JOSHUA 23 - ASII LAKDAP Bible (BSI)

Joshua Raq Israilnok Ma Atiithum Traho

¹ Luhea sijai miishe, Tatiwe raq Israilnok ka tsangshiq tro na siti chiqse rewe jaq wa kunkun she tiiwong kuqto. Kra akhing na Joshua ka tikii kiikaiq she riito.

² Kra ningkhan apaiq raq Israilnok tlotli, phukhu welabi, ashun asheatibi, phowebi, kiimaq mung liiti siihiipbi thun ka adam na ngongthun nga miitu tiiheato. Raüta akha nguto, “Ngi ka ümchaü sanha kaüja kiija she.

³ Namshiq Tati Shiikeawe raq namshiq miitu, ara maiqmung thun ka jamkho riiwantaq, kra wiita kunkun chhi wan lan she. Namshiq Tatiwe nam Shiikeawe raq namshiq miitu re ka khatkuqto.

⁴ Ngi raq namshiq maiqphan thun ma tachong hiqshong miitu, Kanan mung wa maiqmung thun mijii wan han shaq sitlaq kra, kiimaq ngi raq maiq mung thun shedong nü mung wa Jordan Rai maq riita shenyap mung nü na Mediterenian Khamjong kii na saüli kra khat lata jiiwan kang thun kra chumkuq kang she.

⁵ Namshiq Tati Shiikeawe raq tsangshiq ka namshiq khaki na chapkhu mak, tsangshiq jai na apin ajin mitiijang baiq. Kiimaq namshiq raq tsangshiq khat wan tlan kra phan phan, apaiq raq tsangshiq ka ajo mirbaiq wan. Tatiwe namshiq Shiikeawe raq namshiq ma kiqkham kuqtaq kra phan phan, namshiq raq tsang mung thun wa hiq ka mijii wan han.

⁶ Arningkhan, Mosheq Thungtri lakdap na waiqtaq kra phan phan, aming ka lang ronglaq kiimaq phanrap jaqsham ka pinthum honkam shat sham ronglaq. Tri raütu ka ano anise dongdii min naq shishe rongkiq.

⁷ Kiimahali, namshiqnok phong na tsangshiqnok abung tiichongkitaq kra rai, adam na shongnga maimak, kiimaq tsangshiqnok phra kong kra mang chong lanta sinkiitiq bomkham maimak, kiimaq kra phra thun ka shomnoq raamak, riimakla tsangshiq khaki na anoq bumkai maimak.

⁸ Namshiq ka ümchaü niitaq saüli Tatiwe wokhong na tsapkapkap sitlan, kra phan phan Tatiwe wokhong na phaqchii nichii maq siwan ruq ronglaq.

⁹ Namshiq raq rekhat wan jamkho sinkhu na wawan tlan, kra phan phan Tatiwe raq maiqmung jonghea hea kiimaq srea nolanok mung thun wiita kunkun she jobaiq wanto. Krai mren, chiqse rewe junok riimin, namshiq khaki na chap wan lot mak riito.

¹⁰ Namshiq phong wa maiq weshi riili dongdii min, rewe maiq hingshi ka tiipin tiijin jobaiq wan lan. Jamkhano ngukla Tatiwe nam Shiikeawe raq namshiq miitu re ka khatkuq wanto. Arka apaiq raq kiqkham kuqtaq kra phan phan khat kuqto.

¹¹ Arningkhan, namshiq raq Tatiwe nam Shiikeawe ka, honkam shat maq lungwii ronglaq.

¹² Shatmaq namshiq ka Tatiwe wokhong na phaqchii nichii maq shonga man riihan la kiimaq namshiq rai pongnok phan maiqse tiichong kitaq thun krai, namshiq ka adam na riishot riishaq sihanla, lanta tsangshiqnok rai sikhe sirü riija hanla,

¹³ namshiq raq riikhaqli sapchang, Tati Shiikeawe raq, namshiq raq chiqse rewe mung thun khat wan tlan kra apaiq raq khat kuq wan mak she miraq. Kiimaq apaiq raq armung thun ka jobaiq wan mak miraq. Kra rii na, tsangshiq ka namshiq minrai chang bi atsan ikha miraq, riimakla thiikho ashi, kiimaq namraikhü na chumpo-nyam chongwai maq atsat ikha miraq, riimakla nam makpo na shuk raq aram ikha miraq. Riita ara waqkhükham nyangli chamchao arka, Tatiwe raq namshiq ma, ara hiqpo hiqwin mung kuqtaq arjaq, maiq ka weshi min tiichong mak she akhing na saüli namshiq ma siruqli miraq.

¹⁴ “Ngi ma rilung lamsea ka athum she. Namshiq tarü khumtek raq maiqmii tsan nai mongjii na asap han, Tatiwe nam Shiikeawe raq, ahea awa phan ümchuwa mikuqha nguta kiqkham kuqtaq thun ka wiita kuqto Apaiq raq kiqkham raüpot ümchuwa khakuqtaq kriika, wiita kunkun shiikupi kuqto. Bomtsi poshi dongdii min tiipoi mak.

¹⁵ Shatmaq, apaiq raq namshiq ma jamkhiiwa apaiq kiqkham poshi min tiikhoi mak shiikupi kuqtaq, kra niqriri sii hali, apaiq raq namshiq ma aphiip jiip chang chongkuqtaq, kriithun kiimin, kunkun mitiisaükuq.

¹⁶ Kiimaq namshiq raq, Tatiwe nam Shiikeawe raq, namshiq ma tongshong ramkhap kra lang ronglaq nguta aming kuqtaq kra, lang man riihan jiila, kiimaq lanta namshiq raq ahin phra thun kra shiililii lanta shomnoqho han la, apaiq tsan mikhiq, raüta namshiq ma mo mitiiho. Kiimaq jaqlo liipan niili, ara hiqpo hiqwin mung, apaiq raq namshiq ma kuqtaq arwa, namshiq ka weshi min tiichong man she mithum han.”