Genesisy 35 - Baiboly Katolika

Niverenan’i Jakôba tany Betela

¹ Ary hoy Andriamanitra tamin’i Jakôba: «Andeha ianao miakatra an’i Betela ka monena any, manangàna ôtely any, ho an’ilay Andriamanitra niseho taminao, fony ianao nandositra teo anoloan’i Esao, rahalahinao.»

² dia hoy i Jakôba tamin’ny fianakaviany, sy tamin’izay rehetra nomba azy: «Ario ny andriamani-kafa eo aminareo; mandiova tena ianareo, ary soloy ny fitafianareo.

³ Fa hiainga isika hiakatra ho any Betela. Hanangana ôtely any aho, ho an’ilay Andriamanitra izay nihaino ahy tamin’ny andron’ny fahoriako, sy nomba ahy tamin’ny lalana nalehako.»

⁴ Dia natolotr’izy ireo an’i Jakôba ny andriamani-kafa rehetra teo an-tanany, sy ny kavina teny an-tsofiny, ka nalevin’i Jakôba teo am-pototry ny terebinta izay ao Sikema.

⁵ Dia lasa izy ireo; ary azon’ny tahotra mafy avy amin’Andriamanitra ny tanàna, eny amin’ny manodidina eny, ka tsy nisy nanenjika ny zanak’i Jakôba.

⁶ Ary i Jakôba sy ny olona rehetra nomba azy tonga tany Loza any amin’ny tany Kanaana, dia i Betela izany.

⁷ Dia nanorina ôtely teo izy, ka nataony hoe El-Betela ny anaran’io tany io, satria teo no nisehoan’Andriamanitra taminy, fony izy nandositra teo anoloan’ny rahalahiny.

⁸ Ary maty i Debôrà, mpitaiza an-dRebekà, ka naleviny teo ambanin’i Betela am-pototry ny oaka anankiray izay nomena anarana hoe: Oakan-dranomaso.

⁹ Niseho tamin’i Jakôba indray koa Andriamanitra nony tafaverina avy any Padan-Arama izy, sady nitso-drano azy.

¹⁰ Hoy Andriamanitra taminy: «Jakôba no anaranao, nefa tsy hatao Jakôba intsony ianao, fa Israely no ho anaranao.» Dia nataony hoe Israely no anarany.

¹¹ Ary hoy Andriamanitra taminy: «Izaho no Andriamanitra mahefa ny zavatra rehetra. Maroa fara sy mitomboa; firenena sy fikambanam-pirenena no ho avy aminao, ary hisy mpanjaka amin’izay haloaky ny kibonao.

¹² Ny tany nomeko an’i Abrahama sy i Isaaka, dia homeko anao, ary homeko ny taranakao mandimby anao izany tany izany.»

¹³ Dia niakatra Andriamanitra niala taminy teo amin’ilay fitoerana niresahany taminy.

¹⁴ Ary i Jakôba nanorina tsangam-bato teo amin’ilay fitoerana niresahany taminy, ka nandraraka fanatitra araraka teo amboniny, sy nandrotsaka diloilo teo.

¹⁵ Nataony hoe: «Betela» ny anaran’ny tany niresahan’Andriamanitra taminy.

Ny nahaterahan’i Benjamina sy nahafatesan-dRasela reniny

¹⁶ Dia niala teo Betela izy; ary nony mbola lavidavitra ihany vao ho tonga tao Efratà, dia teraka i Rasela.

¹⁷ Ka hoy ny mpampivelona taminy nandritra ny fanaintainana nahazo azy teo am-piterahana: «Aza matahotra fa indro hahazo zazalahy indray koa ianao.»

¹⁸ Nony efa hiala ny ainy, fa efa ho faty izy, dia nataony hoe i Benôni ny anarany, fa rainy kosa nanao azy hoe Benjamina.

¹⁹ Dia maty i Rasela, ka nalevina teo amin’ny lalana mankany Efrata dia Betlehema izany.

²⁰ Nanorina tsangam-bato teo ambony fasany i Jakôba, dia ilay tsangam-baton’i Fasan-dRasela, izay mbola eo mandrak’androany.

Toetra mifotitra nataon-dRobena

²¹ Niainga indray i Israely, dia niorin-day tao ambadik’i Magdala-Edera.

²² Raha mbola nipetraka teo amin’izany tany izany i Israely dia avy i Robena ka nandry tamin’i Balà, vaditsindranon-drainy; ary nandre izany i Israely. Roa ambin’ny folo no isan’ny zanakalahin’i Jakôba.

Ireo zanaka roa ambin’ny folon’i Jakôba

²³ Zanak’i Lià: Robena, lahimatoan’i Jakôba, Simeôna, Levi, Jodà, Isakara ary Zabolôna.

²⁴ Zana-dRasela: Josefa sy Benjamina.

²⁵ Zanak’i Balà, ankizivavin-dRasela: Dana sy Neftalì.

²⁶ Zanak’i Zelfah, ankizivavin’i Lià: Gada sy Asera. Ireo no zanakalahin’i Jakôba, naterany tany Padan-Arama.

Ny nahafatesan’i Isaaka

²⁷ Ary i Jakôba tonga tany amin’i Isaaka rainy, tany Mambre, any Kiriat- Arba; dia i Hebrôna izany, izay nitoeran’i Abrahama sy i Isaaka.

²⁸ Valopolo amby zato taona no andro niainan’i Isaaka.

²⁹ Dia niala aina i Isaaka, ka maty, ary nakambana tamin’ny razany; tratra antitra sy lava andro niainana izy. Niara-nandevina azy i Esao sy i Jakôba, zanany.