Zakaria 2 - Baiboly Katolika

Fisehoana hita faharoa: tandroka sy mpanefy

¹ Nanopy ny masoko aho, ka nahita: dia indreo nisy tandroka efatra.

² Dia hoy aho tamin’ilay Anjely niresaka tamiko: «Inona moa ireto?» Ary hoy izy tamiko: «Ireo no tandroka nampihahaka an’i Jodà sy i Israely ary i Jerosalema.»

³ Ary naneho mpanefy efatra tamiko i Iaveh. Ka hoy aho: «Tonga haninona ireto?»

⁴ Dia namaly Izy nanao hoe: «Iretsy no tandroka nampihahaka an’i Jodà, ka tsy nisy olona nanatràka loha akory; fa ireto kosa, tonga hampahatahotra azy mafy, ary hanjera ny tandrok’ireo firenena nanangan-tandroka hamely ny tanin’i Jodà mba hampihahaka azy.»

Fisehoana hita fahatelo: ilay mpandrefy

⁵ Nanopy ny masoko aho, ka nahita: ka indro nisy lehilahy nitondra kofehy famolaina teny an-tanany.

⁶ Dia hoy aho: «Ho aiza ianao?» Ary hoy izy tamiko: «Handrefy an’i Jerosalema hahitana izay hatao sakany sy izay hatao lavany.»

⁷ Tamin’izay niseho ilay Anjely niresaka tamiko, sady nisy Anjely anankiray hafa niseho hitsena azy;

⁸ ka hoy izy taminy hoe: «Mandehana faingana, milazà amin’io zatovo io, ataovy hoe: ‹Honenana toy ny tanàna tsy mimanda i Jerosalema, fa ho betsaka loatra ny olona sy ny biby ao aminy.

⁹ Ary Izaho, - teny marin’i Iaveh, - no ho manda afo manodidina azy sy hahazo voninahitra eo afovoany.› »

Fiantsoana indroa an’ireo voasesitany

¹⁰ Avia! Avia! Mandosira avy any amin’ny tany avaratra, - teny marin’i Iaveh, - fa naeliko eny amin’ny faravazantany efatra ianareo - teny marin’i Iaveh. -

¹¹ Avia, ry Siôna, vonjeo ny tenanao, ianao izay monina ao amin’ny zanaka vavin’i Babilôna!

¹² Fa izao no lazain’i Iavehn’ny tafika: Ho voninahiny no nanirahany ahy ho any amin’ny firenena namabo anareo; satria izay mikasika anareo mikasika ny anakandriamasony.

¹³ Fa indro Aho manetsika ny tanako eo ambonin’ireny, ka izy ireo ho tonga remby ho an’ireo manompo azy; ary ianareo, hahalala fa i Iavehn’ny tafika no naniraka ahy.

¹⁴ Manaova hobim-pifaliana sy miravoravoa, ry zanaka vavin’i Siôna, fa indro Aho tamy, ary honina ao afovoanao, - teny marin’i Iaveh. -

¹⁵ Amin’izany andro izany, maro ny firenena hiraiki-po amin’i Iaveh, ka ho vahoakako izy ireo; ary Izaho honina ao afovoanao, dia ho fantatrao fa i Iavehn’ny tafika no naniraka ahy ho aminao.

¹⁶ I Iaveh hanana an’i Jodà ho anjarany eo amin’ny tany masina; ary mbola hifidy an’i Jerosalema Izy.

¹⁷ Aoka hangina eo anatrehan’i Iaveh ny nofo rehetra, fa hitsangana avy eo amin’ny fitoeran’ny masina Izy.