1Tantara 16 - Baiboly Katolika

¹ Nony efa voampiditra ny fiaran’Andriamanitra sy efa napetraka tao afovoan’ny lay naorin’i Davida ho azy, dia nanatitra sorona dorana sy sorom-pihavanana teo anatrehan’Andriamanitra ny olona.

² Nony vitan’i Davida ny fanolorana ny sorona dorana sy ny sorom-pihavanana, dia nitso-drano ny vahoaka tamin’ny Anaran’i Iaveh izy.

³ Ary ny olona rehetra tamin’i Israely na lahy na vavy, dia nizarany mofo iray avy, sy hena iray didy ary ampempam-boaloboka iray.

Ny ataon’ny Levita eo anoloan’ny fiara.

⁴ Nisy Levita sasany notendren’i Davida hitoetra eo anatrehan’ny fiaran’i Iaveh mba hanao ny fanompoana amin’ny fangatahana, fankalazana sy fiderana an’i Iaveh Andriamanitr’i Israely;

⁵ dia i Asafa filohany, i Zakaria faharoa, dia i Jahiela, i Semiramôta, i Jehiela, i Matatiasa, i Eliaba, i Banaiasa, i Obededôma ary i Jehiela, izay nanan-java-maneno, lokanga, harpa, ary i Asà nampaneno ny kipantsona,

⁶ i Banaisa sy i Jaziela mpisorona nitsoka anjomara lalandava, teo anoloan’ny fiaran’ny faneken’Andriamanitra.

⁷ Tamin’izay andro izay no voalohany nanapahan’i Davida, fa ny feon’i Asafa sy ny rahalahiny no hankalazana an’i Iaveh:

⁸ «Miderà an’i Iaveh, miantsoa ny Anarany, ampahafantaro ny firenena ny zava-dehibe nataony.

⁹ Manaova hira fanajana Azy, mihirà Salamo fanajana Azy. Torio ny fahagagana rehetra nataony.

¹⁰ Ataovy rehareha ny Anarany masina, aoka ho faly ny fon’izay mitady an’i Iaveh.

¹¹ Katsaho i Iaveh sy ny heriny, tadiavo lalandava ny tavany.

¹² Tsarovy ny zava-mahatalanjona nataony, ny fahagagany sy ny fitsaràn’ny vavany,

¹³ ry taranak’i Israely mpanompony, ry terak’i Jakôba, ianareo olom-boafidiny.

¹⁴ Izy, Iaveh no Andriamanitsika, mahazo ny tany rehetra ny fitsaràny.

¹⁵ Tsahivo mandrakariva ny fanekeny, ny teny nataony ho an’ny taranaka arivo mandimby.

¹⁶ Fanekena nifanaovany tamin’i Abrahama, ny fianianana nataony ho an’i Isaaka,

¹⁷ izay naraikiny ho lalàna tamin’i Jakôba, ary ho fanekem-pihavanana mandrakizay ho an’i Israely,

¹⁸ nataony hoe: ‹Homeko anao ny tany Kanaana, ho anjara lovanao.›

¹⁹ Fony mbola mora isaina ianareo, vitsy isa, sady vahiny tamin’ny tany,

²⁰ nivezivezy nifindra firenena izy ireo, avy amin’ny fanjakana iray ho amin’ny vahoaka hafa,

²¹ tsy navelany hampahory azy, fa izy ireo aza namaizany mpanjaka:

²² aza mitendry ireo voahosotra, aza manisy ratsy ny mpaminaniko.

²³ Mihirà ho an’i Iaveh, ry mponina amin’ny tany rehetra, torio isan’andro ny famonjeny.

²⁴ Ambarao amin’ny firenena ny voninahiny ary amin’ny vahoaka rehetra ny fahagagany.

²⁵ Fa lehibe i Iaveh ka mendrika hoderaina indrindra, ary mahatahotra mihoatra ireo andriamanitra rehetra Izy;

²⁶ fa ny andriamanitry ny firenena rehetra dia sampy. Ary i Iaveh no nanao ny lanitra;

²⁷ fiandrianana amam-pamirapiratana no eo anatrehan’ny Tavany, ary hery aman-kafaliana no eo amin’ny fonenany.

²⁸ Omeo an’i Iaveh, ry fianakaviam-pirenena, omeo an’i Iaveh ny voninahitra sy ny fahefana;

²⁹ omeo an’i Iaveh ny voninahitra ho an’ny Anarany. Mitondrà fanatitra ka mankanesa eo anatrehany; mitsaoha an’i Iaveh amin’ny fanamiana masina.

³⁰ Mangovita eo anatrehany, ry mponina amin’ny tany rehetra, ary izao tontolo izao, voaarina, tsy mba hivembena.

³¹ Aoka hifaly ny lanitra, ary aoka hiravo ny tany! Aoka holazaina eram-pirenena ny hoe: ‹Mpanjaka i Iaveh!›

³² Aoka hirohondrohona ny ranomasina, mbamin’izay rehetra eo aminy! Aoka hisomebiseby ny saha, mbamin’izay rehetra eo aminy!

³³ Ary aoka hanandra-peo fifaliana ny hazo an’ala, eo anatrehan’i Iaveh fa avy hitsara ny tany Izy.

³⁴ Miderà an’i Iaveh fa tsara Izy, fa maharitra mandrakizay ny famindram-pony.

³⁵ Lazao hoe: ‹Vonjeo izahay, ry Andriamanitry ny famonjena anay! angony izahay ary tsoahy avy eo amin’ny firenena, mba hankalazanay ny Anaranao masina sy hanaovanay ho reharehanay ny fiderana Anao.›

³⁶ Hisaorana anie i Iaveh Andriamanitr’i Israely, Hatramin’ny mandrakizay, ka ho mandrakizay.» Ary ny vahoaka rehetra nanao hoe: «Amen!» sy hoe: «Miderà an’i Iaveh!»

³⁷ Dia navelan’i Davida teo anoloan’ny fiaran’ny faneken’i Iaveh i Asafa mbamin’ireo rahalahiny, mba hanao tsy tapaka ny fanompoana eo anoloan’ny Fiara, araka ny anjara raharahany isan’andro.

³⁸ Toy izany koa i Obededôma mbamin’ireo rahalahiny 68, i Obededôma zanak’i Iditona ary i Hosa, ho mpiandry varavarana.

³⁹ Toy izany koa i Sadaoka mpisorona, mbamin’ireo mpisorona rahalahiny, teo anoloan’ny Fonenan’i Iaveh teo amin’ny fitoerana avo tao Gabaôna,

⁴⁰ mba hanolotra sorona dorana tsy tapaka, maraina sy hariva, amin’i Iaveh, eo anoloan’ny ôtely fanaovan-tsorona dorana, sy hanao izay rehetra voasoratra ao amin’ny lalàn’i Iaveh izay nandidiany an’i Israely.

⁴¹ Teo akaikin’ireo i Hemàna sy i Iditona mbamin’ny sisan’ireo voafidy sy voatonona anarana, hidera an’i Iaveh, fa maharitra mandrakizay ny famindram-pony.

⁴² Niaraka tamin’ireo, dia niaraka tamin’i Hemàna sy i Iditona, dia nisy anjomara aman-kipantsona ho an’ireo tsy maintsy mampaneno azy, mbamin’ny zava-maneno hampiarahina amin’ny hiran’Andriamanitra. Ny zanak’i Iditona niadidy ny varavarana.

⁴³ Samy nody tany an-tranony avy ny vahoaka rehetra, ary i Davida koa nody hitso-drano ny ankohonany.