ဗိမာန်တော်တည်ဆောက်ခြင်း1 ထို့နောက် ရှောလမုန်မင်းကြီးသည် ဂျေရုဆလင်မြို့ရှိ မောရိတောင်ပေါ်၊ ခမည်းတော်ဒါဝိဒ်မင်းကြီးထံ ထာဝရဘုရားထင်ရှားတော်မူရာနေရာတွင် ထာဝရဘုရားအဖို့ အိမ်တော်ကို စတင်တည်ဆောက်၏။ ထိုနေရာသည် ယေဗုသိလူမျိုးဩရနန်၏ကောက်နယ်တလင်းတွင် အိမ်တော်တည်ဆောက်ဖို့ ဒါဝိဒ်မင်းကြီးပြင်ဆင်ထားသောနေရာဖြစ်၏။ 2 ရှောလမုန်မင်းကြီးနန်းစံ လေးနှစ်မြောက်၊ ဒုတိယလ၊ ဒုတိယနေ့တွင် အိမ်တော်ကို စတင်တည်ဆောက်၏။ 3 ရှောလမုန်မင်းကြီးတည်ဆောက်သော ဘုရားသခင်၏အိမ်တော်အုတ်မြစ်မှာ ရှေးခေတ်တိုင်းထွာနည်းအရ အလျား အတောင်ခြောက်ဆယ်၊ အနံ အတောင်နှစ်ဆယ်ရှိ၏။ 4 အိမ်တော်မျက်နှာစာရှိဆင်ဝင်၏အလျားမှာ အိမ်တော်မျက်နှာစာအကျယ်အတိုင်း အတောင်နှစ်ဆယ်၊ အမြင့်မှာ အတောင်တစ်ရာ့နှစ်ဆယ်ရှိ၏။ ဆင်ဝင်အတွင်းပိုင်းကို ရွှေစင်နှင့်မွမ်းမံထား၏။ 5 ပင်မဆောင်ကို ထင်းရှူးသားဖြင့်ကာပြီး ရွှေစင်နှင့်မွမ်းမံထား၏။ နံရံပေါ်တွင် စွန်ပလွံပင်ပုံများ၊ ကြိုးများနှင့် အလှဆင်ထား၏။ 6 အိမ်တော်လှပတင့်တယ်အောင် အဖိုးတန်ကျောက်များ၊ ပါရဝိမ်ပြည်မှရွှေများဖြင့် မွမ်းမံထား၏။ 7 အိမ်တော်၏မျက်နှာကြက်တန်းများ၊ တံခါးဘောင်များ၊ နံရံများနှင့် တံခါးရွက်များကိုလည်း ရွှေနှင့်မွမ်းမံထားပြီး နံရံများပေါ်တွင် ခေရုဗိမ်အရုပ်များကို ထွင်းထုထား၏။ အမြင့်ဆုံးသောသန့်ရှင်းရာဌာန8 အသန့်ရှင်းဆုံးဌာနကိုဆောက်လုပ်ရာတွင် အလျားမှာ အိမ်တော်မျက်နှာစာအကျယ်အတိုင်း အတောင်နှစ်ဆယ်၊ အနံမှာ အတောင်နှစ်ဆယ်ရှိ၍ ရွှေစင်တာလန်ခြောက်ရာဖြင့် မွမ်းမံထား၏။ 9 ရွှေသံမှိုများ၏အလေးချိန်မှာ ရှယ်ကယ်ငါးဆယ်ရှိ၏။ အထက်ခန်းများကိုလည်း ရွှေနှင့်မွမ်းမံထား၏။ 10 အသန့်ရှင်းဆုံးဌာနထဲတွင် ခေရုဗိမ်နှစ်ပါးကိုထွင်းထုပြီး ရွှေနှင့်မွမ်းမံထားရှိ၏။ 11 ခေရုဗိမ်အတောင်ပံများ၏အလျားမှာ စုစုပေါင်းအတောင်နှစ်ဆယ်ရှည်၏။ အတောင်ပံတစ်ဖက်သည် ငါးတောင်ရှည်ပြီး အိမ်တော်နံရံနှင့် ထိစပ်လျက်ရှိ၏။ နောက်တောင်ပံတစ်ခုမှာလည်း ငါးတောင်ရှည်ပြီး နောက်ခေရုဗိမ်၏အတောင်ပံနှင့် ထိစပ်လျက်ရှိ၏။ 12 နောက်ခေရုဗိမ်၏တောင်ပံတစ်ဖက်သည်လည်း ငါးတောင်ရှည်ပြီး အိမ်တော်နံရံနှင့် ထိစပ်လျက်ရှိ၏။ နောက်တောင်ပံတစ်ခုမှာလည်း ငါးတောင်ရှည်ပြီး ပထမခေရုဗိမ်၏အတောင်ပံနှင့် ထိစပ်လျက်ရှိ၏။ 13 ဖြန့်ထားသောခေရုဗိမ်တို့၏အတောင်ပံများသည် အတောင်နှစ်ဆယ် အရှည်ရှိ၏။ ခေရုဗိမ်ရုပ်တို့သည် ပင်မဆောင်ဘက်မျက်နှာမူ၍ ရပ်လျက်နေ၏။ 14 ကန့်လန့်ကာကိုလည်း အပြာရောင်ချည်၊ ခရမ်းရောင်ချည်၊ ကြက်သွေးရောင်ချည်နှင့် ချည်ချောများဖြင့် ရက်လုပ်၏။ ထိုကန့်လန့်ကာတွင် ခေရုဗိမ်ရုပ်များကို ပုံဖော်ရက်လုပ်ထား၏။ ကြေးတိုင်များ15 အိမ်တော်မျက်နှာစာတွင် အမြင့်သုံးဆယ့်ငါးတောင်ရှိသော တိုင်နှစ်တိုင်စိုက်ထူ၍ ထိုတိုင်တို့၏ထိပ်ရှိ တိုင်ထိပ်အုပ်မှာ ငါးတောင်စီမြင့်၏။ 16 သန့်ရှင်းရာဌာနတွင်ရှိသောကြိုးကဲ့သို့ ကြိုးများကိုပြုလုပ်ပြီး တိုင်ထိပ်အုပ်တွင် ပတ်ထား၏။ သလဲသီးပုံအလုံးတစ်ရာကိုပြုလုပ်ပြီး ကြိုးများပေါ်တွင် ချိတ်ဆွဲထား၏။ 17 တိုင်နှစ်တိုင်ကို ဗိမာန်တော်မျက်နှာစာတွင် တောင်ဘက်တစ်တိုင်၊ မြောက်ဘက်တစ်တိုင် စိုက်ထူထား၏။ တောင်ဘက်ရှိတိုင်ကို ယာခိန် ဟုအမည်ပေးထားပြီး မြောက်ဘက်ရှိတိုင်ကို ဗောဇ ဟုအမည်ပေးထား၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative