Masalimo 12 - Buku Lopatulika

Anthu ndi amabodza, Mulungu ndiye woona

Kwa Mkulu wa Nyimbo: pa Seminiti. Salimo la Davide.

¹ Pulumutsani, Yehova; pakuti wofatsa wasowa; pakuti okhulupirika achepa mwa ana a anthu.

² Amanena za bodza munthu yense ndi mnansi wake, amanena ndi mlomo wothyasika, ndi mitima iwiri.

³ Yehova adzadula milomo yonse yothyasika, lilime lakudzitamandira;

⁴ amene amati, Ndi lilime lathu tidzaposa; milomo yathu nja ife eni; mbuye wa pa ife ndani?

⁵ Chifukwa cha kupasuka kwa ozunzika, chifukwa cha kuusa moyo kwa aumphawi, ndiuka tsopano, ati Yehova; ndidzamlonga mosungika muja alakalakamo.

⁶ Mau a Yehova ndi mau oona; ngati siliva woyenga m'ng'anjo yadothi, yoiyeretsa kasanu ndi kawiri.

⁷ Mudzawasunga, Yehova, mudzawatchinjirizira mbadwo uno kunthawi zonse.

⁸ Oipa amayenda mozungulirazungulira, potamanda iwo chonyansa mwa ana a anthu.