Hechos 2 - Kaxinawá Bíblia (BR)

Deusũ Yushĩ Pepa hatu anu hunikiaki, na hãtxarã

¹ Hanua ana betsatiã judeubu Pentecostes nawai besiaibũ Jesus ikũwaĩbu dasibi hanus itxabũ

² hawaira nai anua hawẽ bana niwe kuxipa bei dãka imis keska shũku ibirani hanu maniabu anu kerũ kerũ ikĩ

³ haskakĩ Jesus ikũwaĩbu tibi txi here keska shawakeakei hatu mamaki maratamea hi ibauni hatuki hikiakeakeaya

⁴ haskakĩ dasibi hatu atximakĩ keyuaya haska hãtxatirubumabiakẽ nawa betsa betsapabũ hãtxa tibiwẽ Deusũ Yushĩ Pepatũ yuimakĩ hatu hãtxamakĩ taewaya

⁵ mai pakea betsa betsapa anua judeubu Jerusalém anu hiwei benibu hiweabũ habu pepakĩ Deusũ hãtxa txibãkĩ menekĩ heneisbuma

⁶ hawẽ bana nĩkabirani hanu mirima itxashũ ikũwaĩbu anu hãtxa betsa betsapawẽ hãtxabaunaibũ harakiri xinãtima hatu wakeakeabu huni tibitũ mai kesua anua habũ hãtxawẽ hãtxaibu nĩkai haskawẽ hãtxaisbuma nĩkai

⁷ haskakaĩmaibu nĩkai e iki teku iake iakei hãtxanamebaũkĩ yuikĩ: —Narã, Galiléia anuabumamẽ, na haska dasibi hãtxabaũkanairã?

⁸ Nukũ hãtxa tibiwẽ hãtxabaunaibubĩ! Nũ nĩkai? Haskai ha hunibu haska hãtxakanimẽkaĩ?

⁹ Na nũ nukuburã, Partos anuabu inũ, Média anubu inũ, Elão anuabu inũ, Mesopotâmia anuabu inũ, Judéia anuabu inũ, Capadócia anuabu inũ, Ponto anuabu inũ, mai pakea Ásia anuabu inũ,

¹⁰ Frígia anuabu inũ, Panfília anubu inũ, Egito anuabu inũ, Líbia mai pakea Cirene dapi anuabu inũ, Roma anuabu inũ,

¹¹ betsa judeu kainibu inũ, betsabũ judeubũ beya txibãmisbu inũ, Creta anuabu inũ, Arábia anuabu beimabu nukũ hãtxa tibiwẽ Deusũ kuxipawẽ e imatikiri yuiaibu nũ hatu nĩkaii— iake iakeaibũ

¹² haskaibu hatu nĩkatã dasibi harakiri xinãtima e iki keyutã yuka iki: —Na eska txani hãtxaiburã, hawamẽ?— ikaibũ

¹³ hakia huni betsabũ hawa xinãmari hatu kashe wakĩ ikaibukiri hatu yuikĩ: —Paẽa daki hãtxai ikanikika!— ikaibũ

Pedrõ hatu tapĩmai hãtxanikiaki, na hãtxarã

¹⁴ hanua Jesusũ 11 tsuma kuxipaya betsabube Pedrõ hatũ hãtxa nĩkai benia nishũ hui kuxipawẽ hatu yuikĩ: —Judeubu inũ dasibi Jerusalém anu hiweabuũ, eska ẽ matu yuiai nĩka peirawakãwẽ, haska mã nĩkai hãtxairã.

¹⁵ Na yuraburã, paẽabumaki, haska mã xinãkĩ ikũwaĩ keskamarã. Haskai e iskaũ bari keyariamabiakẽ 9:00 hora paẽtirubumaki.

¹⁶ Hakia natiã haska tashniai nĩkakĩ mã uĩaĩnã, haska bebũkiri Deus yubakanishũ akikiki. Hawẽ hãtxa yuishunika Joel Deusũ hatu yuimakĩ:

¹⁷ Deus txanii: ‘Ma bari hawẽ henei kaya ẽ Yushĩ Pepa yurabu anu ẽ hatu yunua hatuki dasikẽ matũ huni bakebu inũ matũ aĩbu bakebũ ekiri yusĩaĩbũ berunãbu usha keskashũ dami betsa betsapa uĩaĩbũ anibubu usha ekiri namariashãkanikiki.

¹⁸ Habiatiãri ẽ tsumabu hunibu inũ aĩbuaibu ẽ Yushĩ ẽ hatu inã ekiri yusĩbaũshãkanikiki.

¹⁹ Haska inũ, nai anua hawẽ e imai kuxipa wakĩ mai anuari dami betsa betsapari ẽ washanaii. Himi habamakinã, txi wakinã, basnũ bai kua hawẽ kuĩ keska wakĩ ẽ hatu uĩmashanaii.

²⁰ Ẽ bake kuxipahairai txashakapai shanẽ ibui hua kemariamakẽ shaba betsa betsapashanikiki. Ha haskaitiã bari ana txashama mexu wakĩ inũ ushe ana txashamari himi keska ishanikiki.

²¹ Hanushũ tsuabũra: Ẽ Shanẽ Ibu Yavé Deus kuxipaki, ikĩ ea yuiaibu habu besti pashakĩ hatũ hiwea ikibi ika bishãkanikiki’, aka Joelĩ yusĩtã nuku keneshuniki— iwanã, Pedrõ ana hatu yuikĩ:

²² —Israelbuũ, ẽ matu yuiai ea nĩkakãwẽ. Matunã, mã unãhairaii. Jesus Nazaré anua hua Deusũ kuxipa watã hawẽ e imati inũ hawẽ unãti wamakĩ dami itimaska tsuã atiruma wamakĩ hawẽ kuxipa matu uĩmakĩ Deusũ amakeakekĩ shabakabi matu uĩmakubainimaki.

²³ Haska yubakani Deusũ ha huniwẽ abainai xinãma haska wai beshtenũ, iwanã, matũ hawẽ bake danãkĩ haki yubakatã hatu atximatã tenãmanũ, iwanã, huni txakabu mã hatu mastamaimaki.

²⁴ Hakia mawabiakẽ Jesus Deusũ ana bestẽwaĩmaki, mawamamistũ isĩ tenemakĩ baxitirubia hawẽ hiwea yabutiruma binumakinã.

²⁵ Hamẽ shanẽ ibuhaira Davĩ Jesus iki kaikiri yuikĩ: ‘Ẽ shanẽ ibũ ea mekekĩ ẽ yusiuri hawẽ kuxipawẽ ea merabewai ẽ uĩkubainaya hawa tsuã ea maematã binũtirumaki.

²⁶ Haskawẽ taea huĩti xinã txãkaĩ benimai nawakĩ kẽwãkĩ heneama ẽ hiwea dasibiwẽ ikũwaĩ hawa dateama ẽ ikũkaĩshanaii.

²⁷ Mawabu hanu dasibi bumisbu anu ka mĩ meribi mĩ tsumapã yura maiwati tãpe anu hau dakai txapuyamashanũ mĩ nemashanaii.

²⁸ Haska watã hanu hiwekuĩ kati bai ea unãmatã mia anu hiwemakĩ mĩ ea benimawakubaĩshanaii’, akĩ nuku keneshuniki— iwanã, ana Pedrõ hatu yuikĩ:

²⁹ —Ẽ betsabu inũ ẽ puibuũ, nukũ shenipabu kayabi Davikiri txanima shabakabi matu yuinũ ea nĩkakãwẽ. Davi mawa hanu maiwakĩ hawẽ yura hananibu nũ uĩmiski.

³⁰ Habias Davi Deusũ hãtxa yuishunika hawẽ yurakiri hamebi hãtxama hakia hawẽ baba betsa kaĩriamakiri Deusũ yubakĩ shanẽ ibuhaira ishanai unãmakĩ yuimaniki.

³¹ Deusũ hãtxa yuishunika Davi bebũkiri Deusũ xinãmakĩ Messiaskiri hãtxamakĩ hatu yuimakĩ: “Messias Cristo mawa hawẽ yura txapuama inũ mawabu anu hawẽ yura baxiama ana bestẽwãshanikiki”, ika hakiri hãtxaniki.

³² Hamẽ Deusũ haskakiri hãtxamanirã, ha Jesus mawa bestẽwãxina txanima ibubis dasibibũ nũ uĩkubaĩxina nũ unãkanaii.

³³ Hanushũ ana bestẽwãtã Deus hau habe shanẽ ibunũ, iwanã, hawẽ yusiuri tsaũtã haska yubakani hawẽ Yushĩ Pepa hawẽ Epã Jesus inã hatũ nuku inãkeakekĩ nuku kuxipa waikiki, na habia nĩkakĩ mã uĩanã.

³⁴ Haska inũ, Davikirima tsuara nai anu kashanaikiri habias Davĩ hamebi yuikĩ: ‘Deusũ ẽ shanẽ ibu yuikĩ: Ẽ yusiuri tsauyuwe.

³⁵ Hanu miki sinataibu ẽ mia yamawashũriama ebe shanẽ ibukĩ manayuwe’, aka hatu yusĩtã nuku keneshuniki— iwanã,

³⁶ —Israelbu dasibibuũ, txanima matu shabakabi xinãmanũ ea nĩkakãwẽ. Ha habias Jesus cruz anu mã hatu mastamaimarã, Deusũ bestẽwãtã nukũ Shanẽ Ibu kayabi nuku washuĩmaki, hawẽ Messias Cristorã— hatu wa

³⁷ hanu hatube itxabũ nĩkai haskatimẽ? ika hatũ huĩti nixmahairai bika tenekĩ xinãkĩ Pedro inũ Jesusũ tsuma kuxipaya betsabu hatu yukakĩ: —Betsabuũ, haskatã nũ haskatirumẽ?— hatu wabu

³⁸ Pedrõ hatu kemakĩ: —Deus mã txibãkatsis ikairã, matũ txakabu henetã matũ xinã betsa watã Deus anu berikãwẽ. Haska watã mã Jesus Cristo ikũwaĩwẽ taeshũ hawẽ kenawẽ matu tibi nũ matu naximaya matũ txakabu buatã hawẽ Yushĩ Pepa Deusũ matu inã mã bishanairã.

³⁹ Nukuna bestimaki. Haska Deus yubakani ma akikiki. Matu dasibibu inũ matũ bakebu inũ txaihaira manibaunabu nukũ Shanẽ Ibu Deus haska matukiri yubakairã, dasibi matukiri iniki. Haskawẽ taeshũ hatira hawenabu wakĩ katukĩ kenakatsis ikikiki— iwanã,

⁴⁰ ana hãtxa itxapawẽ Jesus mekenãkiri shabakabi yusĩ pewatã Pedrõ hatu yusĩkĩ yuikĩ: —Ha yurabu hiwe txakabu anua pasharikãwẽ— hatu wa

⁴¹ hanushũ ha shabatiã hawẽ hãtxa nĩkakĩ ikũwãkĩ xinã betsa waibu 3.000 yurabu naximabu hati ana hatubetã ikũwaĩ hatuki dasinibukiaki.

⁴² Hanushũ Jesusũ kuxipayabũ hatu yusĩaĩbu habũ hatũ yusĩa tapĩkĩ txĩtuãma hawara hatũ hamapai pashkai merabenaĩ inũ, itxashũ hatubetã Jesus hatu mawashunima xinãkĩ misi pikĩ inũ, habubetã Deus kuxipa yukakubainibukiaki.

Habũ dukũ ikũwãtã eskai hiwekubainibukiaki, na hãtxarã

⁴³ Habiatiãri Jesusũ tsuma kuxipayabũ Deusũ hatuwẽ dami atimaska itxapa akĩ hawẽ unãmati betsa betsapa akaibũ dasibi Jerusalém anu hiweabu e iki Habaa! ikubainaibũ

⁴⁴ ikũwaĩbu dasibi pashkama merabenaĩ hatũ hamapai yauxiama inãnanãkĩ

⁴⁵ betsabu mabuyabu inũ baiyabũ hawẽ pei bikatsi huni betsabu inãtã hawẽ pei bitã ikũwaĩbu nuitapaibu hawa hayama pei hatu pashkashũkĩ merabewakubainibukiaki.

⁴⁶ Hanua shaba tibi Templo hemaĩtĩ anushũ kuxipa yukakĩ hiwe anushũri itxashũ hawa txĩtuãma xinã txãkãbetanã hatubetã pikĩ Jesus hatu mawashunima xinãmati misi pikĩ

⁴⁷ Deus kẽwaĩbũ dasibibũ hatukiri pe xinãkubainaibũ shaba tibi betsabũ Jesus ikũwaĩ yurã kaiã itxai hatuki dasiaibu Deusũ hawenabu hatu wakĩ kenakubainikiaki, habu hiwei mekekatsi ikaiburã.