Seanfhocal 12 - An Bíobla Naofa 1981

¹ An té a mbíonn cion aige ar an smacht, bíonn cion aige ar an eolas; an té ar fuath leis ceartú, is duine dúr é.

² Bíonn gnaoi an Tiarna ar an duine cóir, ach daorann sé fear na ndrochbheart.

³ Ní dhaingníonn an urchóid aon duine, ach ní bhogfar fréamh an fhíréin go brách.

⁴ Coróin a fir bean mhaith, ach is fochall ina chnámha bean gan náire.

⁵ Is ionraic iad smaointe an fhíréin; ach is fealltach iad comhairlí na n‑urchóideach.

⁶ Is gaistí le fuil a dhoirteadh iad briathra an urchóidigh; ach fuasclaíonn béal an fhíréin daoine ó bhaol.

⁷ Leagtar ar lár na hurchóidigh, agus sin deireadh leo; ach seasóidh teach an fhíréin go daingean.

⁸ Moltar duine ar fheabhas a chéille; ach bíonn dímheas ar fhear an droch-chroí.

⁹ Is fearr fear gan ghradam [a dhéanann a ghnó féin], ná fear le héirí in airde a bhíonn gan arán.

¹⁰ Tugann an fíréan aire dá chuid stoic, ach is cruálach í trocaire an urchóidigh.

¹¹ Beidh flúirse aráin ag an té a shaothraíonn a chuid talún; níl aon chiall ag an té a leanann beartais bhaotha.

¹² Scriostar túr daingean na n‑urchóideach, ach maireann fréamha na bhfíréan go daingean.

¹³ Trí choireanna a bhéil féin a ghabhtar an t‑urchóideach sa ghaiste; ach tagann an fíréan slán ón tubaiste.

¹⁴ Nuair a shásaítear fear le nithe fónta, sé toradh a bhriathar féin é; filleann toradh shaothar a lámh ar an duine féin.

¹⁵ I súile an amadáin is ceart é a chosán; éisteann an t‑eagnaí le dea-chomhairle.

¹⁶ Ní dhéanann an t‑amadán aon mhoill ach a fhearg a thaispeáint; ach ní thógann an duine ciallmhar ceann d'achasán.

¹⁷ An té a labhraíonn an fhírinne, tugann sé fianaise chóir; níl san fhinné bréagach ach calaois.

¹⁸ Tá duine ann ar geall le sá claímh a mhearbhriathra; ach bíonn cneasú á iompar ag teanga an eagnaí.

¹⁹ Maireann beola fírinneacha go brách; ach is gairid é saol na teanga bréagaí.

²⁰ Tá feall i gcroí lucht beartaithe oilc; ach tá lúcháir ag lucht síocháin a chur i gcrích.

²¹ Níl aon olc i ndán don fhíréan, ach bíonn trioblóidí sa mhullach ar na hurchóidigh.

²² Is fuath leis an Tiarna beola an éithigh; ach is gean leis lucht labhartha na fírinne.

²³ Coimeádann an duine tuisceanach a chuid eolais i bhfolach; ach fógraíonn croí na n‑amadán a mbaois.

²⁴ Údarás is dual don láimh bhríomhar; ach saothar éigeantach is dual don leisciúil.

²⁵ Cuireann an imní ualach ar chroí an duine; ach cuireann an dea-fhocal áthas air.

²⁶ Tugann an fíréan cúl leis an urchóid; ach treoraíonn cosán na n‑urchóideach iadsan amú.

²⁷ Ní bheidh aon ní don phota ag an bhfear díomhaoin; ach beidh saibhreas luachmhar ag an bhfear dícheallach.

²⁸ Lonnaíonn an bheatha ar chosán na córa; ach treoraíonn slí na hearráide chun an bháis.