiruki, matu ana pepawẽ duawakinã.

¹⁵ Mati Sião anushũ trombeta txã txã akĩ nukunabu itxawashũ hatu banabimakãwẽ, hau samakenũbunã.

¹⁶ Deusũ enabu dasibi itxawatã Deusũ hau hatu ana danãyamanũ hatũ txakabu tibi hatu henemakĩ hatũ huĩti hatu shũpĩ wãmakãwẽ, anibubu inũ, yushabubu inũ, huni ewabu inũ, berunãbu inũ, txipashbu inũ, bake mishtĩbu inũ, bakeishtã txutxu akaibu inũ, dama aĩyãbiashu hatũ aĩbe tashnibiranaibu dasibibu hatu itxawakinã.

¹⁷ Senhor Deusũ kẽwãti hiwe Templo hemaĩtĩ anu itxabu bebũ nikaĩ Deusbe nukunabu hãtxashunikabu Senhor Deus dayashũmisburã, ha meribi dĩtu beputi anu hawẽ kẽwãti txi tapu namakis nia kashakĩ eska hãtxa Senhor Deus hau yuinũbũwẽ: “Senhor Deusuũ, minabũ txakabu tere atã ana shinãyamawe, hau ana tsuabura minabuki kashekubaĩyamanũbunã. Minabu nawa betsabũ hatuna wakĩ ibuwatã hau ana hatu yunuyamashanũbũwẽ. Habũ ikũwãbumã mikiri hatu yukakĩ: ‘Hania, matũ Mekenika Deusrã? ikĩ hau ana haska hatu yuiyamakubainũbũwẽ’ ”, ikaibũ

¹⁸ haska hãtxa yuiaibũ hawenabuwẽ nuikĩ hawẽ mai pakea betxipaikĩ hatu shinaĩ uĩmakĩ

¹⁹ Senhor Deusũ hatu itxakawama hatu yuikĩ: “Matũ piti hau keyuyamanũ shekiwã trigo inũ, uva vinho inũ, piti sheni ẽ matu yunukubaĩshanaii, ha pi mã benimai pe pekubaĩshanũbunã. Ha dikabi ikũwãbuma hau matuki ana kasheyamanũbũ ẽ hatu matu nemashũkubaĩshanaii.

²⁰ Shini nortekiria matukiri beaibu matu anua ẽ hatu urẽshanaii, hari tsua hiweabumakiri hatu nitxĩkinã. Habu dukũ bebuaibu Ianẽwã Mar Morto anu ẽ hatu hasashanaii. Habu txipu bekĩ hatu mekebiranaibu Ianẽwã Mar Mediterráneo bari kaikiri anu ẽ hatu hasariashanaii. Ẽ hatu haska wa hatũ yura txapui pisi mayashãkanikiki, ea Senhor Deusũ hatu betsahaira washũkĩ tsuã haska shinãtiruma wakinã”, ikikiki.

²¹ Ẽ mai pakeaã, hawa dateama benima txakayamariwe, Senhor Deusũ hatu betsahaira washũkĩ tsuã haska shinãtiruma washanaiwẽ taearã.

²² Yuinaka basi anu mapuabuũ, hawa dateyamashãkãwẽ. Matũ piti basi ana hukuĩ beneshanikiki. Hi sharabu bimi hayashãkanikiki. Hi mibã figo inũ uva nishi hawẽ bimi mirimahaira hayariashãkanikiki.

²³ Mã Mati Sião anu hiweabuũ, benimarikãwẽ. Hanu ui pakei taekaini inũ hanu bari pakei taekaini hanu shaba pepatiã Senhor Deusũ ui yunumiswẽ taea matũ Mekenika Senhor Deuswẽ benimakubaĩkãwẽ. Txanima uatiã matu ashũmis keska ana habias keskari matu ashũkubaĩshanikiki.

²⁴ Matu haska waiwẽ taeshũ matũ shekiwã trigo bimi txakama mã tsekashanaii. Ha dikabi uva vinho inũ piti sheni itxapahaira mã hamẽ ashanaii.

²⁵ Senhor Deusũ matu ana yuiai nĩkakãwẽ: “Ha baritiã hau shini mesebũ matũ yunu txakabuwanũbũ matu anu ẽ hatu yunua beshũ matu yamawaĩmabunã, eã ẽ ana matũ yunu inãkĩ hayawashanaii.

²⁶ Matubũ pikĩ yaniwakubaĩkinã, ea matũ Mekenika Senhor Deus mã ea kẽwãkubaĩshanaii. Ẽ kushipa ẽ matu unãmashinawẽ taea mã enaburã, ana matũ dake pae teneama mã ishanaii.

²⁷ Ea ẽ matũ Mekenika Senhor Deus ẽ matuberã, mã Israelbũ hanu mã ana ea unã taewabaĩshanaii. Ea besti ẽ matũ Deus kayabi betsa hayama mã unãshanaii. Haskawẽ taea mã enaburã, ana taska matũ dake pae mã teneama ikũkaĩshanaii”, itã,

Hawẽ Yushĩ Kushipa Deusũ hatu anu yunushanikiaki, na hãtxarã

²⁸ Senhor Deusũ ana hatu yuikĩ: “Na eska binukainayarã, ma bari hawẽ henei kaya ẽ Yushĩ Pepa yura dasibi hiwebaunabu anu ẽ hatu yunua hatu atxishanikiki. Matũ huni bakebu inũ matũ aĩbu bakebu ekiri hãtxabaũshãkanikiki. Mestebu inũ yushabubu namawẽ haska ishanai uĩshãkanikiki. Berunãbu inũ txipashburi nama keskawẽ haska ishanai ẽ Yushinẽ hatu uĩmashanikiki.

²⁹ Ha dikabi ha shabatianã, matũ dayarubu hunibu inũ aĩbuaibu anu ẽ Yushĩ Kushipa ẽ hatuki buteriashanaii.

³⁰ Haska inũ, nai anua hawẽ e imati kushipa wakĩ mai anuari dami betsa betsapari ẽ washanaii, himi habamakĩ inũ, txi wakĩ inũ, nai anua basnũ bai kua hawẽ kuĩ keska wakĩ ẽ hatu uĩmashanaii.

³¹ Ha haskaitiã bari ana pesheama meshui inũ ushe ana txashamari himi keska ishanikiki. Ẽ bake kushipahairai txashakapa shanẽ ibui hua kemariamakẽ ha hanu kupiaitiã shaba mese atimapa ishanikiki”, matu waya

³² hanushũ tsuabũra: “Ẽ Shanẽ Ibu Senhor Deus kushipaki”, ikĩ ea dayuiaibu habu besti pashakĩ hatũ hiwea ikibi ika bishãkanikiki, mawa kayabi anu kamarã. Haska Senhor Deusũ hatu yubanirã, Mati Sião inũ Jerusalém anu hanu piskuti hayaki. Hanua tsuabura Senhor Deusũ ma hatu katuni hiweriakubaĩshãkanikiki, hawẽ kupiti mawa bika teneabumarã.