Matthew 23 - ASII LAKDAP Bible (BSI)

Jesuq Raq Thungtri Shrabi Nai Phorisinok Shrato

¹ Arjai maq Jesuq raq mung- maiqse nai ajaqshisetiim ma chongkuqto,

² “Thungtri shrinketibi nai Phorisinok ka Mosheq Thungtri chongke miitu aming hoti.

³ Kriikha maq tsangshiq raq namshiq ma jamlai phan wa chongkuq tlaq kriika lang ronglaq. Shatmaq tsangshiq rong arai kriika namshiq raq naq phan rongkiq. Tsangshiq raq jamlai wa nokwe ma chongkuq tlaq kriika tsangshiq maiqmii riika lang mak.

⁴ Tsangshiq raq nokwe ma alang chang tri hekiilai ka laihea tiihokuq tlo. Shatmaq tsangshiq maiqmii riika phanshi ra min tiichhii hokuq dam mak.

⁵ Tsangshiq raq kamasham lam phan na phanrap shamlam tlaq kriika maiq ma tiichhi hake ma ngutli klo lii tlo. Liimanta, Asii bomtsi po ka ngamkhü chamchhok ajong jong na shaq raüta, tsangshiq khakam na nai jaq na pa raqraq pawan tlo! Kiimaq tsangshiq dü na samtong jong kaü samtlaq kra kheani thun kriika achan ana ajong aluwiq siisaq tiihong raüta paq wan tlo! Arka tsangshiq ka Shiikeawe ma pinthum kamasham ajong rümti nguta maiq ma tiisap miitu paq tlo.

⁶ Tsangshiq raq poi awii ranaiq akhing na welare ngachang thun kra lamlam rit raüta ngatlo. Kiimaq sinagok thun na Shiikeawe shomnoq akhing na shiilangbi ngachang pong na atiitsang athü kriijaq ngawa kli lungwii tlo.

⁷ Kiimaq tsangshiq raq kejat thung miimin, maiq raq ‘Shrinketi we,’ nguta shreng raüta tsangshiq rai riibom dam kriili lungwii tlo.

⁸ Shatmaq namshiq ka tarü siphu sino siisaq siwan tlan. Kiimaq namshiq tarü ma, ‘Shrinketi we’ ka weshi li sitlo. Kriikha maq namshiq ka maiq ma, ‘Shrinketi we’ nguta naq tiimang rongkiq.

⁹ Kiimaq namshiq raq mangjong maiqse ka ‘I We loi’ nguta naq hea wan rongkiq. Namshiq ma ‘Awe’ ka ramungtan na sitlaq kli Awe.

¹⁰ Kiimahali namshiq ka Tijongwe nguta naq tiingo rongkiq. Jamkhano ngukla namshiq ma Tijongwe ka ashi li, Messia sitlaq kriili namshiq ma Tijongwe.

¹¹ Namshiq liipan na juwa maiqla pinthum nguta siwan tlaq, kriiti ka namshiq tarü jaqshise ma ja wan ra tlo.

¹² Jurwa ngi ajong nguta tiima tlaq, kriiti ka atran mirbaiq wan. Kiimaq jurwa ngi ka aran nguta tiima tlaq, kriiti ka ajong ma mitiija wan.”

Jesuq Raq Mongnam Tsii Shra Tlo

¹³ “Namshiq ma phiiptsi chang jonghea asi, Phorisinok nai Thungtri shrinketibi le! Mongnam nok le! Namshiq raq mangjong maiqse ka Shiikeawe sengi ma jawanti wachang lam kilü kra ashaq riibaiq tlan. Namshiq maiqmii kiimin wawan man. Kiimaq nanok juwa awa wan tiima tlaq, kriiti kiimin tiiwa man maq lam ka tangta tlan!

¹⁴ Phorisinok nai Thungtri shrinketibi le, namshiq ma phiiptsi chang asi! Mongnam nok le! Namshiq raq thümwaq mantibi ka nanshan shan lao phaqsiq tlan. Lanta maiq ma tiichhi ma nguta shetangtang achu jaü tlan! Arkha na Shiikeawe raq namshiq ka achan ana mitsa sha wan. Raüta namshiq ka mitiicham-chao!”

¹⁵ “Namshiq ma phiiptsi chang jonghea asi, Phorisinok nai Thungtri shrinketibi le! Mongnam nok le! Namshiq raq maiq weshi ka namshiq Jehudi nok kamasham lamphan phung kiina tiishang wan miitu sammoktra jü jin lanta, kiimaq maiqmung pahea kiina khum lanta, trahoke khum tlan. Krai mren, maiq weshi kra tiishang han jiila, namshiq raq apaiq ka namshiq jamkhiiwa siwan tlan kiikha tiinamtok chongkuq lanta, mannai rii chamchao homa kra howan raüta wamungtan na kaiho miitu tiijethü tlan!”

¹⁶ “Namshiq ma phiiptsi chang jonghea asi, makchuk lamsheatinok le! Namshiq raq nanok ma ajiq shrinkuq tlan, ‘Maiq weshi raq Shomjam mang chong raüta Shiikeawe ma phanshi ra mikuq ha nguta tiitum haü jiila, apaiq kiqkham raq apaiq ka tiishut mak miraq. Shatmaq apaiq raq Shomjam mong na sitlaq chaq kra mang na tiitum haü jiila, apaiq kiqkham ka tiihong chang she dongdii miraq.’

¹⁷ Makchuk anginok le! Ümriiti wa akhek, reng hupsam nguta siwan tlaq kra. Chaq tiisiiti Shomjam sitlaq kra sha reng, sha chaq kriiwa reng?

¹⁸ Kiimaq namshiq raq armin ajiq shrinkuq tlan, ‘Maiq weshi raq aluchiim mang maq tiitum haü jiila, apaiq ka tiishut mak miraq. Shatmaq aluchiim na alu athü kra mang maq tiitum haü jiila tiipoi ra mak, kewan chang dongdii she miraq.’

¹⁹ Namshiq ka makchuk pinthum! Alu akuq kra sha akhek, sha alu tiisii chang asii aluchiim kriiwa akhek?

²⁰ Riita ara chongtiikang arai mren, jurwa asii aluchiim mang maq tiitum tlaq, apaiq raq aluchiim kra nai kiijaq maiq raq honglu akuq ümchuwa sitlaq kra mang maq tiitum tlo ngushat.

²¹ Kiimaq apaiq raq Shomjam mang maq tiitum haü jiila, apaiq ka Shomjam mang maq nai kiijaq siti Shiikeawe mang maq tiitum tlo ngushat.

²² Kiimaq maiq weshi ra raq ramungtan mang maq tiitum raüla, apaiq ka Shiikeawe ngachang ngacho mang maq nai ngacho na ngati we Shiikeawe kra mang maq tiitum tlo ngushat.”

²³ “Namshiq ma phiiptsi chang jonghea asi, Thungtri shrinketibi nai Phorisinok le! Mongnam nok le! Namshiq raq Shiikeawe ma aroq khu wa alu atan kewan tsapkapkap maq, jurai liirai akhing na süse, tapan, pinchi cham tlaq kra thun ka wiita honglu na kuq tlan. Shatmaq Thungtri na chong tlaq akhek pinthum bomtsi, tingting tri raü sham, maiqse ma mangchan tsantsii thü wan kiimaq tsapkapkap maq jaqsham chang nguta chongtlaq kriika ashi ashe riiwan tlan. Namshiq raq ara chong tiikai akhek tri raü thun arka kai shiithuk shiitsom lanta lang lili riihan chang wa. Arthaq niitiq abi thun namshiq raq lang tlan kra sham wan han chang wa.

²⁴ Makchuk lamsheatinok le! Namshiq raq namkham kok mong na shemüse athap wa kriika ashe apii nguta achen riibaiq lanta kham ka nyang tlan. Shamtaq kumtsong nyamse jonghea phan kaü kra riiwe kra khoti miina namshiq raq achhi min chhi man miili jok tlan!”

²⁵ “Namshiq ma phiiptsi chang jonghea asi, Thungtri shrinketibi nai Phorisinok le! Mongnam nok le! Namshiq raq tak apin thun kriika akii ka samheawiq maq hetse tlan. Shatmaq tak apin mong niika namshiq raq ransu ranchang nai phusu lapliim tsii, kiimaq ningkun ningkaq tri maq jaqsham lanta alap luwan han tü adung kra riili ama sitlo.

²⁶ Makchuk Phorisi loi! Among ka kongkhu tiisii hetse rong liina. Kra riihan jiitiq, kok nai tak apin thun ka akii kiimin asii she mija wan.”

²⁷ “Namshiq ma phiiptsi chang jonghea asi, Thungtri shrinketibi nai Phorisinok le! Mongnam nok le! Namshiq ka maiq ma lap chang longsha makho ka, akii tro thun ka lüdiidii hea sitlaq ikha sitlan. Shatmaq makho longsha mong niika, maiq ma namtsang, maiqrok maiqrii rong li riiphong rong rai tlo.

²⁸ Ikiikhiisii hali namshiq kiimin, maiqse maklii niika wiitarü man na, siirairai hea ikha sitlan. Shatmaq namshiq tsantsii ka mongnam kiimaq ngarai kaq li sitlan.”

Jesuq Raq Tsangshiq Chamchao Tiithaito

²⁹ “Namshiq ma phiiptsi chang jonghea asi, Thungtri shrinketibi nai Phorisinok le! Mongnam nok le! Namshiq raq richü pat wa shammibi nai kechu maiqse raükhu ahai kongmong chong thun kriika aheawiq maq tiimiikhiiq shiili lii tlan.

³⁰ Kiimaq namshiq ka namti pat na asi ngu raü jaq, tsangshiq raq shammibi thun tsat baiq wantaq kriika tiitsat baiq man mirhan wa nguta tiishom ra tlan.

³¹ Riita ija, kra tiichong rai tlan kriili she, namshiq ka shosaü lumse phan wiidea, nguta maiqmii ngam kra tiishaphaq tiichong rai tlan!

³² Riita ija, ümchaü man la, namtitiim raq shammibi ka tsat baiq wanto. Krai mren namshiq riimin la namtitiim jaqtho kra tiinyi wan she, shammibi ahin siwan tlaq kra mitsat baiq han.

³³ Namshiq ka paüsang nyiqla setiim kiimaq paüsang nyiqla phan! Wamungtan na tiidea wan tlaq kra wiika jamkhii mitiichhii rong i nguto tiima tlan?

³⁴ Ngi chong pha. Ngi raq namshiq phana shammibi kiimaq taksma maiqse kiimaq Shiikeawe bomtsi shrinketi shrabi thun kra mitiiki kang. Namshiq raq tsangshiq phong wa, wiijam ka atsea mirbaiq han; kiimaq wiijam ka pumsongkham na mitübaiq wan han; kiimaq wiijam ka sinagok maq chunpo-nyam chongwai maq ninta mitsat han. Kiimaq chela ashi maq riita chela ashi na tiikot mrot mijo jii baiq han!

³⁵ Riita ara chong tiikang arai mren, maiqtu ngampü thun kiimaq asii chiisan maiqse thun tsatbaiq wan taq kra mat kha ka, namshiq khupo na misaü wan. Abel maq pha lanta Birekhia se Jekeria, apaiq ka namshiq raq Shomjam mong na aluchiim nai tsaüwe khamchong liipan na tsatbaiq lan. Arthun ngarai ka namshiq raq miho han.

³⁶ Ngi raq chongtiikang arka tengteng. Ara chong kang thun mat kha arka ümchaü pat wa maiqse siwan tlanti khuthaq na misaü wan! Kiimaq Shiikeawe raq namshiq ka mitsa kiimaq mitiichamchao wan!”

Jerusalem Ma Jesuq Tsantsito

³⁷ “O Jerusalem, o Jerusalem! Ümniiraq shammibi thun ka tsatbaiq wan laü. Kiimaq Shiikeawe kiimwebi thun ümniiphana atiiki thun ka long maq tiiqbaiq wan laü! Ngi raq ümse ümno thun ka ümtinkhan wa i wokhong na, wukaü raq asetiim ka wowan tlaq ikha wowan hajaq nguta tsinngin wan kang. Shatmaq ümniiraq ümsetiim ka ngi ma tiiwo wan maü riilaü!

³⁸ Riita arkha na, ümchaü sanha ümchela ka Shiikeawe raq amiim she mirbaiq. Kiimaq üm Shomjam ka shaqmii she miraq.

³⁹ Ngi chongpha, ümchaü ara miiphat she, namshiq raq, ‘Tatiwe mang na juwa kitlaq kra Shiikeawe raq mishman laq,’ nguta namnü maq ngu man wiiwii, i sham ka chhi man she mirhan.”