NEHEMIA 8 - ASII LAKDAP Bible (BSI)

Ejra Raq Thungtri Ka Mungmaiqse Ma Phatkuqto.

¹ Jipi lümiishe liipan na Israilnok ka maiqmiimii sichang chela thun na kunkun she shongnga wanto. Kra lüwa, jiha ranaiqshi na, tsangshiq tarü Jerusalem chela mong na Kham Kilam Chong tapshok hiqthung bashi kiijaq Israilnok ka kunkun ngongthung riitam ngato. Raüta tsangshiq raq ramwe kiimaq Thungtri shamtiwe Ejra nangnga Tatiwe raq Mosheq lümaq akuq lakdam kom kra mungmaiqse ma phatkuq laq nguta chongto.

² Krai mren. Ejra riimin thungtri lakdamkom ka, mungmaiqse maiqwere, jechakre, kiimaq nosere, phanrap ahea abi mitaklotti thun thungtlaq kiijaq tlam wato.

³ Raüta, kra tapshok ikha kilam chong tho na hiqthung ba kiimaq chap raüta, Thungtri lakdap ka ranap chu maq phaho raüta, ranaiq shethung shekham na saülili phatkuqto. Krai mren, tsangshiq riimin tsan tiitsi raüta tsangrakrak maq tiitsang taito.

⁴ Ejra ka kra akhing miitu maiqchap chang pepen maq ahai rinchü kiijaq chapto. Kiimaq apaiq ma jaqtsi nü siim niika, arwetiim ara chapto: Mattithia, Shema, Anaia, Uria, Hilkia, kiimaq Maaseia chapto. Kiimaq apaiq ma jaqpha nü siim niika, arwetiim ara chapto: Pedaia, Mishael, Makhija, Hashum, Hashbaddana, Jekeria, kiimaq Meshullam chapto.

⁵ Riita, nokwe tarü raq chhili chang, ra na diiluwiq ahai rinchü na, Ejra ka Thungtri lakdap ka phat miitu chapto. Krai mren, mungmaiqse tarü maklii ka Ejra theaphi na, nyiqkai raq pepü shupnyang kopwa tlaq ikha liito. Krai mren, apaiq raq asii lakdamkom ka linto. Kiimaq tsangshiq tarü tiido rang raüta chapto.

⁶ Kiijiishe Ejra raq, “Ajong pinthum Shiikeawe, Tatiwe kli tiitsam rong i!” nguta bompha hoto. Kiijiishe, mungmaiqse wiita raq tsangshiq jaq ka ra na dorang doto. Raüta tsangshiq raq, “Amen! Amen!” nguta apaiq bom ka treto. Raüta tsangshiq ka lakütsrong maq bum rang raüta, Shiikeawe shomnoqto.

⁷ Raütiishe, tsangshiq ka chaprang riito. Raüta maiqmii ba na chapki rang riito. Kiimaq Lewinok wa arwetiim raq, mungmaiqse ma Thungtri bomtsi aheawiq maq chongkuqto: Jeshua, Bani, Sherebia, Jamin, Akkub, Shabbethai, Hodia, Maaseia, Kelita, Ajaria, Jojabad, Hanan, kiimaq Pelaia riito.

⁸ Tsangshiq raq Shiikeawe Thungtri ka mungmaiqse raq sap wanli chang khan maq, tsangshiq nü maq tiiphan tiiphan raüta tru chongkuqto.

⁹ Riita, mungmaiqse raq Thungtri na maiqse raq kamasham lamphan ka jamkhii shiiting rai raüta lang chang wa, kra bomtsi ka tai raüta, tsangshiq tsan nai mongjii ka tiininta she riito. Krai mren, tsangshiq ka aho anyi walishe riito. Kra ningkhan, wanghuptiwe Nehemia, Ramwe, kiimaq Thungtri raü rümtiwe Ejra, kiimaq Thungtri chongketi Lewinok raq, “Ümchaü ranaiq ka namshiq Tatiwe, Shiikeawe ma asii ranaiq. Kra ningkhan, namshiq ka naq shiri rongkiq. Kiimaq naqhoq rongkiq,” nguta nokwe ma nguto.

¹⁰ “Riita, ümchaü min, namshiq ka maiqmii jam na wa rong laq. Lanta phaq asea chamtraq poi ajong klo rong laq. Poi klo wan miitu tü-adung nai spiqtai ka ju jaq niiwa ahü, kriiti miika asisiti raq kran kuq lanta, riiphea riinyin phaqsiq ronglaq. Ümchaü ranaiq arka Tatiwe ma asii ranaiq. Kra ningkhan, namshiq ka munjuk mijuk naqsi rongkiq. Tatiwe raq namshiq ma kuqtlaq chochi kriiraq, namshiq ningkun ka ajong ma mitiija,” nguta mungmaiqse ma chongkuqto.

¹¹ Krai mren, Lewinok raq mungmaiqse ma, akha asii ranaiq niika tsan naqtiibi rongkiq, tlin chongkuqto.

¹² Krai mren mungmaiqse ka maiqmii jam na wawanto. Raüta chojong chise maq, wok phetak dungsea kham nyam wa liishe riito. Kiimaq tsangshiq jaq na jamlai phaqsea wa asi, kra kongti rai riiphea riinyin phaqsiqto. Jamkhano ngukla, tsangshiq ma Shiikeawe bomtsi phatkuqtaq kra liichum ka tsangshiq raq samhea wiq sapto.

Baülitiip Jap Poi

¹³ Kriimaq napjai ranaiq niishe, maiq weraü weatek wa nyungwere ka tarü ramwebi nai Lewinok rai adam maq shrawe Ejra phana Thungtri bomtsi shrin kuqtlaq kra taikai kihoto.

¹⁴ Tsangshiq raq Thungtri lakdap na, Tatiwe raq Mosheq lümaq akuq kiijaq Baülitiip Jap Poi lang tlaq bala ka, Israilnok ka jaqlo miitu Baülitiipsetiim hai raüta sichang nguta Thungtri bomtsi na chhito.

¹⁵ Kra ningkhan tsangshiq raq mungmaiqse Jerusalem na siti, kiimaq chela ahin na siti, kiimaq hiqshong rap na sitibi ma, tsii ka akha tiichong kito: “Thungtri na chongtlaq kra phanphan, namshiq ka ku akin thun kiina warong laq. Lanta pain pechong kiisetiim, olip pechong kiisetiim, martel pechong kiisetiim, kiimaq taitsi jaqsetiim, kiimaq pe phanhin kiisetiim kra daqwa rongkiq,” nguta aming kuqto.

¹⁶ Krai mren, mungmaiqse raq rumwa peküsetiim daqwa raüta, tsangshiq jam wukhu thung kiijaq, kiimaq tsangshiq jam rinkea kiijaq, kiimaq Shomjam rinkea kiijaq, kiimaq Kham Kilam tapshok thung ba kiijaq, kiimaq Ephraim Kilamchong tho kiijaq, baülitiipsetiim ka haito.

¹⁷ Munglu wansha asiwa ümchuwa jangwantiiti raq, baülitiipsetiim ka hai raüta, sito. Riita Israilnok riika, Nun se Joshua pat na lang wantaq, kra jai miika, ümchaü lang tlaq artiq apha shaqshaq riito. Krai mren, tsangshiq tarü ka polokhiq, kiimaq pinthum khoqriiq shishiiq maq, poi ka kloto.

¹⁸ Poi pha ranaiq maq phaho raüta, poi tiisup ranaiq na saüli, tsangshiq raq Shiikeawe Thungtri lakdap wa ranaiqtek, tiiphan tiiphan raüta phat kuqto. Tsangshiq poi ka ramiishi na saüli kloto. Raüta, Thungtri na chong tlaq kra phanphan, ratiichat ngoja niika, mungmaiqse tlotli ka adam na riitam thungtii raüta, ara asii arai poi ka tiisup wan ramkham maq tiibokto.