Matteus 1 - Die Bybel 2020-vertaling

Geslagsregister van Jesus

¹ Die geslagsregister van Jesus Christus, die •Seun van Dawid, die Seun van Abraham:

² Abraham het Isak verwek, Isak het Jakob verwek, Jakob het Juda en sy broers verwek,

³ Juda het Peres en Serag by Tamar verwek, Peres het Gesron verwek, Gesron het Ram verwek,

⁴ Ram het Amminadab verwek, Amminadab het Nagson verwek, Nagson het Salmon verwek,

⁵ Salmon het Boas by Ragab verwek, Boas het Obed by Rut verwek, Obed het Isai verwek

⁶ en Isai het Dawid, die koning, verwek. Dawid het Salomo by die vrou van Urija verwek,

⁷ Salomo het Rehabeam verwek, Rehabeam het Abia verwek, Abia het Asa verwek,

⁸ Asa het Josafat verwek, Josafat het Joram verwek, Joram het Ussia verwek,

⁹ Ussia het Jotam verwek, Jotam het Agas verwek, Agas het Hiskia verwek,

¹⁰ Hiskia het Manasse verwek, Manasse het Amon verwek, Amon het Josia verwek

¹¹ en in die tyd van die wegvoering na Babilon het Josia Jojagin en sy broers verwek.

¹² Ná die wegvoering na Babilon het Jojagin Sealtiël verwek, Sealtiël het Serubbabel verwek,

¹³ Serubbabel het Abihud verwek, Abihud het Eljakim verwek, Eljakim het Asor verwek,

¹⁴ Asor het Sadok verwek, Sadok het Agim verwek, Agim het Elihud verwek,

¹⁵ Elihud het Eleasar verwek, Eleasar het Mattan verwek, Mattan het Jakob verwek

¹⁶ en Jakob het Josef verwek, die man van Maria, uit wie Jesus, wat bekend staan as Christus, gebore is.

¹⁷ Al die geslagte dan van Abraham tot by Dawid was veertien geslagte, en van Dawid tot by die wegvoering na Babilon veertien geslagte, en van die wegvoering na Babilon tot by die Christus veertien geslagte.

Geboorte van Jesus Christus

¹⁸ Die geboorte van Jesus Christus het só gebeur. Toe Maria, sy moeder, reeds aan Josef verloof was, maar nog voordat hulle gemeenskap gehad het, het dit geblyk dat sy swanger geraak het uit die Heilige Gees.

¹⁹ Omdat Josef, haar man, wetsgetrou was maar haar nie in die openbaar wou verneder nie, het hy besluit om in die geheim van haar te skei.

²⁰ Terwyl hy daaroor nagedink het, het daar skielik 'n engel van die Here in 'n droom aan hom verskyn en gesê: “Josef, seun van Dawid, moenie bang wees om Maria as jou vrou by jou te neem nie, want wat in haar verwek is, is uit die Heilige Gees.

²¹ Sy sal geboorte gee aan 'n seun, en jy moet Hom Jesus noem, want Hy sal sy volk van hulle sondes verlos. ”

²² Dit het alles gebeur sodat wat die Here deur die profeet gesê het, vervul kon word:

²³ “Kyk, die maagd sal swanger word en 'n seun in die wêreld bring, en hulle sal Hom Immanuel noem” – wat, as dit vertaal word, beteken ‘God is met ons.’

²⁴ Toe Josef uit die slaap wakker word, het hy gemaak soos die engel van die Here hom beveel het en haar as sy vrou by hom geneem.

²⁵ Hy het nie met haar gemeenskap gehad totdat sy aan 'n seun geboorte gegee het nie. En hy het Hom Jesus genoem.