DUNGWVNC 19 - ASII LAKDAP Bible (BSI)

Israilnok Ka Sinai Pum Na Saüto

^1-2 Israilnok ka Rephidim wang wa tiido wanto. Raüta tsangshiq ka Ejip mung wa laü wan li maq jipi lütsam she angu na jiha ranaiqshi ranaiq na tsangshiq ka Sinai kumtsaiphii wang niishe saüto. Raüta kiijaq Sinai Pumji na tsangshiq piitiip ka teito.

³ Kiimaq Mosheq ka Shiikeawe rai riihumwa pumkhu thaq na wa wanto. Tatiwe raq pum maq apaiq ka heato. Kiimaq apaiq ma Jakob saüse phan Israilnok ma akha chongkuqlaq nguta chongto:

⁴ “Ngi, Tatiwe raq Ejip mungti ka jamkho riikang kra chhilan she. Kiimaq Ngi raq namshiq ka liiha kaü raq ase ka arakong thaq na tiinga raüta jamkho boq wantlaq ikha namshiq ka arjaq Ngi phaniishe sheawan kang.

⁵ Riita ümchaü min, namshiq raq ibom ara tai lanta itongshong wokhong na sihan jiila, namshiq ka isenginok shaq ma mijahan. Mangjong hiq tlotli ka Ngi rii dongdii. Shatmaq namshiq ka Ngi raq tingsang atsea arwanha isenginok ma mijahan.

⁶ Ngi miituli dongdii akiinongkuq wan maiqphan ashi mirhan. Kiimaq namshiq ka iramwenok ma jalanta Ngi mishkumpan han.”

⁷ Krai mren Mosheq ka pum maq satkito. Raüta mungmaiqse welabi thun ka adam na triitam heato. Raüta tsangshiq ma Tatiwe raq apaiq ma aming kuqtaq thun kra wiita chongkuqto.

⁸ Kiijiishe mungmaiqse kunli raq adam na apaiq bom ka akha treto, “Tatiwe raq bom chongtaq thun ka naishiq raq wiita milanghai,” kiimaq Mosheq raq ara bom ka Tatiwe ma tiitaito.

⁹ Tatiwe raq Mosheq ma nguto, “Ngi ka ümnaq pha na phumda theapak pak mong na mikiha. Krai mren mungmaiqse raq Ngi ka ümniirai riibom ka mitai. Raüta tsangshiq raq ümchaü armiiphat she ümniima mikam wan.” Kiimaq Mosheq raq Tatiwe ma mungmaiqse raq apaiq bom tretaq kra chongto.

¹⁰ Kiimaq Tatiwe raq apaiq ka thaüto, “Ümniika mungmaiqse phana kilaq. Laüta tsangshiq ma ümchaü ranaiq nai anap ranaiq ka tsangshiq raq maiqmii khum ka Ngi shomnoq miitu mitiisiilaq. Tsangshiq raq tsangshiq khu akhea thun kra aheawiq hea ratlo.

¹¹ Raüta shinap ranaiq miitu tiijeshat misilaq. Kra ranaiq Ngi ka Sinai Pum na misat kiha. Kiijaq mungmaiqse tlotli raq Ngi ka michhi.

¹² Pumji tro na hiq ka arai laüta thübaiqlaq. Kra hiqrai ka mungmaiqse raq jin wa maimak. Kiimaq tsangshiq ka pum kiina düwa maimak nguta chonglaq. Kiimaq kra pumji tho kiijiimin aje niika khumwa maimak. Maiq ashi ra raq kiijaq ji maq niwa raüla, kriiwe ka tiitsailaq atsea baiq ratlo.

¹³ Apaiq ka long maq tiiqbaiq chang. Riimakla liq maq hiipbaiq chang. Apaiq dü niika jurmin jaq maq shamkai maimak. Arka maiqse nai nyamse miitu tri ka adamli. Kriiti ka atsea baiq chang dongdii. Shatmaq ümtiikiiwa lerong ka tsüjiiq, raüla mungmaiqse ka kra pum kiina düwa chang.”

¹⁴ Kiijiishe Mosheq ka pum wa satkito. Kiimaq mungmaiqse ma noqku miitu tiijeshat ronglaq nguta chongto. Krai mren tsangshiq raq tsangshiq khu akhea thun ka kham maq heto.

¹⁵ Kiimaq Mosheq raq tsangshiq ma chongto, “Shinap ranaiq miitu tiijeshat ronglaq. Kiimaq namshiq ka jechakre rai adam hainga raamak.”

¹⁶ Ranaiqtsam ngoja ranap na ramoktrang nai rachhaiwa trang she riiwanto. Kiimaq pum ka phumda theapak pak raq pang wanto. Kiimaq nüchhong lerongtsü ka henghea lang taito. Piitiip na siti mungmaiqse kunli ka akü anyii tiikhaito.

¹⁷ Mosheq raq tsangshiq ka piitiip wa chiiphai na Shiikeawe rai riihumkai sheahoto. Raüta tsangshiq ka pumji chong na chapto.

¹⁸ Kra Sinai Pumkaü ka wiita hamli wakhuk raq pang wanto. Jamkhano ngukla Tatiwe ka kiijaq watu mong maq satkito. Kra wakhuk wa trang ka watum mong wa khuktlaq ikha ra na mong wanto. Kiimaq maiq kunli pinthum atiikhai rokrok haito.

¹⁹ Kiimaq nüchhong lerong tsü ka henghea riiwan wan hengto. Kiimaq Mosheq ka bomto. Kiimaq Shiikeawe raq apaiq bom ka ramok trang maq treto.

²⁰ Tatiwe ka Sinai Pum khupo na satkito. Kiimaq Mosheq ka pum khu thaq na heato. Mosheq ka kiina wawanto.

²¹ Kiimaq Tatiwe raq apaiq ma nguto, “Kilaq satkikiq. Laüta mungmaiqse ma honlam bom chong kuq kikiq. Tsangshiq raq hiqrai ka jin mai mak kiimaq tsangshiq ka isham liiwa min maimak. Tsangshiq kra manhii raüla, tsangshiq phong wa maiq pahea mitsai.

²² Kiimaq ramwebi Ngi tho na watlaqti kiimin tsangshiq khum ka atiisiihe ratlo. Riimakla Ngi raq tsangshiq ma mo mitiihoha.”

²³ Mosheq raq Tatiwe ma nguto, “Mungmaiqse ka ana walot mak. Jamkhano ngukla ümniiraq naishiq ma ara pum arka asii nguta chonglaü kiimaq ara tro na hiq ka arai riilaq nguta aming kuqlaü.”

²⁴ Tatiwe raq treto, “Ümniika satkikiq. Laüta Aron ka ümniirai ana sheakikiq. Shatmaq ramwebi nai mungmaiqse ka hiqtrai ka jin raüta ana Ngi phana wa maimak. Riimakla Ngi raq tsangshiq ma mo mitiihoha.”

²⁵ Krai mren Mosheq ka mungmaiqse phana satkito. Raüta Tatiwe raq jamlai bom wa chongtaq kra tsangshiq ma chongkuqto.