2Tantara 16 - DIEM PROTESTANTA

Ny ady nifanaovan’i Asà sy i Bahasà mpanjakan’i Israely

¹ Tamin’ny taona faha-36 nanjakàn’i Asà, dia niakatra hanafika ny tanin’i Joda i Bahasà mpanjakan’i Israely ka nanamafy ny tanànan’i Ramà izy mba hisakanan-dalana an’i Asà mpanjakan’i Joda.

² Koa nangalan’i Asà volafotsy sy volamena ny raki-tsoa tao an-tranon’ny TOMPO sy tao an-dapan’ny mpanjaka; dia nalefany ho an’i Bena-Hadada mpanjakan’i Siria izay nipetraka tany Damasy izany sady nombany hafatra hoe:

³ «Aoka hisy fanekena amiko sy aminao, toy izay nisy tamin-draiko sy tamin-drainao. Koa indro mandefa volafotsy sy volamena ho anao aho; fa ndeha tsoahy ny fifanekenao tamin’i Bahasà mpanjakan’i Israely mba hialany amin’ny taniko.»

⁴ Dia neken’i Bena-Hadada ny tenin’i Asà mpanjaka; ary nirahiny ireo filohan-tafiny hamely ny tanànan’i Israely, ka dia nahazo an’i Hiôna sy i Dana ary i Abela-Maîma mbamin’ny tanàna rehetra tany Naftalỳ izay nisy trano fitahirizam-bokatra.

⁵ Nony ren’i Bahasà izany vaovao izany, dia nitsahatra tsy nanamafy ny tanànan’i Ramà intsony izy, fa nampijanona ny asany.

⁶ Novorin’i Asà mpanjaka ny Jodeanina rehetra; ka ireo no nanaisotra ny vato sy ny hazo tao Ramà, izay vao nohamafisin’i Bahasà. Dia nampiasan’i Asà ireo fitaovana ireo hanamafisana an’i Geba sy i Mitsepà.

Naiditr’i Asà am-ponja i Hananỳ mpaminany

⁷ Tamin’izany fotoana izany dia nankeo amin’i Asà, mpanjakan’i Joda, i Hananỳ mpaminany ka nanao taminy hoe: –Tsy ny TOMPO Andriamanitrao no niankinanao fa ny mpanjakan’i Siria; noho izany, dia votsotra tsy ho eo ambany fahefànao ny tafiky ny mpanjakan’i Siria.

⁸ Tsy tafika marobe ve ny Etiôpianina sy ny Libianina ary tsy betsaka ve ny kalesiny ama-mpitaingin-tsoavaliny? Nefa noho ny niankinanao tamin’ny TOMPO, dia natolony teo an-tananao ireo.

⁹ Fa manopy maso ny tany tontolo ny TOMPO mba hanohana izay miraiki-po tanteraka aminy. Adala ianao tamin’io fihetsikao io, ka dia hisy ady hihatra aminao manomboka izao.

¹⁰ Dia tezitra sy nisafoaka tamin’ilay mpahita i Asà noho izany ka nampiditra azy am-ponja. Ary nisy olona sasany koa nampahorîn’i Asà tamin’izay fotoana izay.

Fiafaràn’ny nanjakàn’i Asà

¹¹ Ny tantaran’i Asà, na tamboalohany na tafara, dia voasoratra ao amin’ny Bokin’ireo mpanjakan’i Joda sy i Israely.

¹² Tamin’ny taona faha-39 nanjakàn’i Asà, dia narary mafy tamin’ny tongony izy; kanefa, na niharan’aretina aza izy, dia tsy nitady vonjy tamin’ny TOMPO fa tamin’ny mpitsabo ihany.

¹³ Rehefa maty i Asà tamin’ny taona faha-41 nanjakany ka lasa nodimandry any amin’ny razany,

¹⁴ dia nalevina tao amin’ny fasana izay nolavahany tao an-Tanànan’i Davida. Nampandrina teo amin’ny fandriana efa nofenoina zava-manitra samy hafa araka ny fanaon’ny mpiangaly an’izany izy, ary mbola nandorana zava-manitra betsaka ho fisaonana azy.