Masalimo 13 - Buku Lopatulika

Munkhawa athawira Mulungu namkhulupirira

Kwa Mkulu wa Nyimbo. Salimo la Davide.

¹ Mudzandiiwala chiiwalire, Yehova, kufikira liti? Mudzandibisira ine nkhope yanu kufikira liti?

² Ndidzachita uphungu m'moyo mwanga kufikira liti, pokhala ndi chisoni m'mtima mwanga tsiku lonse? Adzandiukira ine mdani wanga kufikira liti?

³ Penyani, ndiyankheni, Yehova Mulungu wanga. Penyetsani maso anga, kuti ndingagone tulo ta imfa;

⁴ kuti anganene mdani wanga, Ndamgonjetsa; ndipo angakondwere otsutsana nane posunthika ine.

⁵ Koma ine ndakhulupirira pa chifundo chanu; mtima wanga udzakondwera nacho chipulumutso chanu.

⁶ Ndidzaimbira Yehova, pakuti anandichitira zokoma.