Kasta
147 Diosan Apnaqäwipat parlir Biblian jiskʼa tʼaqanakapa
Ay, jake. ¿Qhitiraquït jumasti Diosamp jaychasiñataquisti? ¿Mä ñek'e phuqhojj jupar luririrojj saspati: “¿Cunats uqham lurista?” sasa. Ñek'e phuqhu lurirejj munañaniwa cunjämaru lurañataquisa. Uca pachpa ñek'etwa mä phuqhu luraspa suma asquitaqui, yakha phuqhsti alek apnakañataquiquiraqui.
Tatitojj alajjpachan reyi konuñap utt'ayasi, ch'aman cancañapajj alajjpach acapach apnake.
Jupa nayrakatanjja janiw cunäquisa take acapachanquiri jakenacajja; jupaw munañaparjama luraraqui, alajjpachansa uqhamaraqui acapachansa. Janiw qhitis ch'amapa toke sayt'asirejj utjquiti, ni jisct'caraquispasa cunatsa uqham luri sasajja.’
Diosan utjäwipajj cunatejj aca orakerojj imjjatqui ucanquiwa, jakenacarusti t'ijut'ijunacäcaspas uqhamwa uñjaraqui. Jupasti alajjpachjja mä carpäcaspas uqhamwa janatati, mä guerran nuwasiñ carpäcaspas uqhamwa janatati.
Tatitojj take cuntejj munqui uc luri: alajjpachansa, acapachansa, lamar kotansa, jach'a kota mankhansa.
Cristompïtas laycuwa Diosajj nayratpacha ajlliwayistu, cuntejj jupajj jiwasanacar churañapäcän uc catokañasataqui. Take acanacasti Diosan amtäwiparjamawa, cawquïritejj take cuns lurqui cunatejj jupataquejj asquïqui uqhamarjama.
¡Jumanquiwa, Tata, jach'a cancañamasa, ch'amamasa, jach'ar aptatäñamasa, apnakañasa, jach'a reyi cancañamasa! Cunatejj alajjpachansa, aca orakensa utjqui ucanacajja jumanquiwa. Jumancaraquiwa apnakañamasa, jumajj Tata takenjjarusa jilïrïtam laycu. Jumataracwa jutaraqui kamir cancañasa, jach'äñasa. Jumaw take cunsa apnakascta. Ch'amasa, munañanïña cancañasa amparamanquiwa, ucatsti juman amparamancaraquiwa takeniru churañataqui kamir cancaña, uqhamarac munañanïñasa.
Take cunasa Diosat juti, jupan lurataraquiwa, jupataquiraquiwa. Uqhamajj Diosajj wiñayataqui jach'achatäpan. Uqhamäpan.”
Nayratpach nayaquipunïtwa Diosajj. Janiw qhitis ch'amajjatjja khespiycaspati. Cuntejj nayajj lurcta ucsa janiw qhitis t'unjcaspati.”
¿Cawquincäyätas jumajja cunapachatejj nayajj aca orake utt'aycäyät ucapachajja? ¡Jumatejj chekpacha suma yatsta ucapachajj uca jisct'aru arusjjatita!
Jupa tokeracwa Diosajj luri take cunatejj alajjpachansa acapachansa utjqui ucanacjja, jan uñjatäqui ucsa, uñjatäqui ucsa. Take ajayunacan ch'amanïtapsa, munañan apnakerïtapsa, jupa tokew luri, jupataquiraqui. Janïr cunas utjcän ucqhatpachwa Cristojj utji, jupïpanaracwa take cunas chekaparu utjascaraqui.
Takpach orakejj Tatitunquiwa, ucan utjirinacas jupanquiwa, takpach jaquirinacas jupancaraquiwa.
Nayan amtatanacajjasti janiw jumanacan amtatanacamjamäquiti, luräwinacajjas janiraquiw jumanacan luräwinacamjamäquiti.” Tatituw uqhamjja arsu. “Cunjämatejj alajjpachajj acapachat wali altonquejja, uqhamaraquiw amtatanacajjasa, luräwinacajjasa, jumanacan amtatanacamatsa, luräwinacamat sipansa wali altoraquiwa.” Tatituw ucjja arsu.
“¿Janit pä jamach'is juc'a kollker aljasquejja? Ucampis janiw maynisa aca orakerojj liwektquiti jan Diosan munañapatjja. Felipe, Bartolomé, Tomás, Mateo impuesto cobriri; Jacobo Alfeon yokapa; Tadeo, yakha sutipasti Lebeo sataraqui; Ucampis jumanacatjja take ñic'utanacamasa mayat mayat suma jact'atawa. Uqhamasti jan ajjsarapjjamti, jumanacajj uca jisc'a jamach'inacat sipanjja wali jila alanïpjjtawa.
Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.
Nayaw jumarojj k'oma tucuysma, janiw kollkempjamati, jan ucasti t'akhesiña horno tokew k'omachsma. Nayan jach'añchäwejj laycu, jach'añchäwejj laycuw uqham lurta, sutejjasti janiw taquisitäcaspati. Janiraquiw nayar churañäqui ucjja yakharu churaycäti.
Jupawa Diosan jach'a c'ajquir khanapajja, juparaquiw cunäquitejj Diosajj uc uñacht'ayirejja, juparaquiw ch'aman arupampejj take cuns catjjäsi. Juchanacasat k'omachasinjja, alajjpachanjja Diosan tronopan cupëjjaparuw kont'asi.
Jakejj chuymapanjja sarnakañapatwa lup'isqui, ucampis sarnakäwipjja Tatituw irpasqui.
Jupaw alajjpacharojj kenayanacamp phokhanti, oraketac jallu waquichi, ch'umi mankhanacan koranac ch'ojjñaptayi. Jupaw uywanacarojj mank'añ churi, juparaquiw allkamarin chhiwlinacaparojj wararipqui ucapachajj mank'añ churi.
Diosan arsutap ist'ta, jupan arsut arup yatta: “Diosajj ch'amaniwa, ch'amasa, munasiñas jupanquiwa, jupaw sapa maynirojj lurataparjam wajjt'i” sasa.
Jichhajj Diosajj jach'añchatäpan, jupajj ch'amaniwa cuntejj mayctan, lup'caractan ucanacata juc'ampi lurañataqui, ch'amap toke jiwasanac taypina luratapata.
Amuyapjjaraquim, jumanacan Tatitu Diosamanquiw alajjpachasa, alajjpachan alajjpachapasa, uqhamaraqui acapachan orakenacasa, take cunatï ucan utjqui ucanacasa.
Tatitusti siwa: “Alajjpachajj nayan konuñajjawa, orakesti cayunacajjan tact'asiñaparaquiwa. ¿Cawquirurac mä uta utacharapipjjetasma? ¿Cawquirurac samart'añataqui lurarapipjjetasma?
Tatitojj reyiwa, reyi isimp isintatawa, Tatitojj ch'aman cancañamp isthapitawa: Jupaw acapach sum thurt'ayi, jan onjjtquir utt'ayaraqui.
Reyin amtatanacapajj Tatitun amparapanquiwa; Tatituraquiwa sarayasqui, cunjämatï jawiranacajj sarasqui uqhama.
Ucampis alajjpachan jaquir Tatitojj larusiwa, jupanacat sawcasiwa, k'apisiñampiw mulljanti, tipusiñampiw saraqui: “Naya pachpaw reyijjarojj ajllista, Sión, kollan kollojj patjjaruw utt'ayta” sasa.
¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?
Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana.
Jupajj janiw marca apnakerinacata arjjatasquiti, janiraquiw kamirinacarusa juc'ampi pobrenacat sipansa munasquiti, jupajjaya take jakerusa uscusiracchejja.
Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.
¡Tatitojj jach'ar aptatäpan! Tatiturojj alajjpachatpach jach'añchapjjpan, Tatiturojj alajjatpach yupaychapjjpan. animalanaca, uta uywanaca, orakenjam jisqhanaktir animalanaca, thoknaquir jamach'inaca. Tatitur jach'añchapjjam, acapachanquir reyinaca, takpach jilïrinaca, acapach apnakerinaca. Tatitur jach'añchapjjam; chachanaca, warminaca, waynanaca, ch'ama karitanaca, wawanaca. Tatitun sutip jach'ar aptapjjam, sutipaquiw muspharcañajja. Jach'a cancañapajj alajjpachats orakets jilanquiwa. ¡Jupaw marcaparojj ch'amañchi! ¡Jupaw iyawsirinacapar jach'ar aptayirejja, ajllit Israel marcapar jach'añchirejja! ¡Tatitojj jach'añchatäpan! Tatitun angelanacapa, jupar jach'añchapjjam, takpach tamanacapa, Tatitur jach'añchapjjam. Inti, phajjsi, c'ajquir warawaranaca, Tatitur jach'añchapjjam. Alajjpacha, Tatitur jach'añcham, alajjpachanquir umanaca, Tatitur jach'añchapjjam. Tatitun sutip jach'ar aptapjjam, arupamp arsusaquiw take cun utjayäna;
Nayasti yatiractwa cuna amtäwinacatejj jumanacataqui utjquitu ucanacjja, uca amtäwinacasti jumanacan asquinacamataquiwa, janiw jumanacan jan walt'apjjañanacamataquïquiti, uqhamat khepa urunacanjja wali suma jacasipjjañanacamataqui, suyt'añanacansa phokhantataraqui. Naya Tatituw ucjja arsta.
Cunapachatejj juman lurat alajjpach uñatatcta, juman uchat phajjsimpiru, warawaranacampir uñtcta ucapachajj sistwa: “¿Cunarac jakesti, jupat amtasiñamataquisti? ¿cunarac jiwir jakesti ch'am churañamataquisti?”
Nayaw khansa ch'amacsa uscta, sumancañsa, chijinacsa nayaw apayanta. Naya, Tatituw take ucanac lurta.
Alajjpachajj Diosan khapak cancañap yatiyi, alajjpachajj amparanacapan luratap khanañchi.
take luratanacam apnakañapataquiw catuytajja, take cun uñjañapataquiw catjjaruyaractajja:
“Take ch'amani, Israelan Diosapa, juman tronomajj querubines sat angelanac patanquiwa, acapachanjja take reyinacjjarus juma sapaquïtawa, jumaw alajjpachsa acapachsa usctajja.
Munañamampisti apnakapjjeta. Munañamasti luratäpan acapachanjja, cunjämatï alajjpachana luratäqui uqhama.
Jacapctansa, Tatitutaquiw jacapjjtanjja; jiwjjañän ucqhatsti Tatitutaquiraquiw jiwjjañäni. Uqhamasti jiwañansa jacañansa Tatitutaquïtanwa.
Ucampis jichhajj Israel, Jacobon marcapa, jumar uywiri Tatitojj sistamwa: “Jan ajjsaramti, nayaw khespiysma, nayaw sutimat jawssma, jumajj nayanctawa. Tatitusti siwa: “Jumanacäpjjtaw nayan khanañchirinacajjajja, nayan ajllit sirvirinacajja, nayaw jumanacar ajllisipjjsma nayar uñt'apjjañamataqui, alcatapjjañamataquiraqui, uqhamat amuyapjjañamataqui qhitïctejj nayajj uca. Nayat nayrajj janiw qhiti diosas utjcänti, acat kheparus janipuniw utjcaniti. Naya sapaquïtwa Tatitojja, nayat yakhasti janiw khespiycaspati.” Tatitusti siwa: “Nayaw yatiyta, art'aracta, nayaw khespiyaracta; janiw mä jan uñt'at diosati khespiyqui, jumanacasti uca toketjja khanañchirejjäpjjtawa. Nayratpach nayaquipunïtwa Diosajj. Janiw qhitis ch'amajjatjja khespiycaspati. Cuntejj nayajj lurcta ucsa janiw qhitis t'unjcaspati.” Tatitojj, Israelan Kollan Diosapajja, qhititejj jumanacar khespiyapctam ucajja, siwa: “Jumanacar khespiyañataquejj Babiloniarojj jakenac qhitanï, take puncunac jist'arayaraquï, caldeo jakenacan cusisiñanacapasti t'akhesiñaruw tucuni. Nayätwa Tatitojja, Israelar acapachar uscurejja, Kollan Dios, jumanacan reyima.” Tatitusti mä thaqui jist'araraqui jach'a kokanjama, mä jisc'a thaqui jist'ari walja khothutiri umanac taypina; mä ch'amani ejercitoruw mistsuyani, carronacapampi, caballonacapampi t'unjayañataqui. Liwinucutaw uñjasipjje, ucampis janiw sayt'asipcaniti; jiwt'ir mechar uñtataw tucusiwayjjapjje. Jichhasti Tatitojj marcaparojj siwa: “Cunatejj wasüru pascän ucjja jan amtcjjamti, janirac juc'ampi cunanacatejj pascän ucanacs amtcjjamti. Nayaw jichhajj take cunsa machak lurä, ucsti jichpacharaquiw uñjäta. Wasaran thaquinacwa jist'arä, jan achuri orakensti jawiranacwa jist'araraquï. Umanjam maqhatañamächejja, nayaw jumampïscäjja, jawiranac maqhatañamächejja, janiw jalantasin jiwcätati; ninanjam pasañamächejja, janiw naqhantcätati, ninas janiw jumanjja naccaniti.
Jakenacajja suertenacwa apsuyasipjje, ucampis Tatituw phokhayi munañaparjama cunjamäñapataquisa.
¿Cunataraqui Diosampi colerastasti? ¿Arsusitanacamaru jan jaysatapatti uqham parlta? Diosajj cunaymanitwa jiwasarojj parlistu, ucampisa janiw amuyasctanti.
Uqhamaracwa Tatitojj take amtäwinacapjja luri. Jupajj muspharcaña amtäwinacaniwa, ucatsti wali amuyt'ampiraquiw uca amtäwinacapjja phokhe.
Cunapachatejj tiempopajj purcani ucqhajja, Diosajj take acanacjja luraniwa, jupa sapaqui take ch'amani Diosajja, reyinacana Reyipa, tatitunacans Tatitupa.
Naya sapaquïtwa Diosajja. Janiw yakha diosanacajj nayat sipan utjquiti. Nayaw jacañ churta, uqhamaraqui apakaractsa, nayaw usuchjaracta, uqhamaraqui kollaractsa. ¡Janiraquiw qhitis ch'amajjat khespiyirejj utjquiti!
Ucampisa, ¿hachasti, qhititejj apnakqui ucat sipan juc'ampïspati? ¿Serruchosa qhititejj apnakqui ucat sipansa juc'ampïspati? ¡Cunjämaquitejj thujrojj alek mä lawaqui, jupas jakerojj ucsaru acsaru apcaspa uqhama!
Uqhamajj janiw munirincquiti, ni ch'am tucuñanccaraquisa, jan ucasti Diosan qhuyapayasiñapatwa waquisi.
Tatitojj ñankha lurir marcanacan amtatanacap t'unji, Tatitur jan iyawsir jakenacan amtatanacap aynacht'ayaraqui. Tatitun amtäwinacapasti wiñayataquiwa, amtatanacapajj take pachanacan sayt'i.
Jesusasti jupanacar jac'achasisinjja siwa: “Nayar churatawa take munañanïñajja alajjpachansa, acapachansa.
Tatay, nayajj uywatamätwa, jumar loktirïtwa, uywataman wawapätwa: jumaw ñach'antatanacajj t'akanuctajja.
“Cunapachatejj jupajj cuna lurañsa amtasi ucapachasti uca amtatapjja phokhapuniwa; janiw cunasa juparojj yakha amtayquiti. Cuntejj jupajj nayampi lurañ amtqui ucsti lurapuniniwa, yakha ucar uñtasita yänacampi chica.
Tatitojj ch'amapampiw purini, take cunsa ch'amampiraquiw apnakani. Marcaparusti apanjjaraquiniwa, khespiyanjjasinjja. Cunjämatejj mä awatirejj ovejanacap ant'ata jutejja, uqhamaraquiw jupajj juti, amparapar ovejanac icht'ata, ichjjarusiwa ovejanacaparojja, uqha wawachat ovej kallunacarusti sum uñjaraqui.
Tatitun muspharcayätap yatta, jupajj take diosanacat sipan ch'amaniwa. Tatitojj take cuntejj munqui uc luri: alajjpachansa, acapachansa, lamar kotansa, jach'a kota mankhansa.
Janïr cunas utjcän ucqhatpachwa Cristojj utji, jupïpanaracwa take cunas chekaparu utjascaraqui.
“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.
Khapak marcamajj wiñay khapak marcawa, khapak apnakäwimajj wiñay apnakäwiraquiwa. Tatitojj arsutanacap phokheriwa, take luräwinacapan munasiñaniwa.
Cunjämatejj oraketjja alinacajj sartanejja, mä pankar yapun ayrunacajj ch'ichtanejja, uqhamracwa Tatitojj atipjañapjja sartayani, take marcanacasti yupaychaña k'ochunac k'ochupjjani.”
Cunayman toket lurañanacajj utjaraqui, ucampis mä sapa Diosaquiw take cuns jakenacampejj luri.
Tatitun arsutanacapajj chekapawa, jaken chuymapar machakaptayiriwa; Tatitun arunacapajj asquiwa, jan yatiñan jaker yatiñan tucuyiriwa; Tatitun camächit arunacapajj chekapawa, chuymar cusisiyiriwa; Tatitun arsutanacapajj k'omawa, nayranacar khan chuririwa. Tatitur ajjsartañajj k'omawa, wiñayatac utt'atawa; Tatitun arsutanacapajj chekawa, takpach ucanacajj asquiraquiwa;
“Qhititejj ist'quitu ucat cuntejj siscta uc luraraquejja, ucajj mä suma amuyun jakempi sasiwa, utapsa mä karka pataru lurascaspa uqhama. Jallu purintatapatsti jawiranacaw wal sarti, ucamp chicasti waliraquiw thayajj thayt'ani uca utarojja, ucampis janiw tincuyquiti karka patancatap laycojja.
¡Cunja sumas Diosan yatiñ cancañapajja, munañapasa, amuyt'apasa! Janiw jupan amtäwinacapjja khanañchcsnati, ni jupan thaquipsa amuyt'caracsnati. “Uqhamajj, ¿qhitirac Diosan amuyañapsti amuyt'isti? Jan ucajj, ¿qhitich jupar yatichi? Jan ucajj, ¿qhitich Tatitur nayrakat churi ucat pago catokañataqui? Take cunasa Diosat juti, jupan lurataraquiwa, jupataquiraquiwa. Uqhamajj Diosajj wiñayataqui jach'achatäpan. Uqhamäpan.”
Tatitojj wiñayapuniw reyit kont'asi, ¡Diosar jan uñt'irinacasti orakepat jakonucutäniwa!
Tatitojj take marcanacan uñjcataw jach'a ch'amap uñacht'ayi. Take aca orakpacharaquiw yatini, jiwasan Diosasajj khespiyquistu ucjja.
Ucatwa Diosajj arsutapjja juramentompi juc'ampi khanstayäna, khanpachracwa uñacht'ayañ munäna, qhitinacatejj herencia catokañanacapäcäna ucanacarojja, jupasti janc'aquïnwa arsutap jan trocasa phokjjañataquejja. Uqhamasti pä luräwiw jan trocasir utji, ucanacatjja Diosajj janiw c'ariscaspati; ucampejj Diosajj mä jan tucusquir chuymachäwi churistu, qhitinacatejj jupan imantasiñ thakapctan, uqhamarac catuyasiractan uca suyt'äwi churquistu ucana.
Tatitojj take chekanquiwa; jupajj uñch'uquisquiwa asqui jakenacaru, uqhamarac ñankha jakenacarusa.
Tatitun ch'amapajj janiw tucusquiti, jan khespiyañatacjamajja, janiraquiw jupajj okaras tuccaraquiti, jan ist'irjamajja.
Diosan jan uñjcay yänacapajj jupan luratanacap tokew uñacht'ayasi. Khanpachwa uñacht'ayasi cunapachatejj aca orakejj luratäcäns ucürutpacha jupajj Diosätapa, ch'amapajj jan tucusquiriraquïtapa. Ucatpï jakenacajj jan cunjämats jupat jaltapcaspatejja.
Nayranacajjampiw kollunac uñatatta: “¿cawquitarac yanapast nayatac jutani?” sasa. Yanapajj Tatitut nayatac jutani, alajjpach acapach lurir Tatituta.
kollan sutipajj wiñayatac jach'añchatäpan, khapak cancañapasti oraker phokhantpan. ¡Uqhamäpan!
Nayajj jumarojj irpascapunïmawa, wasaransti mank'añjja jilarquir churaraquïma, janchimarusti ch'amañcharaquïmawa, mä suma karpata pankar yapjamaw tucuraquïta, mä uma jalsur uñtataw tucüta, umamasti janiw tucuscaraquiniti.
Diosaw jaken sarnakäwipjja uñji, take sarnakäwipwa yatiraqui. Janiwa juc'ampi ch'iyara ch'amacajj ñankha jaker imantañataquejj utjquiti.
Jakejj chuymapanjja cunanac lurañataquis amtaquiwa, ucampis Tatituw munañani uca amtäwiru phokhasiñapataquisa jan phokhasiñapataquisa.
“Jacobon wawanacapa, ist'apjjeta, take qhitinacatejj Israel marcat jilt'apcta ucanaca. Janïraw jumanacajj nacipctati ucqhatpachwa k'epnakapjjsma, amparajjaruw ichusipjjsma. Chuymani jakenacäjjapjjät ucqhajj nayajj pachpaquïscäwa; kaka p'ekëjjapjjät ucqhasa uñjasipcaquïmawa. Nayaw jumanacarojj uscusipjjsma, nayaraquiw uñjasipcäma, nayaw uywasipcäma, khespiyapjjaraquïma.
¡Jumanquiwa, Tata, jach'a cancañamasa, ch'amamasa, jach'ar aptatäñamasa, apnakañasa, jach'a reyi cancañamasa! Cunatejj alajjpachansa, aca orakensa utjqui ucanacajja jumanquiwa. Jumancaraquiwa apnakañamasa, jumajj Tata takenjjarusa jilïrïtam laycu.
Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.
ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.
Tatituw nayarojj asquinacamp phokhantitani: Tatay, qhuyapayasiñamajj wiñayawa, amparamamp luratanacarojj janiquiy armanucumti.
Amstarojj saraquïwa: ‘Cuttayanjjam’ sasa, aynacharusti saraquïwa: ‘Jan jupanacampi kheparamti. Wawanacajjarojj cuttayanirapjjeta jayatpacha, orake tucusitpacha,
¡Tatitojj jach'a ch'amaniwa! Diosasajj jach'añchatäñataquejj asquiwa, kollan marcapansa, kollan kollupansa. Diosay, takpach oraken sutimajj jach'añchatawa, aytat cancañamajj orak tucuscamaw puri; ch'amamajj asqui cancañamp phokt'atawa. ¡Sión kollojj cusispan! Chekap arsutanacamampejj Judá orakenquir marcanacajj cusisipjjpan. Sión koll muytapjjpan, torrenacap jact'apjjpan, perkanacap amuyapjjpan, suma utanacap uñaquipapjjpan: jutir mita jakenacar yatiyañataqui: “Acapï Tatit Diosasajja” sasa. Jupaw wiñay irpirisajja. Kollan kollun amstapajj muncayawa, take acapachan cusisiñapawa: Sión kollojj alajjpachan thiyapawa, jach'a ch'aman reyin marcapawa.
Yatiractanwa Tatitun satapa: “Nayaruw wact'itu mutuyañajja, nayaw jupanacaru cutt'ayascäjja.” Ucatjj saraquiwa: “Tatituw marcaparu juchañchascani” sasa.
Tatitojj yatiñan jakeruw sum uñjasa imasqui, ucampis khanstayiwa c'ari jakenacan parlatanacapjja.
Uqhamatwa jumanacajj alajjpachanquir Awquiman wawanacapäpjjätajja. Jupasti takenitaquiw intsa jalsuyani, uqhamarac asqui jakenacataquisa, jan asqui jakenacataquisa jallsa puriyaniraqui.
Ajayojjarojj jiwañat wayoketu, nayranacajjar jachañat apake, cayunacajjar tincuñat sayt'ayi. Tatitun nayrakatapan sarnakä, wiñay jacañ oraken jacä.
Wali suyt'añampiwa take acapachajj suyt'asqui cunürutejj Diosajj khespiyat jakenaca uñstaycani uca. Ajayun jacañanjja, Cristo Jesús tokew nayarojj juchan munañaparjam sarnakañatjja khespiyitu, uqhamarac jiwañatsa. Acapachasti juchañchatawa, ucasti janiwa jupan sapa munañap laycuti, jan ucasti Diosaw uqhamäñapataqui waquichawayatayna. Ucampis uca suyt'añajj utjapunïnwa, aca orakejj librëjjañapataqui tucusiña esclavöñata, Diosan wawanacapan khespiyat jacäwipana.
Alajjpachas acapachas jumanquiwa, jumaw acapach lurtajja, takpach oraken utjirinacs luraractajja.
Tata, jumätaw nayan Diosajjajja; nayajj jumaruw yupaychsma, sutimsa bendiciractwa, muspharcaña amtatanacamwa phoktajja uca laycu, ucanacasti chekapapuniwa imantasiñajjaraquiwa nayra pachanacatpacha.
Uqhamajj jumanacajj jan cunatsa mäqui juchañchapjjamti, jan ucasti suyt'apjjam Tatituru, jupaw take cunsa khanar apsuscani, cunatejj ch'amacan imantatäqui ucsa. Tatitojj take jakenacan amtatanacapsa khanaruw apsuni, ucatsti Diosajj sapakat maynirusa lurataparjamaraquiw uñjani.
Chijinacar purcta ucapachajja, jumaw jacañajjar imtajja; ch'amamampiw timanacajjan amparapat khespiyistajja. Tatituw nayarojj asquinacamp phokhantitani: Tatay, qhuyapayasiñamajj wiñayawa, amparamamp luratanacarojj janiquiy armanucumti.
Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”
Uqham kalltatpach yakhachatanacarojj jawsjjaraquiwa, uca jawsatanacaparusti catokjjaraquiwa, uca catokatanacarusti jach'aruraquiw apti, ucanacarusti jupampïñataquiw uscu.
Ucasti jach'a luräwipatjja mä juc'aquiwa, cuntejj ist'ctan ucasti jisc'a arunacaquiwa, ucampisa ¿qhitisa jach'a ch'amampi arsutapjja amuyt'aspa?”
Mä wawaw jiwasataqui yurini, Diosaw mä yokall wawa churistani, uca wawaw jichhajj apnakaraquini. Aqham sasaw sutichapjjaraquini: ‘Amtäwinacapanjja Muspharcaña, jan atipjcay Dios, Wiñay Awqui, Sumancañan Jilïripa’ sasa.
Tatitojj asqui jakerojj janiw mank'at t'akhesiyquiti, ucampis ñankha lurir jakerojja mank'at awtjayasiñapjja janiw apakquiti.
Diosan wawanacapa, Tatitur yupaychapjjam, khapak cancañaparusa, ch'amaparus jach'añchapjjam, Tatituw jallurojj apnake, jupaw wiñay reyjamajj kont'asi. Tatituw marcaparojj ch'am churi, jupaw marcaparojj sumancañ churi. Tatitun khapak sutip jach'ar aptapjjam, kollan utapan Tatitur yupaychapjjam.
Ucapachasti Diosajj churaniwa sapa maynirus luräwiparjama. Diosajj wiñay jacañwa churani take qhitinacatejj Diosan marcapa, cheka cancañampi jan inact'as thakerinacarojja. Ucampis jan ist'asis ch'ajjwirinacarojja mutuyaniwa, chekat sipana jan walïquis ucar jaysatap laycu.
Diosar jan uñt'ir jakenacan c'ari diosanacapajj korit kollket lurataquiwa, jaken amparapamp lurataquiraquiwa: lacanïcasinsa janiw parlapquiti, nayranïcasinsa janiw uñjapquiti, jinchunïcasinsa janiw ist'apquiti, janiw jacañ samananïpquisa. Uca diosanac luririnacajj ucanacjamaquïpjjewa, ucanacar alcatirinacas pachpaquïpjjaraquiwa.
Sión kolluna llact'atanacarojj khella lanti mä corona churañataqui, jachañ lantsti suma k'apquir cusisiñ kollanaca, chuyma cawcst'ata sarnakaña lantsti, yupaychañ k'ochunaca. ‘Atipt'iri roble kokanaca’ sasaw sutichapjjaraquïtam, pachpa Tatitun ayrutanaca c'ajquir cancañapa uñacht'ayañataqui.
Jisc'aruy tucupjjam Diosataquejja, uqhamat jupajj jumanacar horasaparu jach'ar aptañapataqui. Take llaquisiñanacamsti Diosar jaytapjjaraquim, jupasti jumanacatjja llaquisiraquiwa.
Tatay, takpach chuymajjampiw art'asinsma, ist'aquitaya, leyinacam phokhañ munta. Jumaruw art'asinsma, yanapt'aquitaya, arunacamarjam phokhañajjataqui.
¿Utjaspati Tatitutaquisti cuna lurañas jupataqui wali ch'amätapa? Mara aca horasaw visitir cutt'aniraquï, ucqhataquisti Sarajj mä yokall wawanïniwa —sasa.
Cunapachatejj Diosajj arunacapa ist'asiyi ucapachasti, jach'a muspharcañanacaw lurasi; jan amuyt'caya jach'a luräwinacaw utjaraqui, take ucanacsti janiw qhitis amuyt'añataquejj ch'amanïquiti.
“Sapjjaracsmawa, jan llaquisipjjamti, cuntejj mank'apcäta, umapcaraquïta, isisipcäta ucanacatjja. ¿Janiti jacañajj mank'at sipansa juc'ampi sumäqui, janchisti isitsa juc'ampïcaraquejja? Uñtapjjam jamach'inacajj jalasqui uca, janiw jupanacajj satapquis ni apthapipcaraquisa, janiraquiw juyranacsa pirwanacarus imapquiti, ucampis alajjpachanquir Awquimaw ucanacarojj mank'ayi. Uca jamach'inacat sipansa jumanacajj juc'amp munatäpjjtawa.
Tatituw take jan walt'añanacat imasctam; jupaw jacañam imasqui; Tatituw mistutamsa, mantatamsa uñjascani, jichhürut wiñaycama.
Take cunatejj nayratpach Kellkatan uchatäcän ucanacajj jiwasanacaruw yatichistu, llamp'u chuyma toke suyt'añasataqui, ucanracwa mä samarañsa jicjjattanjja.
Qhitinacarutejj Tatitojj arjjatqui ucanacajj jacapjjaniwa, take jupanacampiraquiw nayajj jacaraquëjja. “Jumaw nayarojj kollt'asista, jacañsa cuttayjjaraquista. Uñtapjjam, t'akhesiñat sipansa, jichhajj samarañaw utjitu. Jumaquiraquiw nayarojj jacayista, aynacht'añ jach'a p'iyatsa, take juchanacajj perdonatam laycu.
Nayajj jumar sismawa: “Jumaw nayan Tatitojjätajja, asquejjätasa, janiw cunas jumjamajj utjquiti” sasa.
Tatitojj chekapar uñjañataquiw uñachayasi: ñankha lurir jakesti pachpa luräwinacapampiw pejjtuntayasi.
Amuyaractwa take cuntï Diosajj lurqui ucajja wiñayäniwa. Ucarojja janiw yapjjatatäcaniti, janiw apakatäcaraquinisa; Diosaw uqham luri, ucarojj ajjsart'añampi uñjatäñapataqui.
Jach'a kollunacajj yakha chekarusay sartasipcpan, kollunacas aynacharusay jutasipcpan, ucampis munasiñajjajj jumataquejj janipuniw tucuscaniti, uqhamaraqui sumar mantäwi arust'äwejjajj janiw t'unjatäcaniti.” Uqham siwa jumar qhuyapayiri Tatitojja.
Jan sallkjasipjjamti; janiw qhitis Diosatjja sawcascaspati. Cuntejj jakejj yapuchqui ucracwa apthapini.
Juchan wajjt'asiñapasti jiwañawa, ucampis Diosan wajjt'äwipajj wiñay jacañawa Cristo Jesús Tatitusana.
Kellkatanacan siwa: “Take jakenacajj korar uñtataquiwa, Jach'a cancañapasa koran pankarapar uñtataquiraquiwa. Korajj wañsjjewa, pankaras willirtjjaquiraquiwa. Ucampis Tatitun arupajj wiñayataquipuniwa” sasa. Aca arunacapï jumanacataqui khespiyasiñ yatiyata arunacajja.
“Israel, Jacobon marcapa, ist'ita arunacajja, nayaw jumarojj jawssma: Naya sapaquiw Diosajj utjta, nayätwa kalltasa tucuyasa.
Tatitun amparapar sarnakäwim catuyasim, jupar take chuymamp alcatam, jupasti yanapätamwa. Asqui cancañamarojj willjtar uñtat khantayani, asqui sarnakatamsti chicürjam khanayani.
Cunapachatejj juman lurat alajjpach uñatatcta, juman uchat phajjsimpiru, warawaranacampir uñtcta ucapachajj sistwa:
¡Tatay, luräwinacamajj waljapuniwa! Yatiñ cancañampiw take cuns lurtajja, orakejj luratanacaman phokhantatawa. Lamar kotajj jan tupt'cayawa, jan jact'cay jaquirinacaw utji; jach'anaca, jisc'anaca;
Ucampis jiwasataquejj mä sapa Dios Awquiquiw utji. Uca Dios Awquiwa take cunsa lurejja ucataracwa jiwasas utjasctanjja, jupataquiraqui jacasctanjja. Mä sapa Tatituquiraquiw utjejja, ucasti Jesucristowa. Jupïpanracwa take cunas utjejja, uqhamarac jiwasasa.