Joel 2:26 - Kaxinawá Bíblia (BR)

²⁶ Matubũ pikĩ yaniwakubaĩkinã, ea matũ Mekenika Senhor Deus mã ea kẽwãkubaĩshanaii. Ẽ kushipa ẽ matu unãmashinawẽ taea mã enaburã, ana matũ dake pae teneama mã ishanaii.

Joel 2:26 Referencias Cruzadas

Salmos 22:26

Habu nuitapabiai keĩsbumã pikĩ yaniwai pepeshãkanikiki. Matubũ mã Senhor Deus benairã, haki nukutã mã kẽwãshanaii, bari itxapa hiwekũkaĩkinã.

Salmos 37:19

Bari betsatiã betsabũ bika tenei buniaibũ tsuabũra Deus duawamisrã, hawa dakeama inũ hatũ piti hayakubaĩshãkanikiki.

Salmos 67:5

Deusuũ, mae tibi anushũ hau mia kẽwanũbũwẽ. Mai hirabi anushũri hau mia kẽwãriabaunũbũwẽ!

Provérbios 13:25

Huni pepatũ pikĩ yaniwatã benimai shinã txãkãkũkaĩmiski. Hakia huni txakabũ pibiai bunikũkaĩmiski.

Isaías 45:17

Hakia Israelburã, Senhor Deusũ hatu mekekĩ hatu piskumakĩ heneama ishanikiki. Haburã, hawa babui dake taskama ishãkanikiki.

Isaías 49:23

Habu shanẽ ibuhairanibu betsairã, habu inũ hatũ aĩ matũri mã hatu tsuma washanaii. Matu dayashũkĩ matũ bakebu matu mekeshũshãkanikiki. Ha inũ, hatũ aĩbu bakebũ matũ bakebu matu txutxu amashũshãkanikiki. Matu bebũ maĩ beti ika dakashũ habũ matu kẽwãkĩ hatũ hanawẽ matũ tae tashushãkanikiki. Matu haska waibu uĩkĩ txanima ẽ matũ Senhor Deus mã eki txiti imis mã ana hawa eki dakeama ishanai mã unãshanaii.

Isaías 54:4

Miki hawa kashekĩ mia usãma ishanaibuwẽ taea hawa dateyamashãwẽ. Miki sinatama ishanaibuwẽ taea dakeyamashãwẽ. Mĩ txipash yumetxakai txakabuni hawẽ dakemisrã, hakimawe. Mia itxakawakĩ mĩ benẽ henebaĩkĩ mia dakewanirã, ana has shinãyamawe.

Isaías 55:2

Haskai mã hamẽ pei inananãmismẽ, pitimabiakẽ hamẽ putakinã? Haskakĩ matũ daya pei mã hatu inãmismẽ, hawa matu merabewakĩ shinã txãkãwatirumabiakenã? Ea nĩka pewakubaĩkĩ mã piti pepa pishanaii, hawara piti kemutapa mã betxipaiai pikinã.

Miquéias 6:14

Ẽ matu kupikubainaya pibiai mã hawa yaniwatã pepeama buni pae tenei mã nuitapakũkaĩshanaii. Hawara matu mebinũ ika beaibu matũ bai anua piti bishũ hune hatuki datekĩ mã hani pashawatiruma ishanaii. Hawara piti teshe ha pikatsi mã mekekatsi hune arubiakẽ hau yamawai benũbũ nawa detenamenikabu ẽ hatu yunushanaii.

Romanos 10:11

Haska inũ, Deusũ hãtxa yuishunika Isaísĩ kenekĩ: “Tsuabũra Messiasĩ hãtxa ikũwãkĩ txibaĩbu ẽ hatu hawa dake wama ishanaii”, aniwẽ taeshũ

Romanos 5:5

Haska nũ manakatiru Deus nukuwẽ nuimis nuku unãmakĩ hawẽ Yushĩ Pepa nuku inã hawẽ taeshũ Deus ikũwãkĩ txibãkubaĩkĩ haska nuku yubani manai hamẽ nũ manakamaki. Haska xarabuwẽ taeshũ hamapai bika nũ teneairã, hawẽ taeshũ Deus nũ kẽwãkubainaii.

Romanos 9:33

Na habias yusĩa Messiaskiri Deusũ hawẽ hãtxa yuishunika Isaías yuimakĩ: “Uĩa. Ẽ haska yubakani ẽ kuxipa mixki keska Jerusalém anu ẽ nitxĩshanaii, haki huti iki itxapabu tsakabaĩbaini tĩ ikubaĩshãkanikiki, ikũwãmarã. Hakia tsuabũra hawẽ hãtxa ikũwãkĩ txibaĩbu ẽ hatu hawa dake wama ishanaii”, aka nĩkatã hari kenerianiki.

Deuteronômio 12:7

Haska mã daya txakayamakubainai yunu matu inãshina shinãkĩ Senhor Deus bebũshũ itxashũ matunabubetã besti pi benimakĩ uĩmakubaĩshãkãwẽ, Senhor Deusũ matu duawakubaĩshinawẽ taeshunã.

1 Timóteo 6:17

Tsuãra ikũwaĩ hawẽ pei inũ hawẽ mabu itxapa hayabũ xinaĩ: “Natiã ẽ mabu ẽ hayawẽ ẽ hawẽ hiwei peaki”, ikĩ hau ana haskakiri xinaĩ hawẽ kẽyamanũbũ hatu yuiwe. Ha haskakiri xinãmisburã, hatũ mabu txapumiswẽ hatu mestẽwãtã hiwematirumaki. Haskakẽ uatiã imisbu haska xinãma hakia natianã, Deusũ nuku benimawakĩ hatũ hamapai betsa betsapa yauxiama nuku inãkubaĩmis haska besti bi hau hiwekubainũbũwẽ.

1 João 2:28

Ẽ bake keskabuũ, natiã Jesus Cristoki dasitã heneyamakãwẽ, haki txiti ikirã, hanu ana nukuki nukui huaitiã damapai nũ haki datei daketirubumakirã, ha bebunuarã.