Ezra 10 - Baiboly Katolika

¹ Raha mbola nitomany sy niankohoka teo anoloan’ny tranon’Andriamanitra i Esdrasa nanao izany fivavahana amam-pieken-keloka izany, dia nisy vahoaka Israelita maro be, lehilahy sy zaza amam-behivavy nivory teo aminy; fa samy nirotsaka be ihany ny ranomason’ny vahoaka.

² Tamin’izay dia niteny i Skeniasa zanak’i Jehiela, amin’ny taranak’i Elama, ka nanao tamin’i Esdrasa hoe: «Nanota tamin’Andriamanitra tokoa izahay, fa namponina eto aminay vehivavy hafa firenena avy amin’ny olona monina amin’ny tany. Ary ankehitriny dia mbola misy fanantenana ho an’i Israely ny amin’izany.

³ Aoka hanao amin’ny Andriamanitsika izahay izao, fa horoahinay mban-janany ireo vehivavy rehetra ireo, araka ny torohevitry ny tompoko sy ireo matahotra eo anoloan’ny didin’Andriamanitsika; dia aoka hatao araka ny lalàna izany.

⁴ Koa mitsangàna ianao, fa adidinao izao raharaha izao. Ary indreto koa izahay momba anao. Matokia, ary ataovy izany.»

⁵ Dia nitsangana i Esdrasa, nampianiana ny lohan’ny mpisorona sy ny Levita mbamin’i Israely rehetra hanatanteraka izany voalaza teo izany, ka dia nianiana izy ireo.

⁶ Raha efa izany, niala teo anoloan’ny tranon’Andriamanitra i Esdrasa dia nankao amin’ny efitranon’i Johanàna, zanak’i Eliasiba; nony tafiditra tao izy, dia tsy nihinan-kanina na nisotro fa nisaona noho ny fahotan’ny zanaky ny fahababoana.

⁷ Koa natao an-kabary eran’i Jodà sy i Jerosalema ny fiantsoana ny zanaky ny fahababoana hivory eo Jerosalema,

⁸ sady nanapa-kevitra ny lehibe sy ny loholona, fa na zovy na zovy tsy tonga ao anatin’ny hateloana, dia horobaina ny fananany ary hoesorina amin’ny fiangonan’ny zanaky ny fahababoana ny tenany.

⁹ Tao anatin’ny hateloan’andro dia vory tao Jerosalema ny lehilahy rehetra amin’i Jodà sy i Benjamina; andro faha roapolon’ny volana fahasivy tamin’izay. Nipetraka teo amin’ny kianjan’ny tranon’Andriamanitra avokoa ny vahoaka rehetra, samy nangovitra noho ity toe-draharaha, sady avy koa ny orana.

¹⁰ Dia nitsangana i Esdrasa mpisorona, ka nanao tamin’izy ireo hoe: «Efa nanota ianareo, fa namponina vehivavy hafa firenena eto aminareo ka nampitombo ny helok’i Israely amin’izany ianareo.

¹¹ Koa samia miaiky heloka eo anatrehan’i Iaveh Andriamanitry ny razanareo ianareo ankehitriny sy manatanteraka ny sitrapony ny amin’ny vehivavy hafa firenena.»

¹² Namaly ny fiangonana rehetra tamin’ny feo avo ka nanao hoe: «Adidinay ny manatanteraka ny voalazanao!

¹³ Fa izao: ny vahoaka ity maro, ny andro manorana; ny mitoetra eto alatrano Akora, tsy azo atao, ny raharaha tsy ho vita indray andro na indroa andro, fa fahotana lehibe no nataonay tamin’izany zavatra izany,

¹⁴ ka aoka ny lehibenay no hijanona eto ho solon’ny fiangonana rehetra, dia izay rehetra namponina vehivavy hafa firenena ao aminy, any an-tanànany, no hankatỳ amin’izay fotoana homena azy, miaraka amin’ny loholona sy ny mpitsara isan-tanàna avy, mandra-pamily hiala amintsika ny firehetan’ny fahatezeran’ny Andriamanitsika, ny amin’io raharaha io.»

¹⁵ Tsy nisy afa-tsy i Jonatàna zanak’i Azahela, sy i Jaasiasa zanak’i Tekoà no hany nanohitra izany hevitra izany; ary i Mosolama sy i Sebetaì Levita koa no niandany taminy.

¹⁶ Fa ny zanaky ny fahababoana dia samy nanaraka izany avokoa. I Esdrasa mpisorona mbamin’ny lehilahy sasany loham-pianakaviana, araka ny firazanany avy, samy voatonona anarana avokoa, dia nitokana ary nipetraka handinika ny raharaha; andro voalohan’ny volana fahafolo tamin’izay.

¹⁷ Ka tamin’ny andro voalohan’ny volana voalohany vao nahavita ny raharaha tamin’ireo lehilahy rehetra namponina tao aminy vehivavy hafa firenena.

Anaran’ireo meloka

¹⁸ Tamin’ny taranaky ny mpisorona dia nisy namponina tao aminy vehivavy hafa firenena. Tamin’ny taranak’i Jôsoe, zanak’i Josedeka mbamin’ireo rahalahiny: i Maasiasa, i Eliezera, i Jiraba, ary i Godoliasa:

¹⁹ nametra-teny fa hisaotra ny vadiny izy ireo, dia niaiky ny hadisoany, ary nanatitra ondralahy iray ho fanonerana ny otany.

²⁰ Tamin’ny taranak’i Emara: i Hananỳ sy i Zebediasa.

²¹ Tamin’ny taranak’i Harima: i Maasiasa, i Elia, i Semeisa, i Jehiela ary i Oziasa.

²² Tamin’ny taranak’i Fasora: i Eliôenaì, i Maasiasa, i Ismaela, i Natanaely, i Jôzabeda ary i Elasà.

²³ Tamin’ny Levita: i Jôzabeda, i Semei, i Kelaiasa, i Kelità ihany io, i Fataisa, i Jodà ary i Eliezera. Tamin’ny mpihira; i Eliasiba.

²⁴ Tamin’ny mpiandry varavarana: i Seloma, i Telema ary i Orì.

²⁵ Ny tamin’i Israely dia izao: Tamin’ny taranak’i Farosa: i Remeiasa, i Jeziasa, i Melkiasa, i Miamima, i Eliezera, i Melkiasa, ary i Banaiasa;

²⁶ tamin’ny taranak’i Elama: i Metaniasa, i Zakaria, i Jehiela, i Abdỳ, i Jerimota ary i Elia;

²⁷ tamin’ny taranak’i Zetoà: i Eliôenaì, i Eliasiba, i Mataniasa, i Jerimota, i Zabada, ary i Azizà;

²⁸ tamin’ny taranak’i Bebay: i Johanàna, i Anania, i Zabay, i Atalay;

²⁹ tamin’ny taranak’i Banỳ: i Mosolama, i Melòka, i Adaiasa, i Jasoba, i Saala, ary i Ramôta;

³⁰ tamin’ny taranak’i Falata-Moaba: i Ednà, i Kalala, i Banaiasa, i Maasiasa, i Mataniasa, i Beseleela, i Benoy, ary i Manase;

³¹ tamin’ny taranak’i Harima: i Eliezera, i Jesiasa, i Melkiasa, i Semeiàsa, i Simeôna,

³² i Benjamina, i Melòka, i Samariasa;

³³ tamin’ny taranak’i Hasoma: i Matanay, i Matatà, i Zabeda, i Elifeleta, i Jermay, i Manase, i Semei;

³⁴ tamin’ny taranak’i Banỳ: i Maadỳ, i Amrama, i Oela,

³⁵ i Banaiasa, i Badaiasa, i Keliao,

³⁶ i Vaniasa, i Merimota, i Eliasiba,

³⁷ i Mataniasa, i Matanay, i Jasỳ,

³⁸ i Banỳ, i Benoy, i Semei,

³⁹ i Salmiasa, i Natàna, i Adaiasa,

⁴⁰ i Mekmedebay, i Sisay, i Saray,

⁴¹ i Ezrela, i Semiao, i Semeriasa,

⁴² i Seloma, i Amariasa, i Josefa;

⁴³ tamin’ny taranak’i Nebô: i Jehiela, i Matatiasa, i Zabada, i Zabinà, i Jedao, i Joela, ary i Banaiasa.

⁴⁴ Naka vehivavy hafa firenena ho vady avokoa ireo lehilahy ireo, sady efa niteraka taminy ny maromaro amin’ireo.