Masalimo 128 - Buku Lopatulika

Wakuopa Yehova adalitsidwa m'banja mwake

Nyimbo yokwerera.

¹ Wodala yense wakuopa Yehova, wakuyenda m'njira zake.

² Pakuti udzadya za ntchito ya manja ako; wodala iwe, ndipo kudzakukomera.

³ Mkazi wako adzanga mpesa wopatsa m'mbali za nyumba yako; ana ako adzanga timitengo ta azitona pozinga podyera pako.

⁴ Taonani, m'mwemo adzadalitsika munthu wakuopa Yehova.

⁵ Yehova adzakudalitsa ali mu Ziyoni; ndipo udzaona zokoma za Yerusalemu masiku onse a moyo wako.

⁶ Inde, udzaona zidzukulu zako. Mtendere ukhale ndi Israele.