Hebreus 9 - Kaxinawá Bíblia (BR)

Deus daewati pe beshmaskiri Deusũ Moisés yunua hatu amayunikiaki, na hãtxarã

¹ Haska inũ, Deusũ Moisés ha dukũ yubakĩ yunukinã, na mai anu ha hiwe merãshũ haska wakĩ Deus kẽwãkĩ daewakubaĩtirubu hatu amaniki, haska wakubiranibu inũ natiã nuku ashũmisburã.

² Hanu haki Deuski nukuti tari hiwe wanibukiri ana matu xinãmanũ nĩkakãwẽ. Ha dukũ tari hiwe nakẽtã tari pũtenibu anurã, hanu hawẽ mabu betsa ha dukũ taeaki, hawẽ txi ketĩ inũ haki misi mãtxĩti tapu meribi hanu misi mania Deus kuashũti hayaki, hawẽ kenarã: “Meribi dĩtuki”, anibukiaki.

³ Hanua ha katxu tariwẽ pakea betsa unuri ha shaba dĩtu betsarã, hawẽ kenarã: “Hanu Deuski nukuti meribihaira dĩtuki”, anibukiaki.

⁴ Ha dĩtu meranã, habianushũri hakishũ inĩti kuati ouro mane txi tapu fogão hayaniki. Ha inũ, hawẽ Deusũ yubani hãtxa aruti bau meribihaira ouro haswẽ dasibi bepukĩ keyua hayanikiaki. Ha merã ouro mane xumuki hanu tsua hiweabumanushũ Deusũ hatu inãkĩ hatu pimapauni maná duru inũ, Arãonẽ mestẽti dami hukuĩ huani hi inũ, mixki ture sapa dabeki Deusũ yunuti inũ hawẽ nemati 10 hãtxa keneni hati hayanikiaki.

⁵ Hanua hawẽ unãmati aruti bau mamaki Deusũ kuxipa unãmati nai tsuma itsa dami dabe besũ dabetã hawẽ peiwẽ hawẽ hatuwẽ nuiti bau beputi atximanibukiaki. Deus kẽwãti mabukiri hatis ẽ matu yusĩyuaii.

⁶ Hanushũ hawẽ Deus kẽwãti mabu haska pewatã Deus kẽwaĩ shaba tibi hanu dukũ meribi dĩtu besti anu Deusbe nukunabu hãtxashunikabu hikipaunibukiaki, kẽwãkĩ Deus yuinaka menushũkinã.

⁷ Hakia ha katxu meribihaira dĩtu anu ano tibi shaba bestitxaitiã bestiwai Deusbe nukunabu hãtxashunika shanẽ ibu binua besti hikikĩ ibubis kaneriamiswẽ taeshũ yuinaka himi bushũ hawẽ nuiti bau beputiki himi baxa baxa akĩ Deus daewayupaunibukiaki, hawẽ txakabu inũ hawenabũ txakabu Deus hakimawakĩ hau ana hatukiri haska xinãyamakubainunã.

⁸ Na haska wakubainiburã, natiã Deusũ Yushĩ Pepatũ ha haska wakubiranibu keska shabakãshũ kẽwãkubiranibu nuku unãmaikiki. Habiaskariai ha bai txibaĩ Deuski nukuti meribihaira anu tsua hikiama ipaunibuki, Jesus Cristõ nuku bepẽshũriamawẽ taearã.

⁹ Ha inũ, hanu Deuski nukuti tari hiwe anushũ hawẽ daewati beshũ inãbu hatu kuashũkĩ keyubiakẽ tsuã xinã pewakĩ keyuama ipaunibuki. Haska wakinã, hawẽ nũ unãtirubu apaunibuki.

¹⁰ Ha inũ, hawẽ yubati hãtxa bena Deusũ yuiriama haska wakĩ hau pishanũbũ inũ, haska wakĩ hau nushushanũbũ inũ, haskai pepai hau datxukishanũbũ yusĩkĩ hatũ yura bestikiri Deusũ hatu yununi hawẽ hatu merabewayuniki. Hakia natiã na habias hãtxa txibãkĩ tsuã ibubis hatũ xinã mekekĩ pewatirubumaki.

Deus daewati pehaira Cristo inikiaki, na hãtxarã

¹¹ Hakia Cristo na mai anu ma iwãniki. Eskatiã harã, nukũ Shanẽ Ibu Deusbe nuku hãtxashunika binuhaira haska Deusũ yuba bena nuku inãniwẽ nuku mekekubainikiki. Hanu Cristo hikinirã, na mai anushũ hunibũ hiwe wani keska anu hikiama hakia haskarara ma hari Deusũ pewashuni anu hikitã haria nuku Deusbe hãtxashuni hawa apaunibu keska wama hatu binua pehaira kaneisma nuku ishũkũkainikiki.

¹² Cristo ma nuku hikishũtanã, hatũ nuku yuinaka himiwẽ Deus daewashunũ ika ikama iniki. Hakia nukũ txakabuwẽ taea nuku mawashuni besti wai ana mawatimai hawẽ himi habakĩ hau Deusũ nukũ txakabu buashũtã nuku kupiyamashanũ Deus bebũ hikitã nuku daewashuniki, hawẽ hiwepaketi pe nuku washũkinã.

¹³ Txanima Deusbe nukunabu hãtxashunika dayakĩ ina awa bene inũ txashuwã himi baxa baxa akĩ inũ ina awa bake yushã menua hawẽ mapu ũpashki mutsashũ ha mapu pae watã hatuki baxa baxa ariakĩ tsuabũra txakabu waxina hawẽ txakabu tushkuakĩ ana hawenabubetã tari inũ bitxi hiwe inũ txipu Templo anushũ ana Deus kẽwãtiru wakĩ hatu pewakubaĩkanikiki, bemakis besti wakinã.

¹⁴ Haska wapaunibu pebia haska binumakĩ Cristõ hawẽ himi habanirã, kuxipa paehairaki. Haskakẽ Deusũ Yushĩ niti ismatũ merabewaya inãkuĩti hawa txakabu hayama keskakĩ Jesus Cristo ma ana bestẽkĩ Deus nuku daewashuniki. Mawai hawẽ himi habaniwẽ taea natiã nukũ xinã txakabũ nuku kanemakĩ hawẽ nuku tenãmis nuku buashũtã nukũ kupiti bitã hiwekuĩa nuku inãkĩ pewaniki, Hamebi Hiwemis Deus besti duawai ha dayashuni nũ hiweshũkubaĩshanũbunã.

Natiã Jesus Cristowẽ taea yuba bena nũ hayakiaki, na hãtxarã

¹⁵ Tsuabura Deusũ hatu katunibu habũ hiwekuĩa ikibi ika bishanaibu Deusũ hatu yubani haska Jesus Cristõ pewanũ ika dasibibu mawashũtã unuri Deuski inũ yurabuki hãtxashunikai dasitã, haskatã Deusũ yuba bena pewakĩ hawẽ taeshũ nukũ txakabu nuku buashuniki, ha dukũ yubani hãtxa txibãma nũ kanei nũ txakabukubaĩmisbu nuku pewairã.

^16-17 Haska inũ, hawẽ mabu pashkakĩ hawenabũ hau ibu washanũbũ yura mawariama ibubis hawenabuki tanakĩ hãtxawẽ kasmai kenewẽ amisbuki. Hakia ha mawariamakẽ hawẽ yubaka hãtxa txibãkĩ hawẽ mabu ibu watirubumaki. Hakia ma mawakẽ haska bebũkiri yubakaima ibu watirubuki. Haska keskai Jesus nuku mawashũtã ana besteniwẽ taea haska Deusũ nuku yubani nũ ma hayaki.

¹⁸ Ikũki. Deusũ ha dukũ yubanirã, yuinaka ina teseã himiwẽ hawẽ dukũ hatu unãmati taewamakĩ hatu yununiki.

¹⁹ Haska inũ, Deusũ yunuti hãtxa tibi inũ hawẽ nemati hãtxa tibi Moisés hawenabu dasibi yusĩshũ hatu keneshũtã, txipu txashuwã dani taxipa wa ni peiyabi tsumashũ ina awa bake himi inũ ũpash neshua pukutãtãkĩ Deusũ hãtxa una baxatã hawenabu baxa baxa akĩ

²⁰ hatu yuikĩ: “Matu yuinũ nĩkakãwẽ. Na hãtxa ẽ matu yuishuwẽ Deusũ matu ma yubashuki. Ha inũ, na himirã, hawẽ Deusũ matu yubashu xinãmati himiki”, atã

²¹ Moisés hatu haska watã habiaskari wakĩ meribi wakĩ hanu Deuski nukuti tari hiwe inũ haki Deus kẽwãti mabu dasibiki Moisés ina awa bake himi baxa baxa akĩ keyunikiaki.

²² Deusũ Moisés hawẽ hãtxa yununiwẽ taearã, mabu inũ tsuabura Deusuna wakĩ hatu meribi wakinã, himi habama hatũ txakabu buatiruma inikiaki. Hakia Deusunabu meribi hatu wakinã, hatũ txakabu buashũkĩ himi habai bestiwẽ atiwakĩ yununiki, Moisésnã.

²³ Haskawẽ taeshũ txanima himiuma tsua meribi itirumawẽ taeshũ yuinaka mirima detekubaĩpaunibuki, hatũ txakabu ana Deusũ xinãtima wamakinã. Hakia haska wakinã, haska txipu Jesus Cristõ nukũ txakabu nuku buashũshanai ha binumakĩ ha kayabima mawakĩ ha keska wakĩ akubainibuki.

Habũ ikũwãshanaibũ txakabu buanũ ika Cristo nuku mawashunikiaki, na hãtxarã

²⁴ Hanua hanu Deuski nukuti tari hiwe hunibũ na mai anushũ anibu anu Jesus Cristo hikiama, hakia nai anu hanu Deuski nukuti kayabi anu hikinishũ Deus bebunua natiã nuku hãtxashũkĩ Jesus Cristõ nuku ea ashuĩkiki.

²⁵ Ha inũ, Arãonẽ bababu Deusbe nukunabu hãtxashunika shanẽ ibu binua ano tibi dayairã, himi betsabu bui hikitã Deus inãkĩ Deus uĩmai hanu meribihaira anu hikipaunibu keskai Cristõ hawẽ himi bushũ inãkĩ baxa baxa akubaĩtima iniki.

²⁶ Cristo haskatianirã, mai damiwakĩ taewaitiã nukũ txakabu buanũ ika mawani nuku mawashũpakei heneama ikeanaii. Hakia bari hawẽ heneaitiã haska Epa Deus hakiri yubakani natiã hawẽ hãtxa txibãkĩ nukũ txakabu nuku buashuni mawakĩ hawẽ yura hawẽ ibu nuku inãshũkĩ nukũ txakabu buashunũ ika Cristo bestiwai tashnitã mawaniki.

²⁷ Yurabu dasibi besti wai mawamiskẽ hanushũ txipu Deusũ hatu unãti washanikiki.

²⁸ Ha inũ, Cristo haska keskariai hawẽ hiweawẽ besti wai mawariakĩ Deus nuku inãshũkĩ nũ habũ ikũwãshanaibũ itxapabũ txakabu nuku buashuniki. Txipu ana ha katxu Cristo huirã, ana txakabu pewatanũ ika huama hakia nũ habũ manaka bestiabu nuku pasha watã mekẽnũ ika ana hushanikiki.