Joba 5 - Baiboly Katolika

¹ Miantsoa hoe, raha misy olona hamaly anao! iza amin’ireo masina no hitodihanao?

² Ny adala levona amin’ny hatezerany ary ny foka maty amin’ny fisafoahany.

³ Efa nahita ny adala namàka nisandrahaka aho, kanjo vetivety foana dia nanozona ny fonenany.

⁴ Tsy misy famonjena ho an’ny zanany; montsanina eo am-bavahady ireny, nefa tsy manan-kamonjy;

⁵ Ny variny vokatra, dia lanin’ny lehilahy noana, mihoatra ny fefy tsilohery izy, dia mandroba azy; ny hareny koa, areboky ny lehilahy mangetaheta.

⁶ Fa tsy mivoaka avy amin’ny vovoka ny fahoriana, ary tsy mitsimoka amin’ny tany ny fijaliana,

⁷ no ho teraka mba hozoim-pahoriana ny olona, toy ny zanaky ny varatra mba hiakatra fanidina.

⁸ Raha izaho ianao, Andriamanitra no hotodihiko, any aminy no handefasako ny fivavahako.

⁹ Manao zava-dehibe tsy takatry ny saina Izy, zava-mahagaga tsy tambo hisaina.

¹⁰ Izy no mandatsaka ranonorana amin’ny tany, mandefa ny rano eny amin’ny saha,

¹¹ manandratra izay voaetry, ary ny tra-pahoriana mahita hasambarana indray.

¹² Manafoana ny tetikadin’ny mpamadika Izy, ka tsy mahatanteraka ny teti-dratsiny ny tanan’ireny.

¹³ Maningotra ny fetsy amin’ny hafetseny izy, ary mandrava ny tetikadin’ny fetsy ratsy,

¹⁴ ka tojo ny haizina amin’ny antoandro izy ireny ary miraparapa toy ny amin’ny alina, amin’ny mitatao vovonana indrindra.

¹⁵ Hataon’Andriamanitra afaka amin’ny sabatry ny lelan’ireny ny malahelo, sy amin’ny tanan’ny mahery.

¹⁶ Ka mody amin’ny mahantra ny fanantenana, ary ny faharatsiana kosa mikombom-bava.

¹⁷ Sambatra ny olona faizan’Andriamanitra! ka aza atao tsy ho zavatra ny fanitsian’ny Tsitoha.

¹⁸ Fa mandratra Izy, ary mamehy ny ratra; mikapoka Izy, ary manasitrana amin’ny tanany.

¹⁹ Inenina Izy hanafaka anao amin’ny fahoriana; ary amin’ny fanimpitony, dia tsy hahazo anao ny loza.

²⁰ Amin’ny mosary, harovany amin’ny fahafatesana ianao; amin’ny ady, harovany tsy ho voan’ny sabatra ianao.

²¹ Ho voaaro amin’ny kotopian’ny lela ianao, ary tsy hatahotra rehefa avy ny fandringànana.

²² Hihomehezanao ny mosary amam-pandringanana; tsy hatahotra ny biby dia amin’ny tany.

²³ Fa ho vita fanekena aminao ny vato eny an-tsaha; ary hihavana aminao ny biby dia amin’ny tany.

²⁴ Fa hahita ny fiadanana manjaka eo an-dainao ianao; ary hitsidika ny tanim-bilonao ianao, ka tsy hisy diso tsy ao.

²⁵ Ho hitanao ny taranakao mitombo, ary ny solofonao mihamaro, hoatra ny ahitra any an-tsaha.

²⁶ Efa tratra antitra tsara ianao vao hiditra any am-pasana, toy ny amboaram-bary akarina amin’ny fotoany.

²⁷ Izany no voadinikay, izany no marina. Henoy Izy, ary ataovy soa ho anao».