ВЫСЛОЎІ 15 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ВЫСЛОЎІ 15

¹ Мяккі адказ уціхамірвае гнеў, а жорсткая размова выклікае лютасць.

² Язык мудрых лье веды, вусны бязглуздых выкрыкваюць бязглуздасць.

³ Ва ўсялякім месцы вочы Госпада. Яны бачаць ліхіх і добрых.

⁴ Язык лагодны — дрэва жыцця, а двухсэнсавасць на ім зняважыць дух.

⁵ Бязглузды кпіць з настаўлення бацькі свайго, а хто беражэ папрокі — будзе разумнейшы.

⁶ У доме справядлівага вельмі многа багацця, а ў набытках бязбожніка — хваляванне.

⁷ Вусны мудрых распаўсюдзяць веды; сэрца бязглуздых — не будзе вернае.

⁸ Ахвяры бязбожнікаў — агідныя для Госпада; абяцанні справядлівых — мілыя Яму.

⁹ Агіднасць для Госпада — дарога бязбожніка; хто ідзе ўслед за справядлівасцю — будзе любімы Ім.

¹⁰ Лютая кара таму, хто пагарджае вернай дарогай; хто ненавідзіць папрокі — памрэ.

¹¹ Пекла і пагібель — перад вачамі Госпада, а тым больш — сэрцы сыноў чалавечых!

¹² Насмешнік не любіць таго, хто яго абвінавачвае, і да людзей мудрых не ходзіць.

¹³ Сэрца радаснае весяліць твар, у смутку душы дух падае.

¹⁴ Сэрца разумнага шукае ведаў, а вусны бязглуздых жывяцца бязглуздасцю.

¹⁵ Усе дні ў бедных — ліхія, а вясёлы ў сэрцы — быццам заўсёды на застоллі.

¹⁶ Лепш трохі са страхам Госпада, чым вялікія скарбы — з трывогай.

¹⁷ Лепш мера гародніны з любоўю, чым адкормленае цяля — з нянавісцю.

¹⁸ Чалавек запальчывы выклікае сваркі; а той, хто з’яўляецца цярплівым, уціхамірвае спрэчкі.

¹⁹ Дарога гультаёў быццам агароджа цярновая, дарога разважлівых — гладкая.

²⁰ Мудры сын радуе бацьку; а бязглузды чалавек адцураецца маці сваёй.

²¹ Бязглуздасць — радасць для таго, хто не мае розуму; а чалавек разважлівы накіроўвае прама крокі свае.

²² Дзе няма парады — разбягаюцца намеры, а здзяйсняюцца — дзе многа дарадчыкаў.

²³ Весяліцца чалавек з адказу вуснаў сваіх, і спрыяльная размова — найлепшая.

²⁴ Сцежка жыцця вядзе ўгару для чалавека вучонага, каб ухіліцца ад пекла ўнізе.

²⁵ Госпад разбурыць дом пыхлівых, а межы ўдавы ўмацуе.

²⁶ Агіднасць для Госпада — намеры ліхія, а чыстая размова — найпрыгажэйшая.

²⁷ Развальвае дом свой той, хто прыслужвае прагнасці, а хто ненавідзіць падарункі — жыць будзе.

²⁸ Розум справядлівага абдумвае, што адказаць; вусны бязбожнікаў зласловяць.

²⁹ Ад бязбожнікаў Госпад далёка, а размовы справядлівых Ён выслухае.

³⁰ Святло вачэй радуе душу, добрая слава ўдобрывае косці.

³¹ Вуха, якое слухае папрокі жыцця, застанецца сярод мудрых.

³² Хто адкідае настаўленне — адцураецца душы сваёй; а хто слухае папрокі — уладар сэрца [свайго].

³³ Страх Госпадаў — настаўленне мудрасці, а славе папярэднічае пакора.