Nomery 1 - Baiboly Katolika

FANISANA 1. FANISAM-BAHOAKA

¹ Any an’efitra Sinaia, tao an-trano lay fihaonana, tamin’ny andro voalohany amin’ny volana faharoa, taona faharoa taorian’ny nivoahana tany amin’ny tany Ejipta, dia niteny tamin’i Môizy i Iaveh nanao hoe;

² «Alao isa ny fiangonan’ny zanak’i Israely rehetra, araka ny fianakaviany sy ny fokom-pianakaviany avy, ka ny anaran’ny lehilahy rehetra isam-batan’olona no hisaina tsirairay avy,

³ hatramin’ny roapolo taona no ho miakatra, dia ny lehilahy rehetra amin’i Israely izay mahatàm-piadiana. Ianao sy i Aarôna no hanisa azy araka ny isan-tokony avy;

⁴ ary lehilahy iray avy, amin’ny isam-pokony, izay filohan’ny fokom-pianakaviany avy, no hiaraka aminareo.»

Ireo tendrena hanao ny fanisana

⁵ «Ireto no anaran’ny lehilahy hiaraka aminareo: Ny amin’i Robena: Elisora zanak’i Sedeora;

⁶ ny amin’i Simeôna: Salamiela zanak’i Sorisadaia;

⁷ ny amin’i Jodà: Nahasôna zanak’i Aminadaba;

⁸ ny amin’i Isakara: Natanaely zanak’i Soara;

⁹ ny amin’i Zabolôna: Eliaba zanak’i Helona;

¹⁰ ny amin’ny terak’i Josefa: ny amin’i Efraima: Elisamà zanak’i Amioda; ny amin’i Manase: Gamaliela zanak’i Fadasora:

¹¹ ny amin’i Benjamina: Abidàna zanak’i Jedeôna;

¹² ny amin’i Dana: Ahiesera zanak’i Amisadaia;

¹³ ny amin’i Asera: Fegiela zanak’i Okràna;

¹⁴ ny amin’i Gada: Eliafasa zanak’i Doela;

¹⁵ ny amin’i Neftalì: Ahira zanak’i Enàna.

¹⁶ Ireo no voafidy tamin’ny fiangonana. Lohan’ny firenena avy amin’ny razany izy sy mpifehy arivo amin’i Israely.»

¹⁷ Nalain’i Môizy sy i Aarôna ireo olona izay efa voatendry amin’ny anarany avy,

¹⁸ dia nanaika ny fiangonana rehetra izy, ho amin’ny andro voalohan’ny volana faharoa, ka ny hatramin’ny roapolo taona no ho miakatra rehetra, dia samy nosoratana araka ny fianakaviany sy ny fokony, ary noisaina ny anarany isam-batan’olona.

¹⁹ Araka ny nandidian’i Iaveh an’i Môizy; dia nataony ny fanisana tany an’efitra Sinaia.

Ny fanisana ny vahoaka

²⁰ Ny tera-dRobena lahimatoan’i Israely, ny taranak’ireo araka ny fianakaviany sy ny fokom-pianakaviany avy, no nisainy araka ny anarany isam-batan’olona, ny lehilahy rehetra hatramin’ny roapolo taona no ho miakatra, ny lehilahy rehetra mahatàm-piadiana,

²¹ dia nisy 46.500 no voasoratra ho isan’ny fokon-dRobena.

²² Ny terak’i Simeôna, ny taranak’ireo araka ny fianakaviany sy ny fokom-pianakaviany avy, ny voasoratra ho isan’ireo, rehefa nisaina ny anarany isam-batan’olona, ny lehilahy rehetra hatramin’ny roapolo taona no ho miakatra, ny lehilahy rehetra mahatàm-piadiana,

²³ dia nisy 59.300 no voasoratra ho isan’ny fokon’i Simeôna.

²⁴ Ny taranak’i Gada, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

²⁵ dia nisy 45.650 no voasoratra ho isan’ny fokon’i Gada.

²⁶ Ny terak’i Jodà, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

²⁷ dia nisy 74.600 no voasoratra ho isan’ny fokon’i Jodà.

²⁸ Ny terak’i Isakara, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy mahatàm-piadiana,

²⁹ dia nisy 54.400 no voasoratra ho isan’ny fokon’i Isakara.

³⁰ Ny terak’i Zabolôna, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

³¹ dia nisy 57.400 no voasoratra ho isan’ny fokon’i Zabolôna.

³² Ny zanak’i Josefa: ny taranak’i Efraima, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

³³ dia nisy 40.500 no voasoratra ho isan’ny fokon’i Efraima.

³⁴ Ny terak’i Manase, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

³⁵ dia nisy 32.200, no voasoratra ho isan’ny fokon’i Manase.

³⁶ Ny terak’i Benjamina, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

³⁷ dia nisy 35.400 no voasoratra ho isan’ny fokon’i Benjamina.

³⁸ Ny terak’i Dana, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

³⁹ dia nisy 62.700 no voasoratra ho isan’ny fokon’i Dana.

⁴⁰ Ny terak’i Asera, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

⁴¹ dia nisy 41.500 no voasoratra ho isan’ny fokon’i Asera.

⁴² Ny terak’i Neftalì, ny taranak’ireo araka ny fianakaviany sy ny fokom-pianakaviany avy, rehefa nisaina ny anarany hatramin’ny roapolo taona no ho miakatra, ny lehilahy rehetra mahatàm-piadiana,

⁴³ dia nisy 53.400 no voasoratra ho isan’ny fokon’i Neftalì.

⁴⁴ Ireo no voaisa nisain’i Môizy sy i Aarôna, mbamin’izy 12 lahy, filohany amin’i Israely, lehilahy iray avy isam-pokony.

⁴⁵ Ny zanak’i Israely rehetra izay nisaina araka ny fokom-pianakaviany avy, hatramin’ny roapolo taona no ho miakatra, ny lehilahy rehetra amin’i Israely izay mahatàm-piadiana,

⁴⁶ ny voaisa rehetra dia nisy 603.550.

⁴⁷ Tsy mba nisaina niaraka tamin’ireo ny Levita araka ny fokom-pianakaviany.

Fanoratana manokana ny Levita

⁴⁸ Niteny tamin’i Môizy i Iaveh nanao hoe:

⁴⁹ «Aza mba isaina ny fokon’i Levỳ, ary aza mba alaina isa miaraka amin’ny zanak’i Israely izy.

⁵⁰ Fa apetraho aminy kosa ny fikarakarana ny Fonenan’ny vavolombelona mbamin’ny fanaka aman-javatra rehetra momba azy. Izy ireo no hitondra ny Fonenana mbamin’ny fanaka rehetra momba azy; izy no hanao ny fanompoana ao aminy; ary izy no hitoby manodidina ny Fonenana.

⁵¹ Rehefa hifindra ny Fonenana dia ny Levita no hangorona azy; rehefa hiorin-dasy indray ny Fonenana, izy koa no hanangana azy; fa raha olon-kafa no manakaiky eo, dia hohelohin-ko faty.

⁵² Ny zanak’i Israely, dia samy hiorin-dasy ao amin’ny anjara tobiny samy manakaiky ny fanevany araka ny isan-tokony avy.

⁵³ Fa ny Levita kosa dia hitoby manodidina ny Fonenan’ny vavolombelona, mba tsy hipoahan’ny hatezerako ny fiangonan’ny zanak’i Israely, ary ny Levita no hiambina ny Fonenan’ny vavolombelona.»

⁵⁴ Dia notanterahin’ny zanak’i Israely avokoa izay rehetra nandidian’i Iaveh an’i Môizy; nataony izany.