Jozue 11 - Bibl Koad 21: Ar Bibl e Brezhoneg evit ar Vretoned Bibl Koad 21: Ar Bibl e Brezhoneg evit ar Vretoned
Jozue 11

¹ Pa glevas Jabin roue Hazor an traoù-mañ, e kasas da gavout Jobab roue Madon, roue Shimron, roue Akshaf,

² hag ar rouaned a oa o chom en hanternoz, er menez, er blaenenn e kreisteiz Kinnered, en draonienn, war grec'hioù Dor war-zu ar c'huzh-heol,

³ ar Gananeiz eus ar sav-heol hag eus ar c'huzh-heol, an Amoreaned, an Hitited, ar Ferezianed, ar Jebuziz er menez, an Hevianed e traoñ an Hermon e bro Vizpa.

⁴ Mont a rejont er-maez gant o holl luioù, ur bobl diniver, ken niverus hag an traezh a zo war ribl ar mor, gant kezeg ha kirri niverus-meurbet.

⁵ An holl rouaned-se en em unanas hag a zeuas da gampiñ asambles e-kichen doureier Merom, evit brezeliñ ouzh Israel.

⁶ An AOTROU a lavaras da Jozue: Na'z pez ket aon razo, rak warc'hoazh, war-dro d'ar c'houlz-mañ, e lakain anezho holl gloazet d'ar marv dirak Israel. Troc'hañ a ri o garoù d'o c’hezeg, hag e tevi o c'hirri en tan.

⁷ Jozue gant e holl dud a vrezel a zeuas eta buan a-enep dezho e-kichen doureier Merom, hag e kouezhjont warno.

⁸ An AOTROU a lakaas anezho etre daouarn Israel, a bilas anezho hag a redas war o lerc'h betek Sidon ar Vras ha betek Misrefod-Maim, ha betek traonienn Vizpa war-zu ar sav-heol; o filet o deus en doare na lezjont den da dec'hout kuit.

⁹ Jozue a reas evel m'en doa lavaret an AOTROU dezhañ, troc'hañ a reas o garoù d'o c’hezeg, hag e tevas o c'hirri en tan.

¹⁰ Evel ma tistroe Jozue en hevelep amzer-se, e kemeras Hazor hag e skoas war e roue gant ar c'hleze, rak Hazor a oa bet gwechall kêrbenn an holl rouantelezhioù-se.

¹¹ Lazhañ a rejont gant barvenn ar c'hleze an holl dud a oa enni, hag e lakajont anezhi da verz; ne chomas netra eus ar pezh a anale, hag e voe devet Hazor en tan.

¹² Jozue a gemeras ivez holl gêrioù ar rouaned-se, gant o holl rouaned, hag e lazhas anezho gant barvenn ar c'hleze; hag o lakaas da verz, evel m'en doa gourc'hemennet Moizez servijer an AOTROU .

¹³ Met Israel ne zevas hini ebet eus ar c'hêrioù a oa war ur c'hrec'h, nemet Hazor hepken a voe devet gant Jozue.

¹⁴ Mibien Israel a breizhas evito holl ziwisk ar c'hêrioù-se hag al loened. Lazhañ a rejont gant barvenn ar c'hleze an holl dud betek ma vefent distrujet holl; ne voe lezet netra eus ar re a anale.

¹⁵ Evel m'en doa gourc'hemennet an AOTROU da Voizez e servijer, evel m'en doa gourc'hemennet Moizez da Jozue, evel-se e reas Jozue. Ne lamas netra eus ar pezh en doa gourc'hemennet an AOTROU da Voizez.

¹⁶ Jozue a gemeras eta an holl vro-se, ar menez, an holl greisteiz, holl vro C'hoshen, an draonienn, ar blaenenn, menez Israel gant e draoniennoù,

¹⁷ adalek Menez Halak a bign da Seir, betek Baal-Gad e traonienn al Liban, e traoñ Menez Hermon. Hag e tapas ivez o holl rouaned, e skoas warno hag o lakaas d'ar marv.

¹⁸ Jozue a reas ar brezel a-enep an holl rouaned-se e-pad pell amzer.

¹⁹ Ne voe kêr ebet hag a reas ar peoc'h gant mibien Israel, nemet an Hevianed a oa o chom e Gabaon. O c'hemer a rejont holl en ur stourm,

²⁰ ha kement-se a zeue a-berzh an AOTROU , en doa kaletaet o c'halon evit mont d'ar brezel a-enep Israel hag evit bezañ lakaet da verz hep ma vije trugarez evito, hag evit ma vefent distrujet evel m'en doa gourc'hemennet an AOTROU da Voizez.

²¹ En amzer-se Jozue a zeuas hag a lazhas an Anakim eus ar menezioù, eus Hebron, eus Debir, eus Anab, hag eus holl venez Juda. Eñ o lakaas da verz, gant o c'hêrioù.

²² Ne chomas ket a Anakim e bro mibien Israel, nemet e Gaza, e Gad hag en Asdod.

²³ Jozue a gemeras eta an holl vro hervez kement en doa lavaret an AOTROU da Voizez; Jozue a roas anezhi da Israel evel hêrezh, hervez o meuriad pep a lodenn. Hag ar vro a voe sioul hep brezel.