Psalms 143 - Die Bybel 2020-vertaling

¹ 'n Psalm. Van Dawid. Here, hoor my gebed, luister na my smeekgebed; antwoord my in u trou, in u geregtigheid.

² Moet net nie u dienskneg voor die gereg daag nie; want niemand wat leef, is voor U regverdig nie.

³ Ja, vyande agtervolg my, hulle verpletter my lewe teen die grond; hulle laat my woon in donker plekke, soos mense wat lankal dood is.

⁴ My gees in my weifel; in my binneste is my hart verbyster.

⁵ Ek dink aan dae lank gelede, ek mymer oor al u dade; oor die werk van u hande dink ek na.

⁶ Ek strek my hande uit na U; my diepste wese smag na U soos dor grond. •Sela

⁷ U moet my gou antwoord, Here; my gees is gedaan. Moet tog nie u gesig vir my verberg nie; dan word ek net soos hulle wat in die put afdaal.

⁸ Laat my in die môre van u troue liefde hoor, want op U vertrou ek. Wys my die pad wat ek moet loop, want na U is my verlange.

⁹ Red my van my vyande, Here; na U vlug ek.

¹⁰ Leer my om te doen wat vir U aanvaarbaar is, want U is my God. U goeie Gees moet my lei op gelyk grond.

¹¹ Ter wille van u Naam, Here, moet U my in die lewe hou; deur u regverdige optrede moet U my uitlei uit die nood;

¹² en in u troue liefde moet U my vyande vernietig. Maak almal tot niet wat my lewe bedreig, want ek is u dienskneg.