JEREMIA 42 - ASII LAKDAP Bible (BSI)

Mungmaiqse Raq Jeremia Ma Tsangshiq Miitu Achu Tiijaüto

¹ Kiitiikaq phentubi tlotli rai adam maq Karea se Johanan kiimaq Heshaia se Ajaria kiimaq mungmaiqse ajong aran wiita kunli ka kiqshi maq ri raüta,

² ngi ma chongto, “Mangchan laüta naishiq raq jamlai wa jaütiikai kra shamkuqlaq! Nashiq Tati Shiikeawe jaq wa, naishiq miitu achu jaü laq. Naishiq re jaq song ümchuwa tiichongkaiti thun tlotli miitu achu jaü kuq laq. Man na nashiq ka maiq pahea riikai. Shatmaq ümchaü sanha atsapseli she tiichongkai. Arka ümniiraq ümmak maq achhihaü.

³ Tatiwe jaq wa nashiq Shiikeawe jaq wa achu jaülaq, apaiq raq nashiq ma nashiq ka ümnü na kai chang wa kra lam mitiichhikuq laq. Kiimaq nashiq raq jamlai phan klo chang wa kra mitiichhikuq laq.”

⁴ Kiijiishe ngi raq trekang, “Ahea na, ikhiijiika. Ngi raq nashiq Tatiwe, Shiikeawe jaq wa achu mijaü kang. Namshiq raq ngi ma chong lan kra phan phan, kiimaq apaiq raq ngi ma jamlai wa chongjiiq kra namshiq ma michong kang. Ngi raq namshiq ma jamlai bom min dampaü mang michong kuq kang.”

⁵ Kiijiishe tsangshiq raq ngi ma nguto, “Riita naishiq raq ümnaq lümaq, naishiq ma jamlai phan aming wa kuqtlaq, kra langmai tlea hai jiila, Tatiwe apaiq riili she dea riikhaqli maq tsapkapkap raüta naishiq tiishut saqse mikuqlaq.

⁶ Naishiq raq taima ahea riiklo, abi riiklo, naishiq raq Tatiwe, nashiq Shiikeawe jaq wa ümnaq nang nga achu jaü kuqlaq nguta chongtiikai kra mitaihai. Naishiq raq apaiq aming ka lang hai jiila, nashiq ma khu asang miraq.”

Tatiwe Raq Jeremia Achujaü Treto

⁷ Raroqshi sijai na Tatiwe raq ngi ma chongto;

⁸ krai mren ngi raq Johanan kiimaq apaiq rai siti phenlabi ajong alabi thun tlotli, kiimaq mungmaiqse maiq ahinti thun kri adam na triitam heakang.

⁹ Lata ngi raq tsangshiq ma akha chongkuq kang, “Tatiwe, Israilnok Shiikeawe, namshiq raq ngi ma apaiq jaq wa achu tiijaülan kriiwe raq akha ngutlo,

¹⁰ ‘Namshiq ka lungwii tsantsii maq armung niili la sihan jiila, ngi raq namshiq ka mitiijonglu wanha kiimaq ngi raq namshiq ka runbaiq mang. Ngi raq namshiq ka michhi jang wanha. Kiimaq namshiq ka phaibaiq mang. Ngi raq namshiq khuthaq na tiithen jen baiq wan kang kra miitu itsan ka kai bitlo.

¹¹ Namshiq ka Bebilon mung hokhamwe ma naqhai rongkiq she. Ngi ka namshiq rai asi. Krai mren apaiq ningkun jaqkhon wa ngi raq namshiq ka mitiichhii kuqha.

¹² Jamkhano ngukla, Ngi ka mangchan heawe, Ngi raq apaiq tsan na namshiq miitu tiihang wan mangchan mitiitsi kuqha. Lata apaiq ma namshiq ka maiqmii jam na tiijang wan miitu tsantsii mitiichhi kuqha. Arka Ngi, Tatiwe raq toqtan tiikang.’

^13-15 “Shatmaq namshiq ümchaü ümchuwa Juda mung na tiichong kilanti thun riika Tatiwe namshiq Shiikeawe kiqkhii ka maimak she. Kiimaq armung arjaq shong nga wan nong ka tlea maimak she. Namshiq raq, ‘Riimak, naishiq ka Ejip mung niishe mikiho hai. Laita kiijaq misiki hai. Kiijaq naishiq ma chiqdong redong min ahüshe miraq. Kiimaq kiijaq redong hünongtam trang ka tai mai she miraq. Kiimaq ram raq amang ka tsai mai she miraq,’ nguta ngoka maimak she. Namshiq raq kriila nguhan jiila, Tati Ningkun Ajongwe, Israilnok Shiikeawe raq ngutlo, ‘Shatmaq namshiq ka Ejip mung na sikai dongdii ngutiishe nguholan jiila, ahea siki rangkiq.

¹⁶ Riita kriishe nguraüla, ümchaü namshiq raq redong ma haitlan kriiraq namshiq jaika mijoho. Raüta namshiq ka ashii mirho. Kiimaq namshiq raq ramdong ma haitlan kriiraq, namshiq jai ka mijoho. Raüta namshiq ka ram raq Ejip mung niishe mijiim han.

¹⁷ Maiq ümchu riiwa Ejip mung niidea laüho ratlo nguta hongla tlanti thun ka, kiimaq kiijaq shongkai raa dongdii nguta honglatlanti thun ka redong na mitsai han. Riimakla ramdong raq mijiim han. Riimakla thadong raq mijiim han. Kra Ngi raq tsangshiq khuthaq na athen jen wan sawa tiisaü wan tiikang kra mong wa, tsangshiq phong wa maiq ka ashi ra min tiichong mak mitsai, kiimaq weshi ra dongdii min lunmak miraq.’

¹⁸ “Tati, Israilnok Shiikeawe raq ngutlo, ‘Ngi raq itsankhiq walüwa ikha hengtlaq kra Jerusalem na siti khuthaq na jamkho tlü chaq kang, namshiq ka Ejip mung na laüho han jiila, ngi raq namshiq khuthaq niimin kra mitlü chaqha. Namshiq ka maklii jai na tiijang phat phiiptsi jiiptsi mithen wan han. Maiqse raq namshiq thenjen wan kra chhi raüta slaislii thophi riiqphi mishummii wan. Kiimaq namshiq mang ka chong raüta maiqse raq manson shiiton ma mitiija wan. Namshiq ara hiqshong arka thongshi chhinong man she mirhan.’”

¹⁹ Kiijiishe ngi raq chong kang, “Tatiwe raq namshiq Juda mung na aso tiichongki lanti thun ka Ejip mung na naq laüho rongkiq nguta ngutlo. Arningkhan ümchaü ngi raq namshiq ma tsiilam bomtsi chong tiikang.

²⁰ Namshiq raq ashut pinthum thapthi tlan. Namshiq raq ngi nangnga Tatiwe, nashiq Shiikeawe jaq wa achu jaü kuqlaq nguta chong lan. Kiimaq namshiq raq ngi ma kiqkham kuqlan apaiq raq jamlai aming wa kuqtlaq kra phan phan phanrap miklo hai nguta ngulan.

²¹ Krai mren ümchaü ngi raq namshiq ma chongkang she. Shatmaq namshiq raq ümchaü ka Tatiwe nashiq Shiikeawe raq ngi lümaq namshiq ma bom tiichongtaq kra wiita she jinbaiq wan lan.

²² Kra ningkhan ümchaü sanha, ara tsan na tiitsang ronglaq: Namshiq ka redong na mijiim han; riimakla ramdong raq mijiim han; riimakla thadong raq mijiim han; namshiq ümra mung na sikai wa laüho tlan, kiijaq mijiim siq han.”