Eksodosy 30 - Baiboly Katolika

Otely fandorana ny zava-manitra

¹ «Hanao ôtely fandorana emboka ianao, hataonao amin’ny hazo akasià;

² iray hakiho ny lavany, iray hakiho ny sakany, ka hitovy ny lafiny efatra, ary roa hakiho ny haavony; iray amin’ny tandrony.

³ Hopetahanao takela-bolamena madio ny tampony, ny lafiny manodidina, ny tandrony, ary hasianao koronosy volamena manodidina izy.

⁴ Hanaovanao masom-bolamena roa izy eo ambanin’ilay koronosy eo amin’ny rirany roa, hataonao amin’ny laniny roa, hidiran’ny bao hitondrana azy.

⁵ Hataonao amin’ny hazo akasià ny bao, ary hopetahanao takela-bolamena izy.

⁶ Io ôtely io dia hapetrakao manatrika ny efitra lamba izay eo anoloan’ny fiaran’ny vavolombelona, manatrika ny fanaovam-panavotana izay eo ambonin’ny vavolombelona, dia eo amin’izay hihaonako aminao.

⁷ Eo no handoroan’i Aarôna ny emboka; isa-maraina no handoroany azy, rehefa mamboatra ny lalampy izy;

⁸ ary isaky ny àty takariva koa no handoroany azy, rehefa mametraka ny lalampy eo amin’ny fanaovan-jiro izy. Emboka manitra mandrakizay eo anatrehan’i Iaveh izany amin’ny taranakareo.

⁹ Aza misy atolotrareo eo ambonin’io ôtely io, na ny zava-manitra tsy masina na ny sorona dorana na ny fanatitra, ary aza araraka eo ny fanatitra araraka.

¹⁰ Eo amin’ny tandrok’io ôtely io no hanaovan’i Aarôna ny fanoneram-pahotana indray mandeha isan-taona; ny ran’ny sorona fanoneram-pahotana no hanaovany ny fanoneram-pahotana ao, indray mandeha isan-taona, hatramin’ny taranaka mifandimby. Ho masina indrindra amin’i Iaveh io ôtely io.»

Hetra isan’olona

¹¹ Ary niteny tamin’i Môizy i Iaveh nanao hoe:

¹² «Raha avy izay hanisanao ny zanak’i Israely mba hahitana ny isany, dia samy hanome avotra aina ho an’i Iaveh izy tsirairay avy rehefa hatao ny fanisana azy, mba tsy hisy loza manjò azy, amin’ny fanisana azy.

¹³ Izao no haloan’izay rehetra anatin’ny voaisa: antsasaky ny sikla masina izay roapolo gerà; antsasaky ny sikla no ho fanatitra halaina ho an’i Iaveh.

¹⁴ Samy handoa ny hajian’i Iaveh avokoa ny lehilahy anatin’ny voaisa rehetra hatramin’ny roapolo taona no ho miakatra.

¹⁵ Ny mpanan-karena tsy handoa mihoatra, ny mahantra tsy handoa latsaka ny antsasaky ny sikla amin’ny fandoavana ny hajian’i Iaveh ho avotry ny ainareo.

¹⁶ Horaisinao amin’ny zanak’i Israely ny vola avy amin’izany avotra izany ka hoenti-manao ny raharaha momba ny trano lay fihaonana. Dia ho antoka eo anatrehan’i Iaveh izany, ho an’ny zanak’i Israely hanavotana ny ainy.»

Ny tavy varahina

¹⁷ Niteny tamin’i Môizy koa i Iaveh nanao hoe:

¹⁸ «Hanao tavy varahina, misy faladiany varahina, hatao fiafanana ianao, ka hapetrakao eo anelanelan’ny trano lay fihaonana sy ny ôtely,

¹⁹ dia hasianao rano, hangalan’i Aarôna sy ny zanany hanasany ny tanany aman-tongony.

²⁰ Fa hiàfana amin’io rano io izy mba tsy ho faty, na rehefa hiditra amin’ny trano lay fihaonana, na rehefa hanatona ny ôtely hanao ny raharahany hampanetona sorona amin’i Iaveh.

²¹ Hanasa ny tongony aman-tanany izy, ka tsy ho faty izy. Lalàna mandrakizay ho azy ireo izany, dia ho an’i Aarôna sy ny taranany amin’ny taona mifandimby.»

Ny menaka fanosotra

²² Hoy koa i Iaveh tamin’i Môizy:

²³ «Makà amin’ny zava-manitra izay tsara indrindra, mira madio dimanjato sikla, ary ny antsasak’izany, dia sinama mamerovero dimampolo sy roan-jato sikla, veromanitra dimampolo sy roan-jato sikla,

²⁴ kasa dimanjato sikla, araka ny sikla masina, ary diloilon’ôliva iray hina;

²⁵ ka amboary izany ho diloilo hanaovana ny fanosorana masina; ho zava-manitra voaharoharo araka ny asan’ny mpahay zava-manitra; dia izany no diloilo hanaovana ny fanosorana masina.

²⁶ Io no hanosoranao ny trano lay fihaonana, ny fiaran’ny vavolombelona,

²⁷ ny latabatra mbamin’ny fanaka momba azy rehetra, ny fanaovan-jiro mbamin’ny fanaka momba azy, ny ôtely fandoroan-java-manitra,

²⁸ ny ôtely fanaovan-tsorona dorana mbamin’ny fanaka rehetra momba azy, ary ny tavy varahina mbamin’ny faladiany.

²⁹ Hohamasininao ireo dia ho masina indrindra ary ho masina avokoa izay hikasika azy.

³⁰ Hohosoranao koa i Aarôna sy ny zanany, ary hohamasininao izy, mba ho mpisorona hanao fanompoana Ahy.

³¹ Mitenena amin’ny zanak’i Israely ka lazao hoe: Ho diloilo fanaovana fanosorana masina izany ho Ahy, hatrany amin’ny taranaka mifandimby.

³² Tsy hararaka amin’ny tenan’ny olona izany, ary hamorona hafa tahaka an’io ianareo amin’izay zavatra hamoronana an’io, fa zava-masina izany, ka tsy maintsy hataonareo ho zava-masina.

³³ Na zovy na zovy hanamboatra tahaka an’io na hanosotra izany amin’ny olona tsy fanosotra azy, dia hofongorana tsy ho eo amin’ny fireneny.»

Ny zava-manitra

³⁴ Hoy i Iaveh tamin’i Môizy: «Makà zava-manitra, ditin-kazo, ongila mani-pofona, galbanôma, zava-manitra sy emboka tsy mifaho zavatra hafa, izany rehetra izany ampitovio fatra.

³⁵ Dia ireo no hanamboaranao zava-manitra hanaovana ny fanembohana, voaharoharo araka ny asan’ny mpahay zava-manitra; asio sira izy, ary aoka ho madio sy masina.

³⁶ Torotoroy hanjary vovony izy, dia ametraho eo anoloan’ny vavolombelona ao an-trano lay fihaonana izay hihaonako aminao. Ho zava-masina indrindra izany.

³⁷ Izany zava-manitra hataonareo izany dia tsy azonareo anaovana mitovy aminy ho anareo, fa hataonareo ho zava-masina ho an’i Iaveh.

³⁸ Ka na zovy na zovy hanao mitovy amin’izany hanamboloany ny havany, dia hofongorana tsy ho eo amin’ny fireneny.»