МАЦЬВЕЯ 5 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
МАЦЬВЕЯ 5

¹ І, бачачы натоўпы, Ён узышоў на гару; і, калі сеў, падышлі да Яго вучні Яго;

² і, адкрыўшы вусны Свае, стаў іх навучаць, кажучы:

³ «Шчасныя ўбогія духам, бо іх Валадарства Нябеснае.

⁴ Шчасныя тыя, што плачуць, бо яны суцешацца.

⁵ Шчасныя пакорлівыя, бо яны завалодаюць зямлёю.

⁶ Шчасныя тыя, што прагнуць і смагнуць справядлівасці, бо яны насыцяцца.

⁷ Шчасныя міласэрныя, бо яны атрымаюць міласэрнасць.

⁸ Шчасныя чыстыя сэрцам, бо яны Бога ўбачаць.

⁹ Шчасныя міратворцы, бо іх назавуць сынамі Божымі.

¹⁰ Шчасныя, што пераслед церпяць дзеля справядлівасці, бо іх Валадарства Нябеснае.

¹¹ Шчасныя вы, калі дзеля Мяне вас будуць зневажаць, і пераследаваць, і ўсякае ліха гаварыць будуць супраць вас, узводзячы паклёп.

¹² Радуйцеся і весяліцеся, бо ўзнагарода ваша шчодрая ў небе; так, вось, пераследавалі прарокаў, якія да вас жылі.

¹³ Вы – соль зямлі. А калі соль страціць сілу, то чым пасоліцца? Яна ўжо ні на што больш не прыдатная, як толькі быць выкінутай на двор, каб яе людзі патапталі.

¹⁴ Вы – святло свету. Не можа схавацца горад, што размешчаны на версе гары.

¹⁵ Таксама не запальваюць свечкі і не ставяць яе пад пасудзіну, але ставяць на падсвечніку, каб свяціла ўсім, хто ёсць у доме.

¹⁶ Так хай свеціць святло ваша на віду ў людзей, каб яны бачылі вашы добрыя ўчынкі ды хвалілі Айца вашага, Які ў небе.

¹⁷ Не думайце, што Я прыйшоў парушыць закон і прарокаў. Я прыйшоў не парушыць, але выканаць.

¹⁸ Бо сапраўды кажу вам: пакуль неба і зямля не прамінуць, ані адна ёта, ані адна рыска не зменіцца ў законе, аж пакуль усё не збудзецца.

¹⁹ Хто парушыць адно з гэтых прыказанняў найменшых і навучыць так людзей, таго назавуць найменшым у Валадарстве Нябесным. А хто выканае і навучыць, таго назавуць вялікім у Валадарстве Нябесным.

²⁰ Бо кажу вам: калі ваша справядлівасць не будзе большай, чым у кніжнікаў і ў фарысеяў, не ўвойдзеце вы ў Валадарства Нябеснае.

²¹ Чулі, што сказана было продкам: “Не забівай”, а хто заб’е, будзе асуджаны.

²² А Я вам кажу, што той, хто дарэмна гневаецца на брата свайго, будзе асуджаны; а хто скажа брату свайму: “рака”, – будзе асуджаны радай, а хто скажа: “дурны”, – будзе асуджаны агнём пякельным.

²³ І таму, калі панясеш ахвяру сваю на ахвярнік, а там прыпомніш, што брат твой мае нешта супраць цябе,

²⁴ дык пакінь ахвяру тваю каля ахвярніка, і ідзі перш пагадзіся з братам тваім, і тады, прыйшоўшы, прынясеш ахвяру тваю.

²⁵ Пагадзіся з супраціўнікам тваім хутчэй, пакуль ты з ім у дарозе, каб выпадкам не аддаў цябе супраціўнік суддзі, а суддзя не аддаў цябе слузе, і каб не быў ты кінуты ў вязніцу.

²⁶ Сапраўды кажу табе: не выйдзеш адтуль, пакуль не аддасі апошняга квадранта.

²⁷ Чулі, што сказана: “Не чужалож”?

²⁸ А Я вам кажу, што кожны, хто глядзіць на жанчыну, прагнучы яе, ужо яе зчужаложыў у сэрцы сваім.

²⁹ Бо калі тваё правае вока горшыць цябе, вырві яго ды адкінь ад сябе; бо лепш табе, каб згінуў адзін з членаў тваіх, чымся ўсё цела тваё сышло б у пекла.

³⁰ І калі правая твая рука горшыць цябе, адрэж яе ды адкінь ад сябе; бо лепш табе, каб згінуў адзін з членаў тваіх, чымся ўсё цела тваё сышло б у пекла.

³¹ Сказана таксама: “Хто пакіне жонку сваю, хай дасць ёй разводны ліст”.

³² А Я кажу вам: кожны, хто пакідае жонку сваю, акрамя як з прычыны яе распусты, выстаўляе яе на чужаложства. І той, хто жэніцца з ёю, чужаложыць.

³³ Чулі яшчэ аб тым, што было сказана продкам: “Не парушай прысягі, але выконвай сваю прысягу перад Госпадам”.

³⁴ А Я кажу вам, каб вы зусім не прысягалі, ані небам, бо яно ёсць пасад Божы,

³⁵ ані зямлёю, бо яна – падножжа ног Яго; ані Ерузалімам, бо ён – горад вялікага Валадара.

³⁶ Ані таксама сваёй галавой не прысягай, бо ты не можаш аніводнага воласа зрабіць белым або чорным.

³⁷ Хай жа тады слова ваша будзе: “так – так”, “не – не”. А што звыш таго, гэта ад ліхога.

³⁸ Чулі вы, што сказана было: “Вока за вока, зуб за зуб?”

³⁹ А Я кажу вам: не праціўцеся злому; а калі б хто ўдарыў цябе ў правую шчаку тваю, настаў яму і другую.

⁴⁰ І таму, хто хоча з табой судзіцца і кашулю тваю ўзяць, аддай яму і плашч.

⁴¹ І калі б хто цябе змушаў ісці з ім мілю, ідзі з ім дзве.

⁴² Дай таму, хто просіць у цябе; і не ўхіляйся ад таго, хто жадае ў цябе пазычыць.

⁴³ Чулі вы, што сказана было: “Любі блізкага свайго і ненавідзь ворага твайго”.

⁴⁴ А Я кажу вам: любіце ворагаў сваіх дабраслаўляйце тых, хто праклінае вас, дабро рабіце тым, што ненавідзяць вас, і маліцеся за тых, якія крыўдзяць і гоняць вас,

⁴⁵ каб сталіся вы сынамі Айца вашага, Які ёсць у небе, бо Ён чыніць, каб сонца Яго ўзыходзіла над добрымі і ліхімі, і дождж пралівае над справядлівымі і несправядлівымі.

⁴⁶ Калі ж вы любіце тых, што вас любяць, дык што за ўзнагароду будзеце мець? Ці ж і мытнікі не робяць таго?

⁴⁷ Або калі вітаеце толькі братоў вашых, дык што асаблівага робіце? Ці ж гэтак і пагане не робяць?

⁴⁸ Дык будзьце ж вы дасканалыя, як і Айцец ваш, Які ёсць у небе, дасканалы.