ဝိညာဉ်ရေးရာမာနထောင်လွှားမှုကို ရှုတ်ချခြင်း1 သင်တို့ထဲမှ လူတစ်ယောက်သည် မိထွေးဖြစ်သူနှင့် ပေါင်းသင်းနေထိုင်လျက်ရှိကြောင်း ကျွန်ုပ်ကြားသိရ၏။ ဘုရားသခင်ကို မကိုးကွယ်သောသူများ၌ပင် ထိုကဲ့သို့ တရားနှင့်မညီသော မေထုန်ကိုပြုခြင်း မရှိ။ 2 ဤသို့ဖြစ်လျက်ပင် သင်တို့သည် မာနထောင်လွှားဆဲရှိကြ၏။ အမှန်တွင်မူ သင်တို့သည် ဝမ်းနည်းပူဆွေးလျက် ထိုသူကို သင်တို့အထဲမှ ထုတ်ပယ်သင့်သည်မဟုတ်လော။ 3-4 ကျွန်ုပ်သည် လူကိုယ်တိုင် သင်တို့နှင့်အတူ မရှိသော်လည်း စိတ်ဝိညာဉ်သည် သင်တို့နှင့်အတူရှိ၏။ ကျွန်ုပ်သည် သင်တို့နှင့်အတူ ရှိနေသကဲ့သို့ ထိုဆိုးသောအမှုကို ပြုသူကို သခင်ယေရှုနာမအားဖြင့် စီရင်ပြီ။ သို့ဖြစ်၍ သင်တို့ စည်းဝေးကြသောအခါ ကျွန်ုပ်၏စိတ်ဝိညာဉ်သည် သင်တို့နှင့်အတူရှိနေမည်ဖြစ်ပြီး ကျွန်ုပ်တို့၏သခင် ယေရှု၏ တန်ခိုးတော်သည်လည်း သင်တို့နှင့်အတူ ရှိလိမ့်မည်။ 5 ထို့နောက် ထိုသူ၏ ဗီဇစိတ်ကို ဖျက်ဆီးရန် သင်တို့သည် ထိုသူအား နှင်ထုတ်၍ စာတန်လက်သို့ အပ်ရမည်။ သို့မှသာ သခင်ဘုရား ပြန်လည်ကြွလာမည့်နေ့တွင် သူ၏ဝိညာဉ်သည် ကယ်တင်ခံရနိုင်မည်ဖြစ်၏။ 6 သင်တို့၏ ကြွားဝါခြင်းသည် ကောင်းသောအရာ မဟုတ်ပေ။ အပြစ်သည် မုန့်ညက်တစ်ပုံလုံးကို ဖောင်းကြွစေသော တဆေးကဲ့သို့ဖြစ်သည်ကို သင်တို့မသိသလော။ 7 သင်တို့သည် တဆေးမပါသောမုန့်ညက်ဖြစ်ကြသည်နှင့်အညီ တဆေးဟောင်းကို ဖယ်ရှားကြလော့။ သို့မှသာ သင်တို့သည် တဆေးမပါသော မုန့်ညက်သစ်ကဲ့သို့ ဖြစ်ကြလိမ့်မည်။ အဘယ်ကြောင့်ဆိုသော် ကျွန်ုပ်တို့၏ ပသခါသိုးသငယ်ဟူသော ခရစ်တော်ကို ကျွန်ုပ်တို့အတွက် ပူဇော်ပြီးဖြစ်သောကြောင့်ပင်။ 8 ထို့ကြောင့် မကောင်းမှုနှင့် ဆိုးယုတ်မှုဟူသော တဆေးဟောင်းပါသည့်မုန့်နှင့် မဟုတ်ဘဲ ဖြူစင်မှုနှင့် မှန်ကန်မှုဟူသော တဆေးမပါသည့် မုန့်နှင့် ပသခါပွဲတော်ကို ကျင်းပကြပါစို့။ 9 ယခင်က သင်တို့ထံ ပို့သည့် စာ၌ တရားနှင့်မညီသော မေထုန်ကို ပြုသူများနှင့် မပေါင်းဖော်ကြရန် ကျွန်ုပ်ရေးသားမှာကြားခဲ့၏။ 10 ထိုသို့ ဆိုရာတွင် ဤလောကရှိ တရားနှင့်မညီသော မေထုန်ကို ပြုသူများ၊ လောဘကြီးသူများ၊ လိမ်လည်လှည့်ဖြားသူများ၊ ရုပ်တုကိုးကွယ်သူများနှင့် လုံးဝမပေါင်းဖော်ရဟု မဆိုလိုပါ။ ထိုသို့သာ ဆိုရလျှင် ထိုကဲ့သို့သောသူများကို ရှောင်ကြဉ်ရန် သင်တို့သည် ဤကမ္ဘာလောကမှ ထွက်ခွာသွားရပေမည်။ 11 ကျွန်ုပ်ဆိုလိုသည်မှာ ယုံကြည်သူဖြစ်သည်ဟု ဆိုလျက် တရားနှင့်မညီသော မေထုန်ကို ပြုသူ၊ လောဘကြီးသူ၊ ရုပ်တုကိုးကွယ်သူ၊ ဆဲရေးတိုင်းထွာသူ၊ သောက်စားမူးရူးသူ၊ လိမ်လည်လှည့်ဖြားသူဖြစ်နေလျှင် ထိုသူနှင့် မပေါင်းဖော်ကြရန် သာမက သူနှင့်အတူ စားသောက်ခြင်းကိုပင် မပြုကြနှင့်ဟူ၍ ဖြစ်၏။ 12-13 အသင်းတော်ပြင်ပမှ လူတို့ကို စီရင်ခြင်းသည် ကျွန်ုပ်တာဝန်မဟုတ်ပါ။ ထိုပြင်ပလူတို့ကို ဘုရားသခင် စီရင်တော်မူလိမ့်မည်။ အသင်းတော်အတွင်းမှ လူတို့ကို စီရင်ခြင်းသည် သင်တို့၏ တာဝန်ဖြစ်၏။ “ထိုဆိုးညစ်သောသူကို သင်တို့အထဲမှ ထုတ်ပယ်ကြလော့။” |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.