DUNGWVNC 25 - ASII LAKDAP Bible (BSI)

Asii Tombutiip Miitu Honglu Akuq Thun

¹ Tatiwe raq Mosheq ma nguto,

² “Israilnok ma Ngi miitu honglu kuq ronglaq nguta chonglaq. Laüta jurwa maiqmii raq aro aro jamlai honglu wa kuqtlaq kra riichom jaülaq.

³ Kra honglu thun ka arthun ara kechang: chaq, kampho, kiimaq miiki;

⁴ müsaisai raihi-nairai; kheawai, mintiitii khea, kiimaq ashii umnirai; chhechhibin maq ataq khea;

⁵ sku pongse khü riiqshii maq atsi; nintatahea ngamkhü; akasia-pe;

⁶ lem thun na tiinyai chang tel; süse tapan, arka ram ram chang tel na shot chang kiimaq ahomwiq-homseng honglu na shot miitu;

⁷ Ramwe Ajong Pinthum rohun asii kheaphu nai akhuk na samchang kheaphu na tiikop chang Karnelian longseng nai laihin longsengpo thun.

⁸ Mungmaiqse raq Ngi miitu asii tombutiip ashi hai ratlo. Kriika Ngi tsangshiq rai sidam miitu.

⁹ Ara tiip ka hailaq. Laüta kriika Ngi raq jamkho mitiichhi kuqha kra phan phan mitiimiikhiiq haü.

Tongshong Tek

¹⁰ “Akasia pe maq tek kaü ashi hailaq. Kriika alu nü na 110 sentimitar, ajong nü na 66 sentimitar, kiimaq adii lu nü na 66 sentimitar.

¹¹ Laüta arka among thun nai akii thun wiita ka chiisan chaq maq lolaq. Kiimaq akii tro thun ka wiita chaq maq kong baiqlaq.

¹² Laüta kra pi chang chaq maq awa komtang komblai lolaq. Laüta kra awa komblai ka siimhap ri na komnai nai chhaq maq ahok blai kiijaq tiikoplaq.

¹³ Kiimaq kra pi chang ka akasia pe maq pepum hailaq. Laüta pum nai wiita trotam na chaq maq lolaq.

¹⁴ Laüta kra pum wiinai wiita tek kaü siimhap ri na awa mong kiimaq re laüta tiiwalaq.

¹⁵ Kra pum nai wiita ka awa mong kiijaq treshat li thü chang. Kiiwa ashunbaiq maimak.

¹⁶ Laütiishe Ngi raq aming thun waiqthüje longpen wiinai mikuq kang kriishe tek mong kiijaq thülaq.

¹⁷ “Kiimaq ahap chang ka chiisan chaq maq lolaq. Arka alu nü na 110 sentimitar. Kiimaq ajong nü na 66 sentimitar.

¹⁸ Kiimaq chaq tiiphin tiiq laüta cherubim kaünai klolaq.

¹⁹ Tek hap chang siimko nai ri na kaü shi shi hailaq. Kriika tek hap chang krai adam na tiikoptlii maq hai chang.

²⁰ Kra cherubim kaünai ka tek hap chang thaq na riilii riilii kha riikhok na nyi raq raq riichang. Kiimaq tsangnai rakong wiinai tiipii raq raq kra riika tek hap kra hamli pang chang.

²¹ Kiimaq longpen wiinai ka tek mong kiijaq thiilaq. Laütiishe tek hap chang kriimaq pang thülaq.

²² Ngi raq ümniirai ka kiijaq mirhum kang. Kiimaq apang chang thaq na cherubim kaünai hea wea kiimaq Ngi raq ümniima Israilnok miitu ithung tri ka wiita mikuq kang.

Shiikeawe Ma Winsii Honglu Akuq Thüchang Chamrii

²³ “Akasia pe maq chamrii ashi hailaq. Alu nü na 88 sentimitar, ajong nü na 44 sentimitar, kiimaq adii lu nü na 66 sentimitar.

²⁴ Laüta arka chiisan chaq maq lo laüta pang baiqlaq. Kiimaq akii tro ka chaq maq kong baiqlaq.

²⁵ Akii tro kong chang pen ka ajong nü na 75 milimitar hailaq. Kiimaq kra akong pen tro ka chaq maq lobaiqlaq.

²⁶ Kra pi chang awa ka chaq maq komblai lolaq. Laüta arka ahok pe blai kiijaq siimblai wiita na tiikoplaq.

²⁷ Chamrii pi chang pepum rechang awa komblai kriika chamrii kii tiinap na tiikop chang.

²⁸ Kra pepum wiinai ka akasia pe maq hailaq. Laüta kra wiinai ka chaq maq trotam na lolaq.

²⁹ Kiimaq winpin thun, kok thun, tsabum thun, kiimaq spiqtai-honglu thun kra thii chang nüchhong win pin thun kra tiiqlaq. Arthun hupsam arka chiisan chaq maq siisaq lochang.

³⁰ Raüta chamrii ka Tongshong Tek khaki na tochang. Kiimaq chamrii niika wranaiq tek Ngi ma honglu akuq asii winsii kra siruq sichang.

Lem-khamchong

³¹ “Lem-khamchong ashi ka chiisan chaq maq lolaq. Kra achap chang ajichong nai kham kriika chaq maq tiiqlaq. Kra tiitsom rom chang pepü thun, pepü ka püphaho dong ninsetiim thun kra kiimaq pepü jaqsetiim kra wiita ka achong ashi kiiwiili riichang.

³² Kra achong kiiwa siimhap ri na aküsetiim ka kütrok riichang. Siimhap ri na kiitsam tsam chhaq sii riichang.

³³ Kra kütrok wiita ka akütek na atsam tsam chhaq sii, atsomwiq Almon pepü püphaho setiim among na ajaq maq tiithop raqraq kiimaq pepü jaqsetiim asi püliitlaq ikha riichang.

³⁴ Kra lem khamchong kiijaq Almon pepü atsomwiq apüphaho ajaq min asi kiimaq pepü jaqsetiim asi ikha pepü ka blai asi riichang.

³⁵ Kra akü siimhap ri na atsam tsam kiijiika akü phiiq wan chang ba na apü pha wan chang ajaq kriimin nong nong asi riichang.

³⁶ Kra apü phawan dongnin sitlaq kra, akü thun kra, kiimaq lem-khamchong ka chiisan chaq panshi wiili atiiq riichang.

³⁷ Lem-khamchong kiijaq thü chang lemsetiim ka miishi klolaq. Laüta lem thun ka rin nü na aheawiq liliim chang miitu atochang na tiihong thütaq.

³⁸ Kra lemsetiim tiinyai chang kiipsetiim kiimaq kra thüchang trei winpin thun ka chiisan chaq maq lolaq.

³⁹ Ara lem-khamchong nai amii akhiiq thun kra klo miitu ka chiisan chaq kilogram roqtsam ri biingi maq lolaq.

⁴⁰ Arka ngi raq ümniima pum maq sumla tiichhikuq kang kra phan phan riikhaq li tiiqlaq.