Ohabolana 4 - Baiboly Katolika

Ny fidîn’ny Fahendrena

¹ Henoy, anaka, ny anatry ny ray, ary mitandrema mba hahazo fahalalana,

² fa fampianarana soa no omeko anareo; aza mahafoy ny fampianarako.

³ izaho koa dia zanaka ho an’ikaky fahizay, zanaka tokana sy feno fitiavana teo anilan’ineny.

⁴ Dia notoroany sy nataony hoe: «Aoka ny fonao hitana ny teniko; tandremo ny didiko dia ho velona ianao.

⁵ Mahazoa ny fahendrena, mahazoa ny fahalalana; aza hadinoinao ny tenin’ny vavako, ary aza mivily miala amin’izany.

⁶ Aza mahafoy azy fa harovany ianao; tiavo izy fa hitahiry anao.

⁷ Izao no fiandohan’ny fahendrena: mahazoa ny fahendrena; izay rehetra anananao amidio hahazoana ny fahalalana.

⁸ Tombano ho ambony vidy izy, fa hanandratra anao; fihino tsara, fa ho tonga voninahitrao izy.

⁹ Hasiany fehiloha mahafinaritra ny lohanao; horavahany satroboninahitra tsara indrindra ianao.»

¹⁰ Henoy, anaka, ary raiso ny teniko, dia hihamaro ny taona hiainanao.

¹¹ Manoro anao ny lalam-pahendrena aho, mitarika anao amin’ny sakeli-dalan’ny fahitsiana.

¹² Raha mandeha ianao tsy ho ety lalana, raha mihazakazaka tsy ho tafintohina.

¹³ Tano ny fahalalana ka aza avela; raketo izy fa fiainanao.

¹⁴ Aza miditra ny sakeli-dalan’ny ratsy fanahy, ary aza mizotra amin’ny lalan’ny olon-dratsy.

¹⁵ Halaviro izany fa aza lalovana akory; mivilia ianao, dia mizora.

¹⁶ Fa tsy matory tsy nahefa ratsy ireny; ary tsy mahita tory tsy nahalavo olona;

¹⁷ Mofom-paharatsiana no fihinany, divaim-pahalozàna no fisotrony,

¹⁸ Toy ny fihiratry ny andro maraina ny lalan’ny marina, ka mitombo hazavana hatramin’ny fiposahan’ny andro.

¹⁹ Fa toy ny haizina kosa ny lalan’ny ratsy fanahy, ka tsy tazany akory izay hanafintohina azy.

²⁰ Anaka, tandremo ny teniko, mampandria sofina amin’ny lahateniko.

²¹ Aza avela hanalavitra ny masonao izy, fa tahirizo ao anatin’ny fonao.

²² Satria aina ho an’izay mahazo azy izany, ary fahasalamana ho an’ny vatany manontolo.

²³ Tandremo mihoatra noho ny zavatra rehetra ny fonao; fa avy ao aminy no iavian’ny loharanon’aina.

²⁴ Ampanalaviro ny vavanao ny teny misafelika; ary ampanalaviro ny molotrao ny zavatra tsy marina.

²⁵ Aoka ny masonao hahitsy fijery, ary ny hodi-masonao hanitsy eo anoloanao.

²⁶ Ataovy marina ny alehan’ny tongotrao, ary aoka ho mahitsy ny lalanao rehetra.

²⁷ Aza mivily miankavanana na miankavia; ary esory amin’ny ratsy ny tongotrao.