Masalimo 70 - Buku Lopatulika

Davide apempha Mulungu amlanditse msanga

Kwa Mkulu wa Nyimbo. Salimo la Davide, la chikumbutso.

¹ Fulumirani kundipulumutsa, Mulungu! Fulumirani kundithandiza, Yehova.

² Achite manyazi, nadodome amene afuna moyo wanga. Abwezedwe m'mbuyo, napepulidwe amene akonda kundichitira choipa.

³ Abwerere, kukhale mphotho ya manyazi ao amene akuti, Hede, hede.

⁴ Asekerere nakondwerere mwa Inu onse akufuna Inu; nanene kosalekeza iwo akukonda chipulumutso chanu, abuke Mulungu.

⁵ Koma ine ndine wozunzika ndi waumphawi; mundifulumirire, Mulungu. Inu ndinu mthandizi wanga ndi Mpulumutsi wanga; musachedwe, Yehova.