1Samoela 2 - Baiboly Katolika

Tononkiran’i Anà

¹ Ary nivavaka i Anà ka nanao hoe: «Ny foko misomebin-kafaliana amin’i Iaveh, ny tandroko nasandratr’i Iaveh, ny vavako misokatra hamely ny fahavaloko; fa mifaly amin’ny famonjenao aho.

² Tsy misy masina tahaka an’i Iaveh, fa tsy misy afa-tsy Ianao no Izy; tsy misy vatolampy tahaka ny Andriamanitsika.

³ Aza dia fatra-piteny avonavona na mamoaka vava midaondaom-poana. Fa Andriamanitra mahalala ny zavatra rehetra i Iaveh, ary velon-ko tsinontsinona ny asan’ny olombelona.

⁴ Ny olo-mahery tapa-tsipìka fa ny osa kosa misikina hery.

⁵ Ny voky taloha mikarama mofo, fa ny noana kosa afa-kanoanana; ny momba aza miteraka fito, fa ny maro anaka kosa mihamalazo.

⁶ I Iaveh no mahafaty sy mahavelona; mampidina any amin’ny fonenan’ny maty sy mampiakatra avy any koa.

⁷ I Iaveh no mampahantra sy mampanan-karena. Izy no mampietry sy manandratra.

⁸ Esoriny amin’ny vovoka ny mahantra; atsangany hiala amin’ny zezika ny tsy manana, hampiarahiny mitoetra amin’ny mpanjaka, ary homeny seza fiandrianana be voninahitra ho anjarany. Fa an’i Iaveh ny andrin’ny tany, ary teo amboniny no nametrahany ny tany.

⁹ Ny dian’ny olo-masina hotandremany, fa ny ratsy fanahy kosa ho very any amin’ny maizina. Satria tsy ny hery no hahombiasan’ny olona.

¹⁰ I Iaveh! ho torotoro ny fahavalony, any ambonin’ny lanitra no hikotrohany amin’ireny; hotsarain’i Iaveh ny vazantany rehetra. Homeny hery ny mpanjakany, ary hasandrany ny tandroky ny nohosorany.»

¹¹ Dia nandeha i Elkanà nody tany an-tranony any Ramà; ary ny zaza nijanona nanompo an’i Iaveh teo anatrehan’i Helì, mpisorona.

Ireo zanak’i Helì

¹² Ary ny zanak’i Helì dia olon’i Beliala, tsy nahalala an’i Iaveh akory;

¹³ fa izao no fanaon’izy mpisorona tamin’ny vahoaka: Raha misy olona manatitra sorona, dia tamy ny mpanompon’ny mpisorona dieny mbola andrahoina ny hena sady mitondra fitrebika telo rantsana izy;

¹⁴ dia atsobony ao anatin’ny vilany lehibe na nongo na vilany, na vilanin-daoka; ka izay rehetra azon’ny fitrebika avy ao, dia alain’ny mpisorona ho azy. Ataony toy izany avokoa ny Israelita tonga ao Silao.

¹⁵ Mbola tsy voadoro akory ny sabora, dia tonga ny mpanompon’ny mpisorona, milaza amin’izay manatitra sorona hoe: «Omeo hena aho, hatsatsika ho an’ny mpisorona, fa tsy handray hena masaka aminao izy, fa ny mbola manta ihany.»

¹⁶ Ary raha miteny aminy ny olona manao hoe: «Aoka aloha hodorana hanetona ny sabora, vao izay vao maka izay tianao ianao» dia valian’ity mpanompo manao hoe: «Tsia, omeo ankehitriny izao ihany, fa raha tsy izany dia halaiko ankehitriny.»

¹⁷ Ka dia heloka be vava teo anatrehan’i Iaveh ny an’ireo zatovo ireo, satria nahatarika fanaratsiana ny fanatitra ho an’i Iaveh izany olona izany.

I Samoela tany Silao

¹⁸ Nanao ny fanompoana teo anatrehan’i Iaveh i Samoela, ary efôda rongony no natafiny ny zaza.

¹⁹ Nanaovan-dreniny akanjo kely izy, nentiny ho azy isan-taona, rehefa miara-miakatra amin’ny vadiny izy, hanatitra ny sorona fanao isan-taona.

²⁰ Ary i Helì nitso-drano an’i Elkanà mivady ka nanao hoe: «Homen’i Iaveh taranaka amin’ity vehivavy ity anie ianao noho ny fanomezana nataony ho an’i Iaveh.» Dia lasa nody izy ireo.

²¹ Novangian’i Iaveh i Anà, ka nanana anaka, dia niteraka telo lahy sy roa vavy. Ary i Samoela kely nitombo teo anatrehan’i Iaveh.

Ireo zanak’i Helì ihany

²² Efa antitra dia antitra i Helì, ary nandre ny nataon’ny zanany tamin’i Israely rehetra izy, sy ny nandriany tamin’ny vehivavy nanompo teo am-baravaran’ny trano lay fihaonana,

²³ ka nanao taminy hoe: «Ahoana no anaovanareo izany zavatra izany? Fa reko amin’izao vahoaka rehetra izao ny ratsy ataonareo.

²⁴ Tsia, anaka, tsy tsara ny vavam-bahoaka reko; fa mampanota ny vahoakan’i Iaveh.

²⁵ Raha olombelona no anotan’olombelona dia Andriamanitra no mitsangan-ko elanelam-panahy, fa raha i Iaveh kosa no anotàny, iza no hifona ho azy?» Tsy nihaino ny feon-drainy anefa izy fa ny hahafaty azy no sitrak’i Iaveh.

²⁶ I Samoela kely kosa, nitombo nitombo ihany, ary sitrak’i Iaveh sy ny olombelona.

Fanambaràna ny sazy

²⁷ Ary nisy olon’Andriamanitra anankiray tonga tao amin’i Helì ary nilaza taminy hoe: «Izao no lazain’i Iaveh: Tsy efa niseho mazava tamin’ny ankohonan-drainao va Aho, fony izy mbola tany Ejipta tao an-tranon’i Faraôna?

²⁸ Nofidiko tamin’ny fokon’i Israely rehetra izy ho mpisoroko, hiakatra amin’ny ôteliko, handoro zava-manitra, hitafy ny efôda eo anatrehako, ary nomeko ny tarana-drainao ny fanatitra rehetra ataon’ny zanak’i Israely amin’ny afo.

²⁹ Ka ahoana no dia nohosenareo amin’ny tongotrareo ny sorona amam-panatitra ho Ahy izay nodidiako haterina ao amin’ny fonenako? Ary nahoana no dia ny zanakao indray no omenao voninahitra mihoatra noho Izaho, fa anatavezanareo tena ny tsara indrindra amin’ny fanatitra rehetra avy amin’i Israely vahoakako.

³⁰ Noho izany, izao no tenin’i Iaveh Andriamanitr’i Israely: Fa efa voalazako fa ny taranakao sy ny tarana-drainao no handeha eo anatrehako mandrakizay; nefa ankehitriny, aza ho toy izany intsony, hoy i Iaveh. Fa izay manaja Ahy no hohajaiko, ary izay maniratsira Ahy no hotsiratsiraiko koa.

³¹ Indro tonga ny andro hanapahako ny sandrinao sy ny sandrin’ny tarana-drainao, ka tsy hisy lehilahy tratra antitra intsony amin’ny taranakao.

³² Ianao hahita ny fonenanao amin’ny fotoana hamenoan’Andriamanitra soa an’i Israely: ary amin’ny taranakao tsy hisy lehilahy tratra antitra intsony, na oviana na oviana.

³³ Tsy hofongorako tsy ho eo amin’ny ôteliko avokoa ny lehilahy rehetra amin’ny taranakao mba hahajemby ny masonao sy handreraka ny fonao, nefa ho faty amin’ny taonan’ny fahatanjahany avokoa ny solofo rehetra amin’ny taranakao.

³⁴ Ary ho famantaranao izany, ny hanjò ny zanakao roa lahy, dia i Ofnì sy i Finea, fa ho indray andro maty izy roa lahy.

³⁵ Ary hanangana mpisorona mahatoky Aho, izay hanao araka ny foko sy ny fanahiko ary hanorenako trano mafy orina izy, ary handeha eo anatrehan’ny voahosotro mandrakizay.

³⁶ Ka ho avy hiankohoka eo anatrehany avokoa izay sisa tavela amin’ny taranakao, hangataka lela-vola na sombi-mofo kely, ary hiteny hoe: Raha sitrakao mba omeo anjara kely eo amin’ny raharaham-pisoronana aho, mba hahazoako mofo kely hohanina.»