Salamo 119 - Baiboly Katolika

SALAMO 119 (Volgata 118) Fiderana ny lalàn’Andriamanitra Alef

¹ Sambatra ny tsy manan-tsiny amin’ny lalany, izay mandeha araka ny lalàn’i Iaveh.

² Sambatra izay mitana ny fampianarany; izay mitady azy amin’ny fony rehetra,

³ tsy mba manao ratsy, fa mandeha eo amin’ny lalany.

⁴ Efa namoaka ny didinao ianao; mba hitandreman’ny olona azy tsara.

⁵ Enga anie ka ho voahitsy ny lalako, mba hitandremako ny didinao!

⁶ Dia tsy hahazo henatra aho, mijery ny didinao rehetra.

⁷ Hidera Anao amin’ny hitsim-poko aho, amin’ny fianarana ny didin’ny fahamarinanao.

⁸ Sitrako ny mitandrina ny didinao: aza dia ilaozanao tokoa aho.

Bet

⁹ Hataon’ny zatovo ahoana no fahatonga ny lalany ho madio? Ny fitandremany tena araka ny teninao.

¹⁰ Mitady Anao amin’ny foko rehetra aho; aza avela hania lavitra ny didinao.

¹¹ Tahirizo miafina ato am-poko ny teninao, mba tsy hanotako aminao.

¹² Hisaorana anie Ianao, ry Iaveh! Ampianaro ny didinao aho.

¹³ Ny molotro no amisavisako ny fitsipika rehetra naloaky ny Vavanao.

¹⁴ Ny manaraka ny fampianaranao dia ahazoako fifaliana toy ny hananako ny harena rehetra.

¹⁵ Sitrako ny misaintsaina ny didinao, sy ny mahira-maso amin’ny lalanao.

¹⁶ Ataoko fifaliana ho ahy ny lalànao; tsy hohadinoiko mandrakizay ny teninao.

Gimel

¹⁷ Anehoy hatsaram-po ny mpanomponao, mba ho velona aho, ka hitandrina ny teninao.

¹⁸ Sokafy ny masoko mba hahitako ny zava-mahagaga ao amin’ny lalànao.

¹⁹ Vahiny aho eto an-tany: aza afenina ahy ny didinao.

²⁰ Ny fanahiko torotoron’ny faniriana izay mampitodika azy lalandava any amin’ny didinao.

²¹ Mandrahona ny mpiavonavona Ianao, dia ireo olom-boaozona, izay mania lavitra ny didinao.

²² Halaviro ahy ny henatra amam-panesoana, fa mitandrina ny fampianaranao aho.

²³ Na dia mipetraka aza ny mpanapaka sy miteny mamely ahy, mbola hisaintsaina ny lalànao ihany ny mpanomponao.

²⁴ Eny, ny fampianaranao no fahafinaretako, izy no olona mpanolo-tsaina ahy.

Dalet

²⁵ Miraikitra amin’ny vovoka ny fanahiko; velomy indray aho araka ny teninao.

²⁶ Naposako Anao ny lalako, dia hoy ny navalinao ahy: Ampianaro ny lalànao aho.

²⁷ Ampafahantaro ahy ny lalan’ny didinao, dia hisaintsaina ny fahagagana ataonao aho.

²⁸ Azon’alahelo ny fanahiko ka latsa-dranomaso, atsangano indray aho araka ny teninao.

²⁹ Halaviro ny lalan’ny lainga aho, fa omeo ahy ny soa ao amin’ny lalànao.

³⁰ Nifidy ny lalan’ny fahamarinana aho, ataoko eo imasoko ny didinao.

³¹ Nifikitra tamin’ny fampianaranao aho; ry Iaveh, aza avela ho azon-kenatra aho.

³² Mihazakazaka eo amin’ny lalan’ny didinao aho, fa nohalalahinao ny foko.

He

³³ Ry Iaveh ô, ampianaro ny lalan’ny didinao aho, mba hitandremako azy hatramin’ny faran’ny aiko.

³⁴ Omeo fahazavan-tsaina aho, hitandremako ny lalànao: sy hankatoavako azy amin’ny foko rehetra.

³⁵ Tariho aho amin’ny lalan’ny didinao, fa ao no hahitako fahasambarana.

³⁶ Atongilano ho amin’ny fampianaranao ny foko, fa tsy ho amin’ny fahazoan-tombony.

³⁷ Avilio tsy hahita izay zava-poana ny masoko; ataovy velona ao amin’ny lalànao aho.

³⁸ Tovy amin’ny mpanomponao ny fampanantenanao, izay nataonao ho an’ny olona matahotra Anao.

³⁹ Esory amiko ny fahafaham-baraka izay atahorako; fa tsara ny didinao.

⁴⁰ Mirehi-paniriana hanaraka ny didinao aho, velomy amin’ny fahamarinanao aho.

Vao

⁴¹ Ho tonga amiko anie ny famindram-ponao, ry Iaveh ô, sy ny famonjenao araka ny teninao!

⁴² Ary ho haiko valiana izay maniratsira ahy, fa mitoky amin’ny teninao aho.

⁴³ Aza esorina amin’ny vavako, tsy hisy intsony, ny tenim-pahamarinana, fa ny didinao no antenaiko.

⁴⁴ Sitrako tsy tapaka ny mitandrina ny didinao; mandrakariva sy mandrakizay.

⁴⁵ Handeha amin’ny malalaka aho, fa ny didinao no katsahiko.

⁴⁶ Hilaza ny fampianaranao eo anatrehan’ny mpanjaka aho, ka tsy ho menatra.

⁴⁷ Ny didinao no hataoko fahafinaretako, fa tiako izy.

⁴⁸ Hanandratra ny tanako amin’ny didinao, izay tiako, aho, ary hisaintsaina ny lalànao.

Jain

⁴⁹ Tsarovy ny teny nomenao ny mpanomponao, izay ampiorenanao ny fanantenako.

⁵⁰ Izany no fiononako ao anatin’ny fahoriako, dia ny hameloman’ny teninao ahy indray.

⁵¹ Manaraby ahy fatratra ireo mpiavonavona, fa tsy mba mivily amin’ny lalànao aho,

⁵² Ny didinao tamin’ny andro taloha no eritreretiko, ry Iaveh, ka mionona aho.

⁵³ Azon’ny hatezerana aho noho ny amin’ny ratsy fanahy, izay mahafoy ny lalànao.

⁵⁴ Ny lalànao no fihirako, eo amin’ny fitoerana fivahiniako.

⁵⁵ Mahatsiaro ny Anaranao aho nony alina, ry Iaveh ô, ka mitandrina ny lalànao.

⁵⁶ Izao no anjara nomena ahy: mitandrina ny didinao aho.

Het

⁵⁷ Ny anjarako, ry Iaveh, lazaiko izany, dia ny mitandrina ny teninao.

⁵⁸ Mitalaho aminao amin’ny foko rehetra aho; mamindrà fo amiko araka ny teninao.

⁵⁹ Mieritreritra ny làlako aho, ka mampiverina ny diako ho araka ny fampianaranao.

⁶⁰ Midodododo aho, fa tsy mangataka andro, hitandrina ny didinao.

⁶¹ Manodidina ahy ny fandriky ny ratsy fanahy, fa tsy manadino ny lalànao aho.

⁶² Mifoha mamatonalina hidera Anao aho, noho ny fitsaràn’ny fahamarinanao.

⁶³ Sakaizan’izay rehetra matahotra Anao aho; mbamin’izay mitandrina ny didinao.

⁶⁴ Henika ny hatsaram-ponao ny tany, ry Iaveh, ampianaro ny lalànao aho.

Tet

⁶⁵ Nanehoanao ny hatsaram-ponao ny mpanomponao, araka ny teninao, ry Iaveh ô!

⁶⁶ Ampianaro ny fahalalana marina amam-pahafantarana aho; fa matoky ny didinao.

⁶⁷ Naniasia aho, fony mbola tsy naetry, fa mitandrina ny teninao aho ankehitriny.

⁶⁸ Tsara fo sy manao soa Ianao, ampianaro ny lalànao aho.

⁶⁹ Misy mpiavonavona, mamoron-dainga hamelezena ahy; izaho kosa, mitandrina ny didinao amin’ny foko rehetra.

⁷⁰ Ny fon’izy ireo tsy mihontsina hoatra ny sabora, izaho kosa mahita ny fahafinaretako ao amin’ny lalànao.

⁷¹ Soa ho ahy ny naetry mba hianarako ny didinao.

⁷² Ny lalàna naloaky ny vavanao no tsara ho ahy; mihoatra noho ny volamena sy volafotsy miavosa.

Iôd

⁷³ Ny Tananao no nanao ahy sy namolavola ahy; omeo fahazavan-tsaina aho, hianarako ny didinao.

⁷⁴ Hifaly amin’ny fahitana ahy, izay matahotra Anao, fa mitoky amin’ny teninao aho.

⁷⁵ Fantatro, ry Iaveh, fa marina ny fitsarànao; tamin’ny fahamarinanao no nanetrenao ahy.

⁷⁶ Ny hatsaram-ponao anie no ho fiononako, araka ny teny nomena ny mpanomponao.

⁷⁷ Ho tonga amiko anie ny fiantranao ary ho velona anie aho, fa ny lalànao no fahafinaretako.

⁷⁸ Aoka ny mpiavonavona nampahory ahy tsy an-drariny ho menatra; izaho kosa misaintsaina ny didinao.

⁷⁹ Aoka hitodika ho atỳ amiko izay matahotra Anao, mbamin’izay mahalala ny fampianaranao.

⁸⁰ Ny foko manontolo anie ho amin’ny lalànao, mba tsy ho menatra aho.

Kaf

⁸¹ Hanìnin’ny fanahiko ny famonjenao; ny teninao no antenaiko.

⁸² Valalanina ny masoko miandry ny fampanantenanao, hoy aho: «Rahoviana no hampionona ahy Ianao?»

⁸³ Fa efa tahaka ny siny hoditra mitanina amin’ny setroka aho, nefa tsy mba manadino ny lalànao.

⁸⁴ Manana andro firy moa ny mpanomponao? Mba rahoviana no hamaizanao izay manenjika ahy?

⁸⁵ Mihady lavaka hahaverezany ahy ireo mpiavonavona, izay mpanohitra ny lalànao.

⁸⁶ Ny didinao rehetra dia fahamarinana; mpanenjika ahy tsy ahoan-tsy ahoana izy ireo: vonjeo aho.

⁸⁷ Efa saiky nolevoniny eto amin’ny tany aho, fa izaho kosa tsy mba nahafoy ny didinao.

⁸⁸ Velomy amin’ny hatsaram-ponao aho, dia hankatò ny fampianaran’ny vavanao.

Lamed

⁸⁹ Iaveh ô, ny teninao, miorina mandrakizay any an-danitra.

⁹⁰ Maharitra amin’ny taona rehetra mifandimby ny fahamarinanao; nanorina ny tany Ianao, dia maharitra izy.

⁹¹ Araka ny lalànao no mbola aharetan’ny zavatra rehetra mandraka androany; fa manaiky ny fandaharanao ny zavatra rehetra.

⁹² Raha tsy ny lalànao no nataoko fahafinaretako, dia efa maty tamin’ny fahoriako aho toy izay.

⁹³ Tsy hohadinoiko mandrakizay ny didinao, fa izy no namelomanao ahy indray.

⁹⁴ Anao aho: dia vonjeo, fa mitady ny didinao.

⁹⁵ Miandry ahy ny ratsy fanahy mba hamono ahy: mihaino tsara ny fampianaranao aho.

⁹⁶ Efa hitako fa misy fetra avokoa ny lavorary, ny didinao no tsy manam-petra.

Mem

⁹⁷ Endrey izany fitiavako ny lalànao! izy no fisaintsainako tontolo andro.

⁹⁸ Ataonao hendry noho ny fahavaloko aho, amin’ny didinao, satria ato amiko mandrakariva izy.

⁹⁹ Hendry noho ny mpampianatra ahy rehetra aho satria ny fampianaranao no fisaintsainako.

¹⁰⁰ Manan-tsaina noho ny anti-panahy aho, satria mitandrina ny didinao.

¹⁰¹ Hazoniko lavitra ny lalan-dratsy rehetra ny tongotro, mba hitandremako ny teninao.

¹⁰² Tsy mba miala amin’ny didinao aho, fa Ianao no nampianatra ahy.

¹⁰³ Endrey, mamy loatra amin’ny lanilaniko ny teninao, manoatra noho ny tantely amin’ny vavako.

¹⁰⁴ Ny didinao dia ahatongavako ho manan-tsaina; noho izany dia mankahala ny lalan’ny fitaka aho.

Non

¹⁰⁵ Ny teninao dia fanilo mialoha ny diako, fahazavana eny an-dalako.

¹⁰⁶ Efa nianiana aho, ary tsy hivadika amin’izany, fa hitandrina ny didim-pahamarinanao.

¹⁰⁷ Tonga amin’ny fara fahoriana aho, Iaveh ô, velomy indray aho araka ny teninao.

¹⁰⁸ Ankasitraho, ry Iaveh, ny fanatitra aloaky ny molotro, ary ampianaro ahy ny didinao.

¹⁰⁹ Hatenda lava izao ny aiko, nefa tsy manadino ny lalànao aho.

¹¹⁰ Mamela-pandrika hamelezana ahy ny ratsy fanahy, nefa tsy mania lavitra ny didinao aho.

¹¹¹ Ny fampianaranao no ananako mandrakizay mba ho lova, fa fifalian’ny foko izy.

¹¹² Nandraika ny foko hitandrina ny didinao aho, mandrakizay, hatramin’ny farany.

Samek

¹¹³ Halako ny olona miroa fo, ary tia ny lalànao aho.

¹¹⁴ Fialofako sy ampingako Ianao mitoky amin’ny teninao aho.

¹¹⁵ Mialà amiko ianareo ratsy fanahy, dia hitandrina ny didin’Andriamanitra aho.

¹¹⁶ Tohano araka ny fampanantenanao aho, mba ho velona, ary aza avela hahazoako henatra ny fanantenako.

¹¹⁷ Aoka ho tohako Ianao, dia ho voavonjy aho, ka ho eo imasoko mandrakariva ny lalànao.

¹¹⁸ Ataonao tsinontsinona izay rehetra mania amin’ny lalànao; satria lainga foana ny hafetseny.

¹¹⁹ Arianao toy ny tain-drendrika ny ratsy fanahy rehetra amin’ny tany; noho izany dia tiako ny fampianaranao.

¹²⁰ Mangovitra noho ny tahotra ny nofoko eo anatrehanao, ary matahotra ny fitsarànao aho.

Ain

¹²¹ Manaraka ny rariny sy ny fahamarinana aho; aza dia afoinao ho an’ny mpampahory ahy aho.

¹²² Aoka Ianao hiantoka ny fananan’ny mpanomponao, ary aoka tsy hampahorin’ny mpiavonavona aho.

¹²³ Valalanina ny masoko miandry ny famonjenao, sy ny fampanantenanao ny fitsarana marina.

¹²⁴ Ento araka ny hatsaram-ponao ny mpanomponao, ary ampianaro ny lalànao aho.

¹²⁵ Mpanomponao aho, ka omeo fahazavan-tsaina, mba hahalalako ny fampianaranao.

¹²⁶ Fotoana tokony hiraharahan’i Iaveh izao, fa mandika ny lalànao izy ireo.

¹²⁷ Noho izany dia tia ny didinao aho, mihoatra ny volamena, sy ny volamena madio.

¹²⁸ Noho izany dia hitako fa marina avokoa ny didinao; halako ny lalam-pitaka rehetra.

Fe

¹²⁹ Mahagaga ny fampianaranao, ka mitandrina azy ny fanahiko.

¹³⁰ Mahazava, ny famelarana ny teninao; ka mampahazo saina ny olona tsotra.

¹³¹ Atanatànako ny vavako, dia mitroka aho, fa lian-kiteny ny didinao aho.

¹³² Atodiho ahy ny Tavanao, ka mamindrà fo amiko; fa rariny izany ho an’izay tia ny Anaranao.

¹³³ Afikiro amin’ny teninao ny diako, ary aza avela hisy haratsiana hanjaka ato amiko.

¹³⁴ Afaho amin’ny fampahorian’ny olombelona aho, dia hitandrina ny didinao.

¹³⁵ Ampamirapirato amin’ny mpanomponao ny Tavanao, ary ampianaro ny lalànao aho.

¹³⁶ Mandrotsa-dranomaso mandriaka ny masoko, noho ny tsy fitandreman’ny olona ny lalànao.

Tsade

¹³⁷ Marina Ianao, ry Iaveh, ary araka ny rariny ny fitsarànao.

¹³⁸ Namoaka ny fampianaranao Ianao araka ny rariny, sy ny fahamarinana lavorary.

¹³⁹ Mandritra aina ahy ny fahazotoako, satria manadino ny teninao ireo mpanohitra ahy.

¹⁴⁰ Voazaha toetra tanteraka ny teninao, ka tia azy ny mpanomponao.

¹⁴¹ Sady kely aho no mavomavo, fa tsy mba manadino ny didinao.

¹⁴² Ny fahamarinanao dia fahamarinana mandrakizay, ary ny lalànao dia fahamarinana.

¹⁴³ Tratry ny fahoriana aman-tebiteby aho; ny didinao no fahafinaretako.

¹⁴⁴ Marina mandrakizay ny fampianaranao, omeo ny fahazavan-tsaina aho, mba ho velona.

Kôf

¹⁴⁵ Miantso Anao amin’ny foko rehetra aho, valio aho, ry Iaveh, mba hitandremako ny lalànao.

¹⁴⁶ Miantso Anao aho, ka vonjeo, mba hanarahako ny fampianaranao.

¹⁴⁷ Alohan’ny mazava atsinanana dia efa mitaraina aminao aho; matoky ny teninao aho.

¹⁴⁸ Mialoha ny fiambenan’alina ny masoko, mba hisaintsaina ny teninao.

¹⁴⁹ Henoy araka ny hatsaram-ponao ny feoko; velomy aho indray, ry Iaveh, araka fandaharanao.

¹⁵⁰ Efa mby akaiky ireo mpanaraka ny ratsy, izay nihataka tamin’ny lalànao.

¹⁵¹ Akaiky Ianao, ry Iaveh, ary fahamarinana avokoa ny didinao.

¹⁵² Efa fantatro ela ny amin’ny fampianaranao, fa naorina ho mandrakizay izy.

Resh

¹⁵³ Jereo ny fahoriako, ka vonjeo aho; fa tsy manadino ny lalànao aho.

¹⁵⁴ Arovy aho amin’ny adiko, ary valio ny ratsy natao tamiko; velomy indray aho araka ny teninao.

¹⁵⁵ Lavitra ny ratsy fanahy ny famonjena, satria tsy asiany raharaha ny lalànao.

¹⁵⁶ Betsaka ny famindram-ponao, ry Iaveh, velomy indray aho araka ny fandaharanao.

¹⁵⁷ Maro ny mpanenjika ama-mpandrafy ahy; tsy mba mihataka amin’ny fampianaranao aho.

¹⁵⁸ Tsiravina aho, mahita ny mpivadika, satria tsy mba mitandrina ny teninao ireny.

¹⁵⁹ Dinihonao fa tiako ny didinao; Iaveh ô, velomy indray aho araka ny hatsaram-ponao.

¹⁶⁰ Fahamarinana no tontalin-kevitry ny teninao, ary mandrakizay avokoa ny lalàn’ny fahamarinanao.

Shin

¹⁶¹ Enjehi-mpanjaka tsy ahoan-tsy ahoana aho; ny teninao no hany atahoran’ny foko.

¹⁶² Mifaly amin’ny teninao aho, hoatra ny mahazo babo be.

¹⁶³ Halako, mahatsiravina ahy ny lainga; tia ny lalànao aho.

¹⁶⁴ Midera Anao impito isan’andro aho, noho ny lalàn’ny fahamarinanao.

¹⁶⁵ Be fiadanana izay tia ny lalànao; ary tsy misy zava-manafintohina azy.

¹⁶⁶ Manantena ny famonjena aho, ry Iaveh, ary manaraka ny didinao.

¹⁶⁷ Mitandrina ny fampianaranao ny fanahiko, ary miraiki-pitia amin’izany izy.

¹⁶⁸ Mitana ny fandaharanao amana fampianaranao aho; fa eo anatrehanao avokoa ny lalako.

Tao

¹⁶⁹ Ho tonga eo anatrehanao anie ny fitarainako, ry Iaveh ô; Omeo fahazavan-tsaina araka ny teninao aho.

¹⁷⁰ Ho tonga hatrany aminao anie fifonako, afaho araka ny teninao aho.

¹⁷¹ Hamoaka fiderana Anao anie ny molotro, satria nampianarinao ahy ny lalànao.

¹⁷² Hitory ny teninao anie ny lelako, fa marina avokoa ny didinao.

¹⁷³ Hivelatra hamonjy ahy anie ny tananao; fa efa nifidy ny fandaharanao aho.

¹⁷⁴ Maniry ny famonjenao aho, ry Iaveh ô, ary ny lalànao no fahafinaretako.

¹⁷⁵ Ho velon-kidera Anao anie ny fanahiko, ary ho avy hamonjy ahy ny fitsarànao.

¹⁷⁶ Mania toy ny ondry very aho: tadiavo ny mpanomponao, fa tsy mba manadino ny didinao aho.