DUNGWVNC 26 - ASII LAKDAP Bible (BSI)

Tatiwe Asi Tombutiip

¹ “Asii Tombutiip, Ngi asi Tombutiip mong thun kriika müsaisai raihi-nairai ka raiwai, raishii kiimaq unirai shii maq shot raüta ataq thumjong thum roqshi kriimaq hailaq. Kiimaq kriithun ka rai maq cherubim sumla thun ka khea kiijaq waiq chhang chang.

² Kheathum loweatek ka ajong alu na mren chhaq siisaq riichang. Alu nü na mitar roqshi ri mitarnai kiimaq ajong nü na mitar roqshi ri mitarnai.

³ Laüta thum biingi ka adam na diimshi ma tiijatlii riisü riisü triiche chhanglaq. Kiimaq abi thum biingi kiimin kiikhiisii hali diimshi ma triiche chhanglaq.

⁴ Khea wai phusetiim maq awa chang kra klolaq. Laüta kriithun ka diimshi kinphai ni siim kii kiijaq kra awasetiim thun ka tiikop chhanglaq.

⁵ Laüta aphati diim kiijaq awa thun ka roq biingi tiikop chhanglaq. Kiimaq diimnai ngojati kiijaq min aphati krai tri saqsaq na awasetiim roqbiingi ka tiikop chhanglaq.

⁶ Kiimaq chaq maq khaiq ka roq biingi tiiqlaq. Kriithun maq kheathum diim wiinai ka adam na triiche chang. Raüla diimshi miilishe tiijachang.

⁷ “Kiimaq Tombutiip kra pangchang ka chhechhi bin maq ataq kheathum ka thum roqshi ri thumshi kra taqlaq.

⁸ Kriithun ka ajong niimin alu niimin mren chhaq siisaq riichang. Alu nü na mitar roqshi ri atsamtsam kiimaq ajong niimin mitar nainai siisaq riichang.

⁹ Kra thumbiingi ka adam na diimshi ma tiijatlii kok chhanglaq. Kiimaq thumtrok kriika diimshi ma tiijatlii hali kok chhanglaq. Kiimaq thumtrok ngojati ka ajam ba maq tiidap saq laüta Tombutiip khaki na kra pangbaiqsaq riichang tiihonglaq.

¹⁰ Kiimaq diimshi kii kiijaq awasetiim ka roq biingi tiikop chhanglaq. Kiimaq diimshiti kii niimin kiikhiisii hali awasetiim ka roq biingi tiikop chhanglaq.

¹¹ Kiimaq miiki khaiq setiim ka roq biingi tiiqlaq. Laüta kra khaiq setiim ka awasetiim kiimaq paq raq raq diim nai ri ka diimshi ikhli she adam na chhanglaq. Raüla apang chang diim ka diimshi ikhlishe miraq.

¹² Kiimaq kra achan arki thiq khea diim thiqko kriika Tombutiip jai nü nü siim kiijaq chanlaq.

¹³ Kiimaq kheathum diimkaü alu nü siim siim hap ri na achan sentimitar roq biingi sitlaq kriika Tombutiip siimnai ri kra pang ma miraq.

¹⁴ “Kiimaq kriithaq na wukhu pang chang ka liipshi diim nai ri hali klo nonglaq. Diimshi ka sku pongwe khü riiqshii maq alo riichang. Kiimaq diimshiti ka ngamkhü nyeadang danghea maq aklo riichang. Arka ra liipti wukhu shap ma tiihong chang.

¹⁵ “Kiimaq Tombutiip kra chan chang ka akasia-pe maq tiichaphihi ariikom haichang pe thun kra hailaq.

¹⁶ Kra ariikom haichang ashi ka alu nü na mitarblai kiimaq ajong nü na 66 sentimitar riichang.

¹⁷ Raüta ara ariikom ashi kra arong ikha siimnai ri na anok rai tiikaq saqsaq tiihong chang arong ka achhuq chhuq tiihong chang. Ariikom tlotli ka akha wrong siisaq tiihong chang.

¹⁸ Shemai nü siim miitu ariikom ka roqnai hailaq.

¹⁹ Kiimaq ariikom kham thun kra tiinga chang khamji chong bu thun ka kampho maq bu roqblai klolaq. Ariikom ashi kra tiinga miitu ka arong anai nai kra tiinga saq saq chang khamji chong bu ka anai nai hailaq.

²⁰ Tombutiip shekhu nü siim kra miitu min ariikom ka roqnai hailaq.

²¹ Kiimaq hali ariikom kra tiinga chang khamjichong bu ka kampho maq roqblai klolaq. Ariikom ashi tiinga chang ka khamjichong bu ka anai nai riichang.

²² Kiimaq Tombutiip jai nü na shenyap nü siim miitu ka ariikom trok hailaq.

²³ Kiimaq ashok thun kra miitu ka ariikom ka anai klolaq.

²⁴ Ara ashok na ariikom tiingatlaq thun kriika achongji hiq maq adam na triichüp saq saq raüta ra na akhupo na saüli tiichüp chang. Ara ashok wiinai na tiinga chang ariikom wiinai ka akhiisii klochang.

²⁵ Krai mren ariikom ka tiichat miraq. Kiimaq kampho maq ahai khamjichong bu thun roqshi ri trok miraq. Ariikom ashi miitu khamjichong bu anai nai chhaq miraq.

²⁶ “Kiimaq akasia pe maq khetuk riikom sü chang pepum ka pumroq shi ri pumbiingi tiihonglaq. Tombutiip siimko riikom miitu pum biingi chhaq chhaq hailaq.

²⁷ Kiimaq pumbiingi ka siimko nü khetuk riikom kra miitu. Kiimaq shenyap nü siim khetuk riikom miitu ka jai nü na pumbiingi.

²⁸ Kiimaq khetuk jai nü nai hiq nü na ajam ba tiithi wiiti pum thun kriika Tombutiip rin nü maq riita jamcha nü na thin li riichang.

²⁹ Kra ariikom thun ka wiita chaq maq lolaq. Kiimaq chaqwa kom setiim ka pepum thun kra akom mong na rong saq saq rechang tiihonglaq. Kra pepum thun kiimin chaq maq alo siisaq riichang.

³⁰ Laüta Tombutiip ka pum maq asiirii jamkho tiichhi kuqkang kra phan phan chanlaq.

³¹ “Kiimaq achan chang kheathum kaü ka müsaisai raihi-nairai ka raiwai, mintiitii kiimaq unirai shii maq taqlaq. Kra kheathum na cherubim sumla thun ka chhang waiqlaq.

³² Laüta kra kheathum ka akasia pe kham blai chaq maq alo kiimaq khaiqsetiim atiihongwi she chaq khamjichong bu blai thaq na tiingaje kiijaq bat hihi chan thülaq.

³³ Kra kheathum ka Tombutiip wukhu na alen alen na khaiq thun tiihongje kriijaq bat hi hi batthülaq. Kiimaq kra khetuk chang kheathum tiichan tlaq kra jai niishe Tongshong Tek, among na longpen wiinai tiithiishat kra tothülaq. Ara khetuk chang kheathum ariiraq Asii Khok kra Asii Pinthum Khok kriiwa pong na mirai baiq.

³⁴ Kiimaq Tongshong Tek ka apang chang ahap kriimaq panglaq.

³⁵ Kiimaq Asii Pinthum Khok kra kinphai na, Tombutiip ma shekhu nü siim tiinap na chamrii ka tolaq. Kiimaq shemai nü siim tiinap na lem-kham ka tolaq.

³⁶ “Kiimaq Tombutiip na nyap wa chang kilü ka kheathum ashi müsaisai raihi-nairai, raiwai, mintiitii, kiimaq unirai rongshii maq ataq kiimaq rai maq sumla atiitsom waiq chhang kra kilü ma tiihonglaq.

³⁷ Ara kheathum ara chan chang ka akasia pe maq kham biingi hailaq laüta chaq maq lolaq kiimaq chaq maq alo khaiq setiim ka kham thun kiijaq tiihonglaq. Kiimaq ara kham thun tiinga chang ka miiki maq ajichong bu biingi tiihonglaq.