Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ထွက်​မြောက် 38 - မြန်​​​မာ့​​​စံ​​​မီ​​​သမ္မာ​​​ကျမ်း​​


မီးရှို့ရာယဇ်ပလ္လင်တည်ခြင်း

1 မီးရှို့​ရာ​ယဇ်ပလ္လင်​ကို​အကေရှား​သစ်သား​ဖြင့် လုပ်​ထား​၏​။ ထို​ယဇ်ပလ္လင်​သည် အလျား​ငါး​တောင်​၊ အနံ​ငါး​တောင် စတုရန်း​ပုံ​ဖြစ်၍ အမြင့်​သုံး​တောင်​ရှိ​၏​။

2 ယဇ်ပလ္လင်​၏​ထောင့်​လေး​ထောင့်​၌ ချို​များ​ကို​လုပ်​၍ ထို​ချို​များ​သည် ယဇ်ပလ္လင်​နှင့်တစ်ဆက်တည်း​ဖြစ်​၏​။ ယဇ်ပလ္လင်​ကို ကြေးနီ​ဖြင့်​မွမ်းမံ​၏​။

3 အိုး​၊ ဂေါ်ပြား​၊ ဇလုံ​၊ ခက်ရင်းခွ​၊ မီးကျီးခံဗန်း စသည့်​ယဇ်ပလ္လင်​၏​တန်ဆာပလာ​ရှိသမျှ​တို့​ကို ကြေးနီ​ဖြင့်​လုပ်​၏​။

4 ယဇ်ပလ္လင်​၏​အောက်​ဘက်​အလယ်​နား​တွင် အစွန်းထွက်​နေ​သော​နေရာ​၏​အောက်​၌​ထား​ရ​မည့် ကြေးနီ​စကာ​မီးကျီးခံပြား​ကို​လုပ်​၏​။

5 ထမ်းပိုး​များ​လျှိုစရာ​ကွင်း​လေး​ကွင်း​ကို ကြေးနီ​မီးကျီးခံပြား​ထောင့်​လေး​ထောင့်​တွင် သွန်းလုပ်တပ်ဆင်​၏​။

6 ထမ်းပိုး​များ​ကို အကေရှား​သစ်သား​ဖြင့်​လုပ်​၍ ကြေးနီ​ဖြင့်​မွမ်းမံ​၏​။

7 ယဇ်ပလ္လင်​ကို​ထမ်း​ရန် ယဇ်ပလ္လင်​၏​ဘေး​တစ်ဖက်တစ်ချက်​၌​ရှိ​သော​ကွင်း​များ​ထဲသို့ ထမ်းပိုး​တို့​ကို​လျှိုသွင်း​ထား​၏​။ ယဇ်ပလ္လင်​ကို ပျဉ်ပြား​များ​ဖြင့် အခေါင်းပေါက်​ဖြစ်​အောင်​လုပ်​၏​။


ကြေးနီအင်တုံသွန်းလုပ်ခြင်း

8 ကြေးနီ​အင်တုံ​နှင့်​ကြေးနီ​ခြေတိုင်​ကို တွေ့ဆုံစည်းဝေးရာ​တဲ​တော်​၏​အဝင်ဝ​၌​အစေခံ​သော အမျိုးသမီး​တို့​၏​ကြေးမုံ​ဖြင့် လုပ်ထား​၏​။


တဲတော်ဝင်းဆောက်လုပ်ခြင်း

9 ကိန်းဝပ်​တော်မူ​ရာ​တဲ​တော်​၏​ဝင်း​ကို​လည်း လုပ်​၏​။ ထို​ဝင်း​၏​တောင်ဘက်ခြမ်း​တစ်ခြမ်း​အတွက် အလျား​အတောင်​တစ်ရာ​ရှိ​သော​အကာ​ကို ရက်လုပ်​ထား​သော​ပိတ်ချောထည်​ဖြင့်​လုပ်​၏​။

10 ထို​အကာ​အတွက် တိုင်​နှစ်ဆယ်​နှင့် တိုင်​အောက်ခံအစွပ်​အခု​နှစ်ဆယ်​ကို ကြေးနီ​ဖြင့်​လည်းကောင်း​၊ တိုင်​ချိတ်​နှင့်​တိုင်ထိပ်အစွပ်​တို့​ကို ငွေ​ဖြင့်​လည်းကောင်း လုပ်​၏​။

11 မြောက်ဘက်ခြမ်း​အတွက် အလျား​အတောင်​တစ်ရာ​ရှည်​သော​အကာ​ကို​လုပ်​၏​။ ထို​အကာ​အတွက် တိုင်​နှစ်ဆယ်​နှင့် တိုင်​အောက်ခံအစွပ်​အခု​နှစ်ဆယ်​ကို ကြေးနီ​ဖြင့်​လည်းကောင်း​၊ တိုင်​ချိတ်​နှင့် တိုင်ထိပ်အစွပ်​တို့​ကို ငွေ​ဖြင့်​လည်းကောင်း လုပ်​ထား​၏​။

12 အနောက်​ဘက်ခြမ်း​အတွက် အတောင်​ငါးဆယ်​ရှိ​သော​အကာ​နှင့်တကွ အကာ​အတွက် တိုင်​ဆယ်​တိုင်​၊ တိုင်​အောက်ခံအစွပ်​ဆယ်​ခု​လုပ်​၏​။ တိုင်​ချိတ်​နှင့် တိုင်ထိပ်အစွပ်​တို့​ကို ငွေ​ဖြင့်​လုပ်​ထား​၏​။

13 နေထွက်​ရာ​အရပ် ဝင်း​အရှေ့​ဘက်ခြမ်း​သည် အတောင်​ငါးဆယ်​ရှိ​၍

14 ဝင်း​အဝင်ဝ​တစ်ဘက်​၌ တစ်ဆယ့်​ငါး​တောင်​ရှိ​သော​အကာ​နှင့်တကွ အကာ​အတွက် တိုင်​သုံး​တိုင်​၊ တိုင်​အောက်ခံအစွပ်​သုံး​ခု​၊

15 ကျန်​တစ်ဘက်​၌​လည်း တစ်ဆယ့်​ငါး​တောင်​ရှိ​သော​အကာ​နှင့်တကွ အကာ​အတွက် တိုင်​သုံး​တိုင်​၊ တိုင်​အောက်ခံအစွပ်​သုံး​ခု​လုပ်​၏​။

16 ဝင်း​ပတ်ပတ်လည်​၏​အကာ​ရှိသမျှ​ကို ရက်လုပ်​ထား​သော​ပိတ်ချောထည်​ဖြင့်​လုပ်​၏​။

17 တိုင်​အောက်ခံအစွပ်​များ​ကို ကြေးနီ​ဖြင့်​လည်းကောင်း​၊ တိုင်​ချိတ်​နှင့် တိုင်ထိပ်အစွပ်​တို့​ကို ငွေ​ဖြင့်​လည်းကောင်း လုပ်​၏​။ တိုင်​ထိပ်​ကို ငွေ​ဖြင့်​မွမ်းမံ​၏​။ ဝင်း​တိုင်​အားလုံး​၏​ထိပ်​ကို ငွေ​အစွပ်​ဖြင့်​စွပ်​၏​။

18 ဝင်း​အဝင်ဝ​ကို​ကာ​ရန် အပြာရောင်​ချည်​၊ ခရမ်းရောင်​ချည်​၊ အနီရောင်​ချည် တို့​ဖြင့်​ရက်လုပ်​ထား​သော​ပိတ်ချောထည်​ပေါ်တွင် ပန်းထိုး​ထား​သော​လိုက်ကာ​ကို​လုပ်​၏​။ ထို​လိုက်ကာ​၏​အလျား​သည် အတောင်​နှစ်ဆယ်​၊ အနံ​သည် ဝင်း​အကာ​၏​အမြင့်​အတိုင်း ငါး​တောင်​ရှိ​၏​။

19 ဝင်းတံခါး​အတွက် တိုင်​လေး​တိုင်​၊ တိုင်​အောက်ခံ​ကြေးနီ​အစွပ်​လေး​ခု​နှင့် ငွေ​ချိတ်​ကို​လုပ်​၏​။ တိုင်​ထိပ်​နှင့်​တိုင်ထိပ်အစွပ်​တို့​ကို ငွေ​ဖြင့်​မွမ်းမံ​၏​။

20 ကိန်းဝပ်​တော်မူ​ရာ​တဲ​တော်​နှင့် ဝင်း​ပတ်ပတ်လည်​အတွက် ငုတ်တိုင်​အားလုံး​ကို ကြေးနီ​ဖြင့်​လုပ်​၏​။


တဲတော်ပစ္စည်းစာရင်း

21 မောရှေ​ပြော​သည့်​အတိုင်း သက်သေခံ​တော်မူ​ချက်​ထားရှိ​သော​ကိန်းဝပ်​တော်မူ​ရာ​တဲ​တော်​တည်းဟူသော ကိန်းဝပ်​တော်မူ​ရာ​တဲ​တော်​အတွက် ပြုစု​ထား​သော​ပစ္စည်း​စာရင်း​ကား ဤသို့တည်း​။ ထို​စာရင်း​ကို ယဇ်ပုရောဟိတ်​အာရုန်​၏​သား​ဣသမာ​ဦးဆောင်​၍ လေဝိ​အမျိုး​တို့​က ပြုစု​ကြ​၏​။

22 မောရှေ​အား ထာဝရဘုရား​မိန့်မှာ​တော်မူ​သော​အရာ​အားလုံး​ကို ယုဒ​အမျိုးအနွယ်​မှ ဟုရ​၏​မြေး​၊ ဥရိ​၏​သား​ဗေဇလေလ​သည် လုပ်​၏​။

23 ဒန်​အမျိုးအနွယ်​မှ အဟိသမတ်​၏​သား​အဟောလျဘ​သည်​လည်း သူ​နှင့်အတူ လုပ်​၏​။ အဟောလျဘ​သည် လက်မှုအတတ်​၊ ပုံဖော်​သော​အတတ်​၊ အပြာရောင်​ချည်​၊ ခရမ်းရောင်​ချည်​၊ အနီရောင်ချည် တို့​ဖြင့် ပိတ်ချောထည်​ပေါ်တွင် ပန်းထိုးသောအတတ်​တို့​ကို ကျွမ်းကျင်သူ​ဖြစ်​၏​။

24 သန့်ရှင်းရာဌာန​တော်​တည်ဆောက်​ခြင်း​အမှု​ရှိသမျှ​တို့​တွင် အသုံးပြု​သော​ရွှေ​ချိန်​စုစုပေါင်း​မှာ သန့်ရှင်းရာဌာန​၏​ရှယ်ကယ်​စံနှုန်း​နှင့်အညီ ချီလွှဲရာပူဇော်သက္ကာ​ရွှေ နှစ်ဆယ့်​ကိုး​တာလန် ခုနစ်​ရာ့​သုံးဆယ်​ရှယ်ကယ် ရှိ​၏​။

25 စာရင်းဝင်​သော​လူထု​တို့ ပေးလှူ​သော​ငွေ​သည် သန့်ရှင်းရာဌာန​၏​ရှယ်ကယ်​စံနှုန်း​နှင့်အညီ တစ်ရာ​တာလန် တစ်ထောင့်​ခုနစ်​ရာ​ခုနစ်ဆယ့်​ငါး​ရှယ်ကယ်​ဖြစ်​၏​။

26 အသက်​နှစ်ဆယ်​နှင့်​အထက် ရေတွက်​သော​စာရင်း​ထဲတွင် ပါဝင်​သူ​အပေါင်း​တို့​မှာ ခြောက်သိန်း​သုံး​ထောင့်​ငါး​ရာ​ငါးဆယ်​ရှိ​၍ တစ်ယောက်​လျှင် သန့်ရှင်းရာဌာန​၏​ရှယ်ကယ်​စံနှုန်း​အရ ရှယ်ကယ်​တစ်ဝက်​ဖြစ်​သော တစ်​ဗေကာ​ကို ပေးဆောင်​ကြ​၏​။

27 ငွေ​တာလန်​တစ်ရာ​ဖြင့် သန့်ရှင်းရာဌာန​အတွက် အောက်ခံအစွပ်​များ​နှင့် ကန့်လန့်ကာ​အတွက် အောက်ခံအစွပ်​များ​ကို သွန်းလုပ်​၏​။ အောက်ခံအစွပ်​တစ်​ခု​လျှင် တစ်​တာလန်​၊ အောက်ခံအစွပ်​တစ်ရာ​အတွက် တာလန်​တစ်ရာ​ဖြစ်​၏​။

28 ကျန်​ငွေ​တစ်ထောင့်​ခုနစ်​ရာ​ခုနစ်ဆယ့်​ငါး​ရှယ်ကယ်​ဖြင့် တိုင်​၏​ချိတ်​နှင့် တိုင်ထိပ်အစွပ်​တို့​ကို​လုပ်​၍ တိုင်​ထိပ်​ကို​မွမ်းမံ​၏​။

29 ချီလွှဲရာပူဇော်သက္ကာ​ကြေးနီ​သည်​လည်း ခုနစ်ဆယ်​တာလန် နှစ်ထောင့်​လေး​ရာ​ရှယ်ကယ်​ဖြစ်​၏​။

30 ထို​ကြေးနီ​ဖြင့် တွေ့ဆုံစည်းဝေးရာ​တဲ​တော်​အဝင်ဝ​အတွက် အောက်ခံအစွပ်​ကို​လည်းကောင်း​၊ ကြေးနီ​ယဇ်ပလ္လင်​နှင့် ထို​ယဇ်ပလ္လင်​အတွက် ကြေးနီ​မီးကျီးခံပြား​ကို​လည်းကောင်း​၊ ယဇ်ပလ္လင်​၏​တန်ဆာပလာ​ရှိသမျှ​ကို​လည်းကောင်း​၊

31 ဝင်း​ပတ်ပတ်လည်​အတွက် အောက်ခံအစွပ်​နှင့် ဝင်း​တံခါး​အတွက် အောက်ခံအစွပ်​ကို​လည်းကောင်း​၊ ကိန်းဝပ်​တော်မူ​ရာ​တဲ​တော်​၏​ငုတ်တိုင်​ရှိသမျှ​နှင့် ဝင်း​ပတ်ပတ်လည်​၏​ငုတ်တိုင်​ရှိသမျှ​ကို​လည်းကောင်း လုပ်​၏​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ