Psalms 92 - Die Bybel 2020-vertaling

¹ 'n Psalm. 'n Lied vir die Sabbatdag.

² Dit is goed om die Here te dank, om u Naam te besing, Allerhoogste;

³ om in die môre u troue liefde te verkondig, en u trou in die nagte –

⁴ met tiensnarige instrumente, met harpe en die speel van liere.

⁵ Want U maak my bly met u werk, Here, oor u handewerk jubel ek.

⁶ Hoe groot is u werke, Here, hoe uitermate diep u gedagtes!

⁷ 'n Dom mens weet nie, en 'n dwaas verstaan dit nie:

⁸ Wanneer goddeloses soos onkruid opskiet en almal wat onreg pleeg, gedy – is dit net om vir ewig uitgedelg te word.

⁹ Maar U is vir ewig hoog verhewe, Here.

¹⁰ Ja, kyk, u vyande, Here, ja, kyk, u vyande gaan ten gronde; dié wat onreg pleeg, word verstrooi.

¹¹ Maar U het my horings hoog gelig soos dié van 'n buffel. Suiwer olie is oor my uitgegiet.

¹² My oog kyk neer op my teenstanders, op hulle wat teen my opstaan; my oor hoor met vreugde van die kwaaddoeners.

¹³ Regverdiges – soos palmbome skiet hulle op, soos seders op die Libanon groei hulle hoog.

¹⁴ Hulle is geplant in die huis van die Here; in die voorhowe van ons God blom hulle.

¹⁵ In die gryse ouderdom gedy hulle nog steeds; hulle is weelderig en blaarryk,

¹⁶ sodat hulle kan verkondig: “Regverdig is die Here, my rots, en daar is geen ongeregtigheid by Hom nie.”