JOSHUA 13 - ASII LAKDAP Bible (BSI)

Mung Alap Wan Chang Asishaq Dea

¹ Joshua ka ümchaü tikiishe. Tatiwe raq apaiq ma nguto, “Ümniika ümchaü tikiihea she. Shatmaq mung alap chang ka ümchaü min taqtaq asi shaqli:

² Philistain mung thun tlotli kiimaq Geshur mung ka,

³ kiimaq riita shemai nü na Awim wang kra. (Ejip mung hiq rai na Shihor jürai maq pha raüta, shekhu nü wang na Ekron chela na saüli ka Kanannok hiq nguta ngutlo; Philistainnok hokhambi ka, Gaja, Ashdod, Ashkelon, Gath, kiimaq Ekron chela thun na sitlo.)

⁴ Kiimaq, Kanannok mung tlotli thun ka, kiimaq Meera wang kra, (arka Sidon wokhong na siti), kiimaq riita, Amoraiqnok hiq rai na Aphek chela na saüli;

⁵ kiimaq riita, Gebalnok hiq wang kra; kiimaq riita, shedong nü mung wa, Lebanon mung tlotli wa, Harmon Pum wang wa Baalgad chela kra hamli maq riita, Hamath Pumchit na saüli.

⁶ Arthun arka Sidonnok mung kunli, ku akin wang maq phaho raüta, Lebanon Pum Thun kra, kiimaq riita Misrephoth Maim chela na saüli. Ngi raq armung thun wa maiq ka Israilnok raq jamkho khat wan raüta hiq ka jiiwan tlaq, kra phan phan wiita mijobaiqha. Ümniiraq armung thun ka, ngi raq ümniima aming kuq kang kra phan phan, chum laüta pheake wan ratlo.

⁷ Arningkhan, ümchaü min, armung thun arka, Israilnok maiqphan phan tiikaü kiimaq Manase phan wa khoko sitlaq kriima, tsangshiq ma tachong hiqshong miitu chumkuq laq.”

Jordan Rai Maq Shedong Mung Hiq Chumkuqto

⁸ Tatiwe jaqshise Mosheq raq, Reuben, Gad, kiimaq Manase phan wa khokoti miika, tsangshiq rii tachong hiqshong Jordan Rai maq shedong nü mung kiiwa, kongkhuji miiphü achumke wishe riito.

⁹ Tsangshiq rii hiqrai ka Arnon jiiwii tan na atei Aroar chela na saüli riito. (Arka Arnon Tan kii na riito) kiimaq riita kra tan mong na chela kiijaq saüli riito. Raüta kin thaq na hiqthungtan thun kra Medeba chela maq riita Dibon chela na saüli riito.

¹⁰ Kiimaq riita Ammon mung hiqrai na saüli; kiimaq riita Amoraiq hokhamwe Sihon, Heshbon chela pengtiwe wokhong wa chela thun ümchuwa sitlaq kra wiita hamli.

¹¹ Kra thun ka Gilead wang binjü kra, Geshur wang binjü kra, kiimaq Maka wang binjü kra, kiimaq Harmon Pumji wang binjü thun tlotli, kiimaq Bashan wang binjü tlotli, raüta Saleka wang binjü na saüli.

¹² Kriithun mong niika, Rephaim phan wa atiithum hokhamwe, Ashtaroth chela nai Edrel chela langti Og hokhamwe raq langtaq mung thun kra wiita hamli riito. Tsangshiq ka Mosheq raq khat raüta tangto. Raüta jobaiqto.

¹³ Shatmaq tiina, Israilnok raq Geshur wangti nai Maka wangti ka jobaiq lot mak dea riito. Tsangshiq ka ümchaü min Israil mung niili sitlo.

¹⁴ Mosheq raq Lewi phan ma tsangshiq rii tachong hiqshong ka chumkuq mak dea. Jamkhano ngukla, Tatiwe raq Mosheq ma tsangshiq riika, tsangshiq rii tachong hupsam ka, Israilnok raq Israilnok Tati Shiikeawe ma honglu kuqtlaq kiiwa pheake raa nguta aming kuqto.

Reuben Phan Rii Achumkuq Hiqshong

¹⁵ Mosheq raq kra wang kiiwa panshi ka Reuben phan wa maiqta thun ma tsangshiq rii tachong hiqshong miitu chumkuqto.

¹⁶ Tsangshiqnok hiqrai ka Aroar chela na saüli (Arnon tan kii na saüli) kiimaq kra tan mong jam na chela sitlaq kriimin tlom wan damtlii raüta, Medeba chela tro na pum thung tan binjü kra hamli na chumkuqto.

¹⁷ Kriika Heshbon chela kiimaq pumthungtan wa chela thun kra wiita hamli na pheakuqto. Kra chela thun ka arthun ara: Dibon, Bamoth Baal, Beth Balmeon,

¹⁸ Jahaj, Kedemoth, Mephath,

¹⁹ Kiriathaim, Sibma, kiimaq kra tan wa kin kha na sitlaq Jerethshahar chela kra,

²⁰ Bethpeor chela, kiimaq Pisga Pumjiji binjü thun kra, kiimaq Beth Jeshimoth chela thun kra riito.

²¹ Arka pumthung tan na chela thun ümchuwa sitlaq kra wiita hamli riito. Kiimaq Ammoraiqnok hokhamwe Sihon raq Heshbon chela maq mung langtaq thun kra wiita hamli riito. Mosheq raq apaiq ka khat raüta tangto kiimaq Midian wang wa arthun chela rümti hokhambi armin khat raüta tangto: Ewi, Repiitiip, Jur, Hur, kiimaq Reba chela thun kra riito. Arthun hokhambi tlotli raq mung ka Sihon Hokhamwe wokhong na siisaq pengto.

²² Riita Israilnok raq tsatbaiqtaq phong niika Beor se, jaqliiti shammiwe Balaam kiimin tsatto.

²³ Reuben phan ma achumkuq shenyap mung nü wa hiqrai ka Jordan rai maq raito. Ara chela thun nai hiqshong thun arka Reuben phan ma tachong hiqshong achumkuq riito.

Gad Phan Ma Achumkuq Hiqshong

²⁴ Mosheq raq kra mung wa panshi ka Gad phan weraü maiqta thun mimin, tsangshiq rii tachong hiqshong chumkuqto,

²⁵ Tsangshiqnok hiq rai mong niika, Jajar chela kiimaq Gilead wang wa tlotli chela thun kra, kiimaq Ammon mung wa Aroar chela na saüli riito; Aroar chela ka Rabba chela ma maq shedong nü na riito.

²⁶ Tsangshiqnok hiq ka Heshbon chela maq riita Ramath Mijpe chela na saüli, kiimaq riita Betonim chela saüli, kiimaq riita Mahanaim chela na saüli, kiimaq riita Lodebar binjü hiq rai na saüli riito.

²⁷ Kiimaq riitaq, Jordan Rai Tan thung binjü wiika Beth Haram, Bethnimra, Sakko, kiimaq Japhon chela thun kra hamli riito. Kiimaq Heshbon chela Hokhamwe Sihon mungtan wa abung hiq tiichongtaq thun ka wiita riito. Tsangshiqnok hiq rai shedong mung nü wiika, Jordan rai khü phan wawan raüta hiqkhu nü miika Gelili Thamchum na saüli riito.

²⁸ Gad phan weraü maiqta thun ma tachong hiqshong achumkuq hiq ka arthun ara riito.

Shedong Mung Na Siti Manase Phan Ma Achumkuq Hiqshong

²⁹ Mosheq raq kra mung kiiwa Manase phan nokkho ma tsangshiq rii tachong hiqshong chumkuqto.

³⁰ Tsangshiqnok hiqrai ka Mahanaim chela na saüli riito. Raüta Bashan wang tlotli, Bashan hokhamwe Og mungtan kra tlotli ham wan raüta, Bashan wang wa Jair wokhong na siti maiq hiqshong roqtrok kra wiita lomto.

³¹ Kiimaq Gilead wang wa khoko kra tiiham wanto, kiimaq Bashan wang wa Og hokhamwe nyungchong chela wiinai Ashtaroth chela nai Edrei chela kriimin lomtlii riito. Arthun chela arka Manase se Machir saüse phan ma chumkuqto.

³² Ara Kanan mung wa Jeriko maq shedong nü wang nai Jordan rai tan arka, Mosheq raq apaiq ka Mob mung tan na sichoji na achumkuqthü riito.

³³ Shatmaq Mosheq raq Lewi phan ma tsangshiq rii tachong hiqshong ka chumkuq mak dea. Jamkhano ngukla, apaiq raq tsangshiq ma, tsangshiq rii tachong hupsam ka Israilnok Tati Shiikeawe ma honglu kuqtlaq kriiwa riisha raüta phaqsea chang nguta chongkuqto.