1Korintiana 1 - Baiboly Katolika

TENY MIALOHA Fiarahabana sy fisaorana an’Andriamanitra

¹ I Paoly voaantso ho Apôstôlin’i Jesoa Kristy noho ny sitrapon’Andriamanitra, sy i Sôstena rahalahy

² mamangy ny Eglizin’Andriamanitra any Kôrinty, dia ireo mpino nohamasinina ao amin’i Jesoa Kristy, olona voaantso sady masina, mbamin’izay rehetra miantso ny Anaran’i Jesoa Kristy Tompontsika, na aiza na aiza misy azy:

³ ho ao aminareo anie ny fahasoavana amam-piadanana avy amin’Andriamanitra Raintsika, sy i Jesoa Kristy Tompo.

⁴ Isaorako an’Andriamanitra mandrakariva ny aminareo, noho ny fahasoavan’Andriamanitra nomena anareo ao amin’i Jesoa Kristy:

⁵ fa noho ny firaisanareo aminy, tonga manan-karena amin’ny zavatra rehetra ianareo, dia amin’ny teny rehetra sy amin’ny fahalalana rehetra;

⁶ ary noho ny niorenan’ny Evanjelin’i Kristy eo aminareo,

⁷ dia tsy latsa-danja noho ny hafa ianareo amin’ny fahasoavana rehetra, hany ka miandry amim-pitokiana ny fisehoan’i Jesoa Kristy Tompontsika.

⁸ Izy ihany koa no hampiorina anareo hatramin’ny farany, mba tsy hanan-tsiny ianareo amin’ny andron’i Jesoa Kristy Tompontsika.

⁹ Eny, mahatoky Andriamanitra Izay niantso anareo hiray amin’ny Zanany, dia i Jesoa Kristy Tompontsika.

I. FISARATSARAHANA SY FANAFINTOHINANA Fitsitokotokoana teo amin’ny mpino

¹⁰ Mihanta aminareo amin’ny Anaran’i Jesoa Kristy Tompontsika aho, ry kristianina havana, mba hiray teny daholo ianareo, ka tsy hisy fisarahana eo aminareo, fa ho tafakambana tsara amim-piraisan-tsaina sy hevitra avokoa ianareo.

¹¹ Reko tamin-dry i Klôe anie ny aminareo e, fa hoe misy fifandirana ao aminareo;

¹² izany hoe, ny sasany aminareo manao hoe: «Izaho an’i Paoly, ny sasany kosa manao hoe: ‹Izaho an’i Apôlô, na izaho an’i Sefasy›, na ‹izaho an’i Kristy!› »

¹³ Voazarazara va i Kristy? Ary i Paoly va no voafantsika tamin’ny Hazofijaliana ho anareo, sa tamin’ny anaran’i Paoly no natao Batemy ianareo?

¹⁴ Misaotra an’Andriamanitra aho, fa tsy nisy nataoko Batemy ianareo, afa-tsy i Krisposy sy i Kaiosy,

¹⁵ mba tsy hisy hahazo milaza fa natao Batemy tamin’ny anarako.

¹⁶ Nataoko Batemy ihany koa ny fianakavian’i Stefanasy, fa tsy hitako izay nataoko Batemy afa-tsy ireo.

Ny fahendren’izao tontolo izao sy ny fahendren’ny kristianina

¹⁷ Tsy ny hanao Batemy no nanirahan’i Kristy ahy, fa ny hitory ny Evanjely. Tsy tamin’ny lahateny kanto anefa, fandrao foanan’izany ny Hazofijalian’i Kristy.

¹⁸ Fa hadalana ny fampianarana ny amin’ny Hazofijaliana ho an’izay very, ary herin’Andriamanitra kosa izany amintsika voavonjy,

¹⁹ satria voasoratra hoe: Hofoanako ny fahendren’ny hendry; ary holaviko ny fahaizan’ny mahay.

²⁰ Aiza ny hendry? Aiza ny mpanora-dalàna? Aiza ny mpiady hevitr’izao tontolo izao? Tsy nahariharin’Andriamanitra ho fahadalana va ny fahendren’izao tontolo izao?

²¹ Fa noho ny fahendren’Andriamanitra, dia tsy nahalala an’Andriamanitra ny fahendren’izao tontolo izao, ka dia ny hadalan’ny fitorian-teny no sitrak’Andriamanitra hamonjena an’izay mino.

²² Fa ny Jody mila famantarana; ny Jentily mitady fahendrena;

²³ ary izahay kosa mitory an’i Kristy voafantsika tamin’ny Hazofijaliana. Fanafintohinana amin’ny Jody izany, ary fahadalana amin’ny Jentily;

²⁴ fa i Kristy herin’Andriamanitra sy fahendren’Andriamanitra kosa amin’izay voaantso, na Jody na Jentily.

²⁵ Fa izay toa fahadalàn’Andriamanitra dia hendry noho ny fahendren’ny olombelona, ary izay toa fahalemen’Andriamanitra dia mahery noho ny herin’ny olombelona.

²⁶ Jereo, ry kristianina havana, izato ianareo voaantso e: tsy firy no hendry araka ny nofo, tsy firy no mahery, tsy firy no avo razana!

²⁷ fa izay ataon’izao tontolo izao ho adala no nofidin’Andriamanitra hampahamenatra ny hendry; izay ataon’izao tontolo izao ho malemy no nofidin’Andriamanitra hampahamenatra ny mahery;

²⁸ ary izay iva razana amana faneso amin’izao tontolo, dia ny atao ho tsy misy aza, no nofidin’Andriamanitra hahatsinontsinona ny misy,

²⁹ mba tsy hisy nofo hirehareha eo anatrehan’Andriamanitra.

³⁰ Fa avy aminy no maha-ao amin’i Kristy Jesoa anareo, dia Ilay nataon’Andriamanitra fahendrena sy fahamarinana ary fahamasinana amam-panavotana ho antsika,

³¹ mba ho tanteraka ny voasoratra hoe: Izay mirehareha, aoka ny Tompo no ho reharehany.