Josoa 15 - DIEM PROTESTANTA

Ny zaratany nomena an’i Joda

¹ Izao no zaratany azon’ny foko taranak’i Joda tamin’ny antsapaka mba ho an’ireo tarika ao anatiny. Nitatra hatrany amin’ny sisin-tanin’i Edôma izany; ary ny taniefitr’i Tsina, any Negeba, no farany atsimo.

² Ny sisin-tany ao atsimo dia manomboka eo amin’ny helodrano tendrony atsimo amin’ny Ranomasina Maty,

³ ka nivoaka eo atsimon’ny fiakaran’i Hakrabima ary mandalo an’i Tsina; dia miakatra eo atsimon’i Kadesy-Barnea, mihazo an’i Hetsirôna, miakatra hatrany Adara, vao miolaka ho any Karkà;

⁴ dia mandalo an’i Hatsimôna, mandroso hatrany amin’ny lohasahan-driakan’i Ejipta, ary mihatra amin’ny Ranomasina Mediteranea. Izay ny amin’ny sisin-tanin’ny fokon’i Joda ao atsimo.

⁵ Ny sisin-tany ao atsinanana kosa dia ny Ranomasina Maty, tafapaka hatrany amin’ny vavaranon’i Jôrdàna. Dia manomboka eo amin’io vinany io ny sisin-tany ao avaratra,

⁶ ka niakatra hatrany Bety-Hôgla, mandalo eo avaratr’i Bety-Haraba, ary miakatra hatrany amin’ilay Vato atao hoe Vaton’i Bôhana (i Bôhana dia zanakalahin’i Reobena);

⁷ dia mbola miakatra mankany Debira izany sisin-tany izany, ka mandalo ny lohasaha Hakôra, ary mihodina mianavaratra ho any Gilgala, dia ilay Gilgala manoloana ny fiakaran’i Adomima izay eo atsinanan’ny lohasahan-driaka; avy eo mandalo akaikin’ny loharano Haîna-Semesa ary nihatra tany Haîna-Rôgela;

⁸ dia miakatra ny lohasahan’i Hinôma, amin’ny ilany atsimo manamorona ilay havoana misy ny Jebosita (dia i Jerosalema izany); dia mitohy miakatra ho any an-tampon’ilay tendrombohitra izay eo andrefan’ny lohasahan’i Hinôma sy eo amin’ny farany avaratry ny lohasahan’ny Refaîta;

⁹ avy eo mihodina ho any amin’ny loharano Neftôa, mihazo ireo tanàna any an-tendrombohitr’i Hefrôna, vao mihodina ho any Bahala izay antsoina koa hoe Kiriata-Jeharima;

¹⁰ dia miolaka miankandrefana ho amin’ny tendrombohitra Sehira, mandalo ny ilany avaratry ny tendrombohitra Jeharima izay antsoina koa hoe Kesalôna, midina ho any Bety-Semesa, ary mandalo any Timnà.

¹¹ Avy eo dia mandroso hatrany amin’ny ilany avaratry ny tanàna Hekrôna, ka mihodina ho any Sikarôna, mandalo ny tendrombohitra Bahala, dia mandroso hatrany Jabneela, ary mihatra amin’ny Ranomasina Mediteranea.

¹² Ny sisin-tany ao andrefana dia ny Ranomasina Mediteranea, izany hoe ny morontsiraka. Izay no faritra manodidina ny zaratany azon’ny taranak’i Joda ho an’ireo tarika ao anatiny.

¹³ I Kaleba, zanakalahin’i Jefonè, dia nomena ampahany tao amin’ny tanin’ireo taranak’i Joda, araka izay efa nandidian’ny TOMPO an’i Josoa. Nomena azy i Kiriata-Arbà, na hoe tanànan’i Arbà razamben’ny Hanakita; i Kiriata-Arbà no natao hoe Hebrôna tatỳ aoriana.

¹⁴ Dia noroahin’i Kaleba hiala tao ireo tarika hanakita telo tonta, izany hoe ny tarik’i Sesay sy ny tarik’i Ahimana ary ny tarik’i Talmay, izay samy taranak’i Hanàka.

¹⁵ Avy tao Hebrôna i Kaleba no niainga hamely ny mponina tao Debira izay nantsoina taloha hoe Kiriata-Sefera.

¹⁶ Ary hoy i Kaleba hoe: –Izay olona mamely ka mahafaka an’i Kiriata-Sefera dia homeko azy i Haksa zanako vavy ho vadiny.

¹⁷ I Hôtniela, ilay zanakalahin’i Kenaza rahalahin’i Kaleba, no nahafaka ny tanàna; koa nomen’i Kaleba azy i Haksà zanany vavy ho vadiny.

¹⁸ Ary nony tonga teo amin’i Hôtniela razazavavy, dia nampirisika azy mba hangataka saha amin’i Kaleba rainy; avy eo i Haksà dia nidina niala tamin’ny borikiny. Nanontanian’i Kaleba an-drazazavavy kosa ny zavatra ilainy,

¹⁹ ka novaliany hoe: –Mba anaovy fanomezana aho! Ary satria ngazana ny tany nomenao ahy, dia mba omeo vovon-drano aho. Dia nomen’i Kaleba azy ny loharano teny ambony sy loharano teny ambany.

²⁰ Izany no zaratany nolovan’ny foko taranak’i Joda ho an’ireo tarika ao anatiny.

²¹ Teo amin’ny foko taranak’i Joda dia ireto avy ireo tanàna tamin’ny ilany atsimo nanakaiky ny sisin-tanin’i Edôma: i Kabitseela, i Hedera, i Jagora,

²² i Kinà, i Dimôna, i Hadihadà,

²³ i Kedesa, i Hatsôra, i Jitnàna,

²⁴ i Zifa, i Telema, i Behalôta,

²⁵ i Hatsôra-Hadatà, i Keriôta, i Hetsirôna izay nantsoina koa hoe Hatsôra,

²⁶ i Amama, i Sema, i Môladà,

²⁷ i Hatsôra-Gadà, i Hesmôna, i Bety-Peleta,

²⁸ i Hatsara-Sohala, i Beera-Seba sy ireo tanàna kely mifanila aminy,

²⁹ i Bahala, i Hijima, i Hatsema,

³⁰ i Eltôlada, i Kenila, i Hôrmà,

³¹ i Tsiklaga, i Madmanà, i Sanesanà,

³² i Lebaôta, i Silehima, i Haîna, ary i Rimôna; izany hoe tanàna 29 samy miampy ny tanàna kely miankina aminy.

³³ Ireto avy kosa ireo tanàna teo amin’ny lemak’i Sefelà: i Estaôla, i Tsôrehà, i Adenà,

³⁴ i Zanôà, i Haîna-Ganima, i Tapoà, i Henama,

³⁵ i Jarmota, i Hadolama, i Sôkao, i Hazekà,

³⁶ i Saharaîma, i Haditaîma, i Gedera, ary i Gederôtaîma; izany hoe tanàna 11 samy miampy ny tanàna kely miankina aminy.

³⁷ Ao koa i Tsenàna, i Hadasà, i Migdala-Gada,

³⁸ i Dilehàna, i Mitsepà, i Jôkteela,

³⁹ i Lakisy, i Bôtsekata, i Heglôna,

⁴⁰ i Kabôna, i Lahemasa, i Kitlisa,

⁴¹ i Gederôta, i Bety-Dagôna, i Nahamà, ary i Makedà; izany hoe tanàna 16 samy miampy ny tanàna kely miankina aminy.

⁴² Ankoatra ireo i Libnà, i Hetera, i Hasàna,

⁴³ i Jiftà, i Asenà, i Netsiba,

⁴⁴ i Kehilà, i Akziba, ary i Maresà; izany hoe tanàna sivy samy miampy ireo tanàna kely miankina aminy.

⁴⁵ Ao koa i Hekrôna miampy ny tanàna kely sy zana-bohitra miankina aminy;

⁴⁶ ireo tanàna kely sy zana-bohitra rehetra mifanila amin’i Asdôla ka eo anelanelan’i Hekrôna sy ny Ranomasina Mediteranea;

⁴⁷ i Asdôda sy i Gazà samy miampy ireo tanàna kely sy zana-bohitra miankina aminy, hatrany amin’ny lohasahan-driakan’i Ejipta sy hatrany amoron’ny Ranomasina Mediteranea.

⁴⁸ Ireo tanàna teny amin’ny faritra havoana kosa dia i Samira, i Jatira, i Sôkao,

⁴⁹ i Danà, i Kiriata-Sanà izay nantsoina koa hoe Debira,

⁵⁰ i Hanaba, i Estemao, i Hanima,

⁵¹ i Gôsena, i Hôlôna, ary i Gilao; izany hoe tanàna 11 miampy ireo tanàna kely miankina aminy.

⁵² Ankoatra ireo i Araba, i Domà, i Esihàna,

⁵³ i Janoma, i Bety-Tapoa, i Afekà,

⁵⁴ i Hometà, i Kiriata-Arbà izay nantsoina koa hoe Hebrôna, ary i Tsihôra; izany hoe tanàna sivy miampy ireo tanàna kely miankina aminy.

⁵⁵ Dia ao koa i Mahôna, i Karmela, i Zifa, i Jôtà,

⁵⁶ i Jizrehela, i Jôkdehama, i Zanôà,

⁵⁷ i Kaîna, i Gibehà, ary i Timnà; izany hoe tanàna folo miampy ireo tanàna kely miankina aminy.

⁵⁸ Farany ao koa i Halihola, i Bety-Tsora, i Gedôra,

⁵⁹ i Maharata, i Bety-Hanôta, ary i Eltekôna; izany hoe tanàna enina miampy ireo tanàna kely miankina aminy.

⁶⁰ Tao koa i Kiriata-Bahala izay nantsoina hoe Kiriata-Jeharîma, ary i Rabà; izany hoe tanàna roa miampy ireo tanàna kely miankina aminy.

⁶¹ Ireo tanàna tany an-taniefitra kosa dia i Bety-Harabà, i Midîna, i Sôkôta,

⁶² i Nibsana, ilay tanàna mpamokatra sira, ary i Haîna-Gedỳ; izany hoe tanàna enina miampy ireo tanàna kely miankina aminy.

⁶³ Ireo Jebosita izay mponina tao Jerosalema kosa dia tsy voaroakan’ny taranak’i Joda, ka mbola miara-monina aminy ao Jerosalema mandraka androany.