JOSHUA 10 - ASII LAKDAP Bible (BSI)

Israilnok Raq Amoraiqnok Khat Raüta Tangto

¹ Jerusalem hokhamwe Adonijedek raq, Joshua raq Jeriko chela ka khat raüta tiithenbaiqto kiimaq kiiwa hokhamwe ka tsatbaiqto, kiikhiisii hali, Ai chela ka khatto. Raüta tiimiqchup shiithen baiqto, kiimaq kiiwa hokhamwe kiimin tsatbaiqto nguta tsütsa ka taito. Kiimaq apaiq raq Gibeon chelati riika Joshua rai tongshongto, raüta Israilnok rai wehea jaraüta, tsangshiq rai adam niishe sitlo nguta tsütsa ka taito.

² Arthun tsütsa ara tai raüta, Jerusalem chelati ka kai tsaihü jihü, akii anyii she riito. Jamkhano ngukla, kra binjü na hokham raq rümtlaq chela thun phong na, Gibeon chela ka ajong ashi riito. Kiimaq Gibeon chela ka Ai chela thaq na ajong lin riito. Kiimaq kiijaq siti mungmaiqse kiimin kuilong kuila rekhatti siisaq riito.

³ Kra ningkhan na Adonijadek raq, Hebron chela Hokhamwe Hoham; Jarmuth chela Hokhamwe Piram; Lakhish chela Hokhamwe Japhia; kiimaq Eglon chela Hokhamwe Debir ma tsütsa ka akha tiichonghoto:

⁴ “Ana warong ra; Gibeon chela khat ma ngi khrum warongkiq. Jamkhano ngukla tsangshiq ka Joshua nai Israilnok rai wehea she riija wanto.”

⁵ Krai mren, Amoraiqnok hokhambi webiingi, Jerusalem hokhamwe, Hebron chela hokhamwe, Jarmuth chela hokhamwe, Lakhish chela hokhamwe, kiimaq Eglon chela hokhamwe, thun ka adam na pong raüta, tsangshiq phentu kra shea raüta Gibeon chela ka khat wanto. Raüta Gibeon chela ka komtam maq khehoto.

⁶ Kiijiishe Gibeon chelati raq, Joshua ma tsangshiq piitiip Gilgal chela kiijaq “Naitijongwe lei, naishiq ka naq tiishaü baiqkiq! Tlothit ana wara, laüta naishiq khrum wakiq! Naishiq tiiwongkuq laq! Kin thun na siti Amoraiqnok hokhambi raq tsangshiq phentu ka adam pong raüta naishiq khat wanto!”

⁷ Krai mren, Joshua nai asengi phenlabi wiita, sreajongbi thun kiimin nongnong maq, rekhat wa Gilgal chela maq wawanto.

⁸ Kiitiikaq Tatiwe raq Joshua ma akha nguto, “Ümniika tsangshiq ma akhiisiimin naqhaikiq. Ngi raq rekhat ka ümniima atiitangke wishe. Weshi ra min ümman na chap wanlot miraq.”

Shiikeawe Raq Israilnok ka Rekhat Na Khrum Kuqto.

⁹ Krai mren, Joshua nai asengi phenlabi thun ka rawa minru, Gibeon chela khat wa she wawanto. Raüta tsangshiq raq tiihanghiiq miili dongrang raüta Amoraiqnok kra khatto.

¹⁰ Tatiwe raq Amoraiqnok ka Israilnok ka chhi raütli phiip ma tiitsaito. Krai mren, Israilnok raq tsangshiq ka Gibeon chela wa jiipbaiqto. Raüta tsangshiq ka pumchit na Beth Horon chela kiina saüli johoto. Kriimaq hiqmai nü na Ajeka nai Makkeda chela kiina tiisaüli joho raüta khatto.

¹¹ Kra akhing na, Amoraiqnok ka Israilnok phenlabi ma hai ma pumchit nü kiina lamhong wiilü juto. Tsangshiq ka kra lamhong binjü na ajurai kiiwa, Tatiwe raq rathaiq nai tsak-hiiq jonghea hea po trok raüta tsatto. Kra tsakhiiq rok raq tsangshiq ka Ajeka chela na saüli tiiqbaiqto. Tsangshiq ka Israilnok jaq na tsaitaq kra thaq na tsakhiiq raq tiiq raüta apako jiimto.

¹² Tatiwe raq Israilnok ma Amoraiqnok khat raüta tiitangkuqtaq akhing na, Joshua raq Israilnok man na akha achu jaüto: “Rasekaü lei, Gibeon chela na, kiishatli kiilaq; Jipikaü lei, Ajalon Hiqthung tan na, likuq shat li lilaq.”

¹³ Krai mren rashekaü ka, rajam na khingkito, kiimaq jipikaü min khingkito, Israilnok raq rekhat ka mithum shaq wiiwii, Arbomtsi arka Jashar lakdap na waiqthüto. Rashekaü ka rajam na khingkito. Ranaiq shi tinkhit rashekaü ka chawan mak dea riito.

¹⁴ Tatiwe raq maiqse achu jaü akha treke wan arka, man niimin tai wan mai, kiimaq jai miimin akhiika tai wan mai miraq. Arka Tatiwe apaiq raq Israilnok re ka khat kuqto!

¹⁵ Ara rekhat lot jai, Joshua nai asengi Israilnok ka Gilgal piitiip na hali jang wan nongto.

Joshua Raq Amoraiqnok Hokham Webiingi Ka Lapto

¹⁶ Shatmaq Amoraiqnok hokham webiingi ka aju riito. Raüta Makkeda chela tho na longsha mong na tiipaü kito.

¹⁷ Kriishe maiq weshi ra raq tsangshiq ka chhito. Raüta tsangshiq ka ümbano tiipaütlaq kra Joshua ma tsütsa ka tiitaito.

¹⁸ Kiijiishe apaiq raq, “Longkaü ajong jong wa dolanta longsha kilübok kra sukbaiq ronglaq. Lanta sontri ma tiikhe ronglaq.

¹⁹ Shatmaq, namshiq ka kiijaq naqkhing rongkiq. Namshiq ka rekong jai ka joruq jo ronglaq. Tsangshiq ka tsangshiq chela thun kiina naq tiisaü rongkiq! Tatiwe namshiq Shiikeawe raq tsangshiq ka namshiq ma tiitangkuqto she.”

²⁰ Joshua nai Israilnok raq tsangshiq thun ka tiinamtok jiipbaiqto. Kiitiina rewebi phong wa wiijam ra kla Israilnok raq tsat lap mak dea riito. Tsangshiq ka ju raüta tsangshiqnok chela ruk mong na tiipaü nyap wato. Kriikha na Israilnok raq tsat lap mak dea riito.

²¹ Kra lot raütiishe, Joshua sengi ka tlotli khu asang ma apaiq phana, Makkeda chela tsangshiq piitiip na jang wato. Kanan mung na siti raq juwe riimin, Joshua nai Israilnok ni ka pha lot mak she riito.

²² Kiijiishe Joshua raq nguto, “Longsha kilü ka lin lanta hokham webiingi ka ana ngi phana sheaki rongkiq.”

²³ Krai mren, longsha kilü ka linto. Raüta Jerusalem chela hokhamwe, Hebron chela hokhamwe, Jarmuth chela hokhamwe, Lakhish chela hokhamwe, kiimaq Eglon chela hokhamwe kra longsha mong wa tiidongto.

²⁴ Raüta Joshua phana shea wanto. Kiijiishe Joshua raq asengi Israilnok sreabi thun ka wiita adam na tiithungto. Raüta asengi phong wa siihiipbi apaiq rai kaidamti thun kra waraüta, hokhamwetiim dangkong na ji maq ni ronglaq nguta aming kuqto. Krai mren tsangshiq raq ji maq nito.

²⁵ Kiijiishe Joshua raq asengi siihiipbi ma akha nguto, “Namshiq ka akhiisiimin naqhai rongkiq. Ningkun tiijom maimak. Ningkun shoqwiishoq ronglaq. Kiimaq srea nola jaronglaq. Jamkhano ngukla, Tatiwe raq, namshiq jaqtibi thun ka wiita akhiisii mikhat kuq.”

²⁶ Raütiishe, Joshua raq hokhambi thun ka tsatbaiqto. Raüta amaa ka raji na tiisaüli pechong na tiishak paq baiqto.

²⁷ Raüta raji rashe nyap niishe, Joshua raq aming kuqto. Raüta tsangshiq maa ka pechong wa tiisat diito. Raüta kongkhuji na, tsangshiq tiipaü chang longsha kriijaq tiido baiqkito. Raüta longkaü ajong jong maq longsha kilü kiijaq phong baiqto. Kra longkaü phong ka ümchaü min sishatli.

Joshua Raq Amoraiqnok Hiqthun Jiiwanto

²⁸ Kra ranaiq niisiili, Joshua raq Makkeda chela ka longto. Raüta jiito. Kiimaq tsang hokhamwe ka lapto. Apaiq raq chelati thumthum tiimiqchup jiipbaiqto. Maiq ka ashi min atra tiichong mak jiipbaiqto. Apaiq raq Jeriko hokhamwe jamkho tsatbaiqtaq, kiikhiisii hali Makkeda hokhamwe kiimin tsatbaiqto.

²⁹ Arlot jai, Joshua nai asengi phenlabi ka Makkeda maq, Libna chela niishe wawanto. Raüta khatto.

³⁰ Tatiwe raq Israilnok ma ara tiikhatto raüta tangto. Tsang hokhamwe kiimin lapto. Tsangshiq raq maiq ka weshi min tiichong mak tiimiqchup jiipbaiqto. Tsangshiq raq Jeriko hokhamwe jamkho tsatbaiqtaq, kiikhiisii hali Libna hokham kiimin tsatbaiqto.

³¹ Arjai maq, Joshua nai aphenlabi ka Libna maq Lakhish chela niishe wawanto. Raüta trotam maq kom raüta khatto.

³² Tatiwe raq Israilnok ma ranaiq nai riikhat jai niishe, Lakhish chela ka tiitang kuqto. Tsangshiq raq Libna chelati tiimiqchup thumthum jiipbaiqtaq kiikhiisii hali, Lakhish chelati kiimin maiq ashi min tiichong mak thumthum jiipbaiqto.

³³ Gejar chela hokhamwe Horam Lakhish chelati khrumkai kito. Shatmaq Joshua raq apaiq kiimin tangto kiimaq asengi thun ka weshi min atra tiichong mak maq, tiimiqchup jiipbaiqto.

³⁴ Kra jai miishe, Joshua nai asengi sreabi ka Lakhish maq Eglon chela niishe wawanto. Raüta tsangshiq raq chela ka trotam maq komto. Raüta khatto.

³⁵ Tsangshiq raq chela ka kra ranaiq niili khat baiqto. Raüta jiito. Raüta Lakhish chelati jiipbaiqtaq, kiikha hali, maiq ashi min tiichong mak, tiimiqchup jiipbaiqto.

³⁶ Arjai miishe, Joshua nai asengi sreabi Eglon maq ku akin wang wa Hebron chela khat wa she wawanto. Raüta chela ka khatto.

³⁷ Raüta chela ka jiito. Tsangshiq raq hokhamwe ka tsatto, kiimaq chela wa maiqse angu ka tiimiqchup tsatbaiqto. Kiimaq kra chela maq ajeje na siti chela thun kriimin wiita khatto. Raüta maiqse angu ka tiimiqchup jiipbaiqto. Joshua raq Hebron chela kiimin Eglon chela kiikhiisii, tiimiqchup jiipbaiqto. Maiq ka weshi min atra tiichong mak jiipbaiqto.

³⁸ Kra lot jai she, Joshua nai asengi sreabi ka jai nü na jang raüta, Debir chela kriishe khatto.

³⁹ Apaiq raq kra chela ka khat raüta, chela hokhamwe kiimaq Debir chela tho na siti chela thun kiimin khat raüta jiito. Tsangshiq raq maiqse angu ka tiimiqchup jiipbaiqto. Joshua raq Debir chela hokhamwe ka Hebron hokhamwe nai Libna hokhamwe jamkho tsatbaiqtaq kiikhiisii tsatbaiqto.

⁴⁰ Joshua raq kra mung ka kunkun khat raüta jiiwanto. Apaiq raq kin na siti thun hokhambi kra, shedong nü wang wa kinjam na siti thun kra, kiimaq shenyap nü wang wa, kinjiji na siti thun kra, kiimaq shemai nü wang wa, hiqshin wang na siti thun kra, thumthum khat raüta jiito. Apaiq raq jumin atra tiichong mak; maiqse angu wiita tiimiqchup jiipbaiqto. Arka Israilnok Tati Shiikeawe raq aming akuq kra phan phan kloto.

⁴¹ Joshua raq munglap rekhat wantaq kriika, Kanan mung shemai nü na, Kadesh Barnea wang binjü maq tiichap wan raüta, Khamjongkii wang binjü tho na saüli, raüta Goshen wang kriimin lomwantlii maq, shekhu nü binjü wa Gibeon chela na saüli khat raüta jiiwanto.

⁴² Joshua raq arthun hokhambi ka klang maq lakshi wa niili khat raüta tangto, raüta tsangshiq chela thun nai tsang mung thun ka jiiwanto. Jamkhano ngukla Tatiwe, Israilnok Shiikeawe raq tsangshiq miitu re ka khat kuqto.

⁴³ Arjai maq, Joshua nai asengi Israilnok ka Gilgal piitiip niishe jang wanto.