Mpitoriteny 10 - Baiboly Katolika

¹ Fatin-dalitra mahamaimbo sy manimba ny diloilon’ny mpanao zava-manitra; tahaka izany koa ny fahadalana kely mahaleo ny fahendrena amam-boninahitra.

² Ny fon’ny hendry eo ankavanany; ny fon’ny adala kosa eo ankaviany.

³ Ary koa raha mandeha any an-dalana ny adala, dia very hevitra izy, ka maneho ny hadalany amin’ny olona rehetra.

⁴ Raha misondrotra tezitra aminao ny fon’ny mpanapaka, aza miala eo amin’ny fitoeranao, fa ny fahatsindriam-po mahasakana hadisoana be vava.

⁵ Misy ratsy efa hitako atỳ ambany masoandro, tahaka ny hadisoana avy amin’ny mpanjaka izany:

⁶ Ny fahadalana mitana raharaha ambony, ary misy mpanan-karena, mipetraka amin’ny toetra ambany.

⁷ Misy mpanompo hitako mitaingin-tsoavaly, ary andriandahy kosa nandeha tongotra toa mpanompo.

⁸ Izay mihady lavaka mety ho latsaka ao, ary izay mandrava rafi-bato mety hokaikerin’ny menarana.

⁹ Izay manenda-bato, mety haratran’izany; ary ny mamaky hazo mety ho voany.

¹⁰ Raha dombo ny antsy ka tsy asaina ny lelany, dia tsy maintsy manao an’aina ny mpikapa; fa ny fahendrena no metimety kokoa hahombiazana.

¹¹ Raha manaikitra ny bibilava fa tsy natao izay hampahasondriana azy, dia tsy misy tombon-tsoa ho an’ny mpampahasondriana.

¹² Mahafinaritra erỳ ny teny aloaky ny vavan’ny hendry; mihinana ny tenany kosa ny molotry ny adala.

¹³ Ny fiandohan’ny teny avy amin’ny vavany, fahadalana; ary fiafaran’ny lahateniny koa, fahaverezan-tsaina misafoaka.

¹⁴ Mampitombo ny teny ho maro, ny adala!... Tsy fantatry ny olona izay ho avy; ary iza no hilaza aminy izay ho avy any aoriany?

¹⁵ Ny asan’ny adala mandreraka azy; fa ny mankany an-tanàna avy no tsy fantany.

¹⁶ Loza ho anao, ry tany izay manana zaza ho mpanjaka, ary ny mpifehy homana hatry ny vao maraina!

¹⁷ Sambatra ianao, ry tany, izay manana zanak’andriana ho mpanjaka, ary ny mpifehy homana amin’ny fotoanany mety, mba hanohana ny ainy fa tsy hiarana amin’ny fisotro.

¹⁸ Raha kamo ny tanana, miletsy ny lohatrano; ary raha miborera ny tanana, mitete ny trano.

¹⁹ Misakafo ny olona hiaranana amin’ny fahafinaretana; ny divay maharavoravo ny fiainana, ary ny vola, ahazoana ny zavatra rehetra.

²⁰ Aza manozona ny mpanjaka, na ao an-tsainao aza; aza manozona ny manam-pahefana, na eo an’efitrano fandrianao aza; fa ny voromanidina hitondra ny feonao; ary ny biby manana elatra hanely ny teninao.