Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

၁ ကော 6 - ခေတ်သစ်​မြန်မာ သမ္မာကျမ်း


ယုံကြည်သူ​အချင်းချင်း တရားစွဲဆိုမှု​ကို ရှောင်ကြဉ်ခြင်း

1 သင်တို့​သည် အချင်းချင်း အငြင်းပွားမှု​ဖြစ်​သောအခါ ယုံကြည်သောသူတို့​ထံ သွား​၍ သူတို့​၏ စီရင်​ဆုံးဖြတ်ခြင်း​ကို​ခံမည့်​အစား မဖြောင့်မတ်သော​သူတို့​၏ စီရင်​ဆုံးဖြတ်ခြင်း​ကို ခံဝံ့သလော။

2 ယုံကြည်သူတို့​သည် တစ်နေ့​တစ်ချိန်​တွင် ဤ​လောက​ကို စီရင်ရမည်​ဖြစ်ကြောင်း သင်တို့​မသိကြသလော။ ဤ​လောက​ကို စီရင်ရမည့် သင်တို့​သည် သေးငယ်သော​အမှုကိစ္စများ​ကို ကိုယ်တိုင်​စီရင်နိုင်စွမ်း​မရှိသလော။

3 ကျွန်ုပ်တို့​သည် ကောင်းကင်တမန်များ​ကို စီရင်ရမည်​ဖြစ်ကြောင်း သင်တို့​မသိကြသလော။ ထို့ကြောင့် ဤ​လောကီ​ဘဝ​၏ အမှုကိစ္စများ​ကို ပို​၍ ဖြေရှင်း​နိုင်စွမ်း​ရှိရမည်​မဟုတ်လော။

4 ထိုသို့သော အမှုကိစ္စများ​နှင့် ပတ်သက်၍ သင်တို့​၌ အငြင်းပွားမှု​ရှိလျှင် အသင်းတော်​နှင့် မသက်ဆိုင်သော​သူတို့​ကို စီရင်ဆုံးဖြတ်​စေမည်လော။

5 ဤသို့ ကျွန်ုပ်​ပြောရခြင်း​မှာ သင်တို့​ရှက်တတ်​စေရန်​ဖြစ်၏။ သင်တို့​တွင် ယုံကြည်သူ​အချင်းချင်း​ကြား ဤသို့သော အမှုကိစ္စများ​ကို စီရင်​ဆုံးဖြတ်နိုင်သည့် ပညာရှင်​တစ်ဦး​တစ်ယောက်​မျှ မရှိသလော။

6 ယခု​တွင်မူ မယုံကြည်သူများ​ထံသို့ သွား​၍ ယုံကြည်သူ​အချင်းချင်း တရားစွဲဆိုကြပေပြီ။

7 ဤသို့ အချင်းချင်း တရားစွဲခြင်း​ပင်လျှင် သင်တို့​အတွက် ဆုံးရှုံးမှုကြီး​ဖြစ်၏။ တရားစွဲမည့်​အစား မတရားပြုမှု​ကို ခံလိုက်ခြင်း​က ပို​၍ ကောင်းသည်​မဟုတ်လော။ လှည့်စား​လိမ်ယူမှု​ကို ခံလိုက်ခြင်း​က ပို​၍ ကောင်းသည်​မဟုတ်လော။

8 သို့သော် သင်တို့​သည် ကိုယ်တိုင် ယုံကြည်သူ​ချင်း​ကိုပင် မတရားပြု​၍ လှည့်စား​လိမ်ယူကြပြီ။

9 မတရားပြုသော​သူတို့​သည် ဘုရားသခင်​၏​နိုင်ငံတော်​ကို အမွေ​မခံရကြောင်း သင်တို့​မသိကြသလော။ ယူဆမှု​မလွဲကြနှင့်။ တရား​နှင့်​မညီသော မေထုန်​ကို ပြုသူများ၊ ရုပ်တု​ကိုးကွယ်သူများ၊ အိမ်ထောင်ရေး​ဖောက်ပြန်သူများ၊ ယောက်ျားချင်း​ဆက်ဆံသူများ၊

10 သူခိုးများ၊ လောဘကြီးသူများ၊ သောက်စား​မူးရူးသူများ၊ ဆဲရေး​တိုင်းထွာသူများ၊ လှည့်စား​လိမ်ယူသူများ​သည် ဘုရားသခင်​၏ နိုင်ငံတော်​ကို အမွေ​ခံရကြမည်​မဟုတ်ပေ။

11 သင်တို့​ထဲမှ တချို့​သည် ယခင်​က ထိုကဲ့သို့သော​သူများ ဖြစ်ခဲ့ကြ၏။ သို့သော်လည်း ယခု​တွင် သခင်​ယေရှု​ခရစ်တော်​နှင့် ကျွန်ုပ်တို့​ဘုရားသခင်​၏ ဝိညာဉ်တော်​အားဖြင့် စင်ကြယ်ကြပြီ။ သန့်ရှင်းကြပြီ။ ဖြောင့်မတ်သောသူ​အဖြစ် သတ်မှတ်​ခံရကြပြီ။


တဏှာ​လွန်ကြူးမှု​ကို ရှောင်ကြဉ်​ခြင်း

12 သင်တို့​က “ငါ​သည် အရာ​အားလုံး​ကို လုပ်ပိုင်ခွင့်​ရှိသည်” ဟု ဆို၏။ သို့သော် အရာ​အားလုံး​သည် အကျိုး​ရှိသည်​မဟုတ်ပေ။ “ငါ​သည် အရာ​အားလုံး​ကို လုပ်ပိုင်ခွင့်​ရှိသည်” ဟု ဆို​သော်လည်း မည်သည့်​အရာ​၏ စိုးမိုးခြင်း​ကိုမျှ ကျွန်ုပ်​ခံမည်​မဟုတ်။

13 သင်တို့​က “အစာ​သည် ဝမ်း​အတွက် ဖြစ်​၍ ဝမ်း​သည် အစာ​အတွက် ဖြစ်သည်” ဟု ဆိုကြ၏။ ဤ​စကား​သည် မှန်၏။ သို့သော်လည်း တစ်နေ့​တစ်ချိန်​တွင် ဘုရားသခင်​သည် ထို​အရာ​နှစ်မျိုးလုံး​ကို ဖျက်ဆီးတော်မူ​လိမ့်မည်။ ကိုယ်ခန္ဓာ​သည် တရား​နှင့်​မညီသော မေထုန်​ကို​ပြု​ရန်အတွက် မဟုတ်ဘဲ ဘုရားသခင်​အတွက်​သာ ဖြစ်၏။ ဘုရားသခင်​သည်လည်း ကျွန်ုပ်တို့​၏​ကိုယ်ခန္ဓာ​ကို ကြည့်ရှု​စောင့်ရှောက်တော်မူ၏။

14 ဘုရားသခင်​သည် သခင်​ခရစ်တော်​ကို ထမြောက်စေတော်မူ​သကဲ့သို့ ကျွန်ုပ်တို့​ကိုလည်း တန်ခိုးတော်​အားဖြင့် သေရာ​မှ ထမြောက်စေတော်မူ​လိမ့်မည်။

15 သင်တို့​၏ ကိုယ်ခန္ဓာ​သည် ခရစ်တော်​၏ ကိုယ်ခန္ဓာ​အစိတ်အပိုင်း​ဖြစ်ကြောင်း​ကို သင်တို့​မသိကြသလော။ သို့ဖြစ်လျှင် ခရစ်တော်​၏ ကိုယ်ခန္ဓာ​အစိတ်အပိုင်း​ကို ယူ​၍ ပြည့်တန်ဆာ​နှင့် ပေါင်းစည်း​ရမည်လော။ ထိုသို့ လုံးဝ မပေါင်းစည်းရ။

16 လူတစ်ဦး​သည် ပြည့်တန်ဆာ​နှင့် ပေါင်းဖော်​လျှင် ထို​သူ​သည် ထို​ပြည့်တန်ဆာ​နှင့် တစ်သားတည်း​ဖြစ်ကြောင်း​ကို သင်တို့​မသိကြသလော။ ကျမ်းစာ​၌ “သူတို့ နှစ်ဦးတို့​သည် တစ်သားတည်း ဖြစ်ကြ​လိမ့်မည်” ဟု ဖော်ပြထား၏။

17 သခင်ဘုရား​နှင့် ပေါင်းဖော်သောသူ​သည် သခင်ဘုရား​နှင့် တစ်စိတ်​တစ်ဝိညာဉ်​တည်း ဖြစ်၏။

18 တရား​နှင့်​မညီသော မေထုန်​ပြုခြင်း​ကို ရှောင်ကြဉ်ကြလော့။ လူ​ကျူးလွန်တတ်သော အခြား​အပြစ်​အားလုံး​သည် ကိုယ်ခန္ဓာ​၏ ပြင်ပ​တွင် ဖြစ်​သော်လည်း တဏှာ​လွန်ကြူးသော​အပြစ်​မှာမူ မိမိ​ကိုယ်ခန္ဓာ​ကို ပြစ်မှားခြင်း​ဖြစ်၏။

19 သင်တို့​၏ ကိုယ်ခန္ဓာ​သည် ဘုရားသခင်​ထံတော်​မှ သင်တို့​လက်ခံရရှိထားသည့် ဝိညာဉ်တော်​ဟူသော သင်တို့​အထဲ​၌ ကိန်းဝပ်နေသည့် သန့်ရှင်းသော​ဝိညာဉ်တော်​၏ ဗိမာန်​ဖြစ်သည်​ကို မသိကြသလော။ သင်တို့​သည် မိမိကိုယ်ကိုယ် မပိုင်ကြ။

20 အဘယ်ကြောင့်ဆိုသော် ဘုရားသခင်​သည် သင်တို့​ကို အဖိုးအခ​ပေး​၍ ရွေးနုတ်​ဝယ်ယူတော်မူခဲ့​သောကြောင့်​ဖြစ်၏။ ထို့ကြောင့် သင်တို့​၏ ကိုယ်ခန္ဓာ​အားဖြင့် ဘုရားသခင်​၏ ဘုန်းတော်​ကို ထင်ရှားစေကြလော့။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ