DUNGWVNC 18 - ASII LAKDAP Bible (BSI)

Jethro Ka Mosheq Rai Riihumkito

¹ Midia mungti ramwe Mosheq huchhi Jethro raq Mosheq raq Israilnok ka Ejip mung wa tsuq wantaq akhing na Shiikeawe raq apaiq miitu nai Israilnok miitu jaqsham kuqtaq thun kra tsütsa ka kunli tai wanto.

² Krai mren apaiq ka Mosheq phana kito ajamti nyung Jippora apaiq raq jai na abaiqthü kra shea raüta.

³ Kiimaq asenai wenai Gershom nai Eliejar kiimin sheahoto. (Mosheq raq nguto, “Ngi ka pongmung na wanwe sikang.” Kra ningkhan apaiq raq ase weshi ka Gershom nguta mangto.

⁴ Kiimaq apaiq raq armin nguto, “Iwe Shiikeawe raq ngi ka khrum kuqto. Kiimaq Ejip mung hokhamwe raq ngi ka atsea baiq chang wa tiichhii kuqto.” Kra ningkhan, apaiq raq ase weshi ka Eliejar nguta mangto.)

⁵ Jethro ka Mosheq jamti nyung kiimaq asenai wenai kra sheaho raüta kumtsaiphii wang na Mosheq raq asii pum ji na piitiip tei tlaq kiijaq kito.

⁶ Apaiq raq Mosheq ma tsangshiq ka kitiikai lii nguta bom ka tiichongholito.

⁷ Krai mren Mosheq ka apaiq rai riihumkai kito. Raüta apaiq miki na hiq na bumtlii maq shrengto. Kiimaq apaiq theaphi na atao wan shupto. Tsangshiq liipan na ahea khata nguta weshi raq weshi ma riihum bomtsi riiwaito. Raütiishe Mosheq tombutiip mong na wawanto.

⁸ Mosheq raq Jethro ma Tatiwe raq Israilnok kra tiichhii wan miitu hokhamwe nai Ejip mungti khuthaq ümtinkhan wa jaqshamtaq kra wiita chongto. Kiimaq apaiq raq ahuchhiwe ma mungmaiqse raq alaü wan lam maq ümtinkhan wa chamchao riihum wantaq kriimin chongto. Kiimaq Tatiwe raq tsangshiq ka jamkho tiichhii kuqtaq kra chongto.

⁹ Riita Jethro raq arthun tsütsa ka tai raüta apaiq ka kai khoqriiqto.

¹⁰ Kiimaq akha nguto, “Tatiwe li tiitsam i, apaiq raq ümniika hokhamwe jaq wa nai Ejip mungti jaq wa tiichhiito! Tatiwe li tiitsam i, jurwa asenginok ka dikong wa tiichhii wantaq!

¹¹ Ümchaü ngi raq sapkang Tatiwe ka tarü phra kong thaq na ajong. Jamkhano ngukla Ejip mungti raq Israilnok ka atinkhan hok maq nishishi haihü wan kiita, apaiq raq tsangshiq ka tiichhii kuqto.”

¹² Kiijiishe Jethro raq Shiikeawe ma wiipumtam- chaqtlii kechang thun kra nai laihin honglu kechang thun kriishe lan wanto. Kiimaq Aron nai Israilnok welabi kiimin tlotli apaiq raishe asii honglu ngam kra phaqsea wadam, kiimaq noqku lomdam apaiq rai wawan damto.

Phowebi Shongto

¹³ Kriimaq napjai ranaiq na Mosheq ka mungmaiqse liipan wa khü akha thun kra phoke ngong thun ngato. Apaiq ka kha phoke ranap chu maq riita ratiiwali mosiqto.

¹⁴ Jethro raq Mosheq ka phanrap phanrii apaiq raq siisaq shamrea kra chhito. Raüta apaiq raq waito, “Riita arthun ara ümniiraq mungmaiqse ma jamlai wa riiholaü? Atinkhan jaqsham arka ümnaq laqlaqse li ka jamkho sham tlaü? Mungmaiqse ka arjaq ranap chu maq riita raji ra tiinyaqli ümniirai bom riiwaiso thungtii tlaq?”

¹⁵ Kiijiishe Mosheq raq treto, “Ngi raq ara shamke raa jakito, jamkhano ngukla mungmaiqse ka Shiikeawe raq thapthitlaq kra sap miitu ngi rai riiwaiwa watlo.

¹⁶ Maiq wenai liipan na tatso raüla, tsangnai ka ngi phana watlo. Kiimaq ngi raq juwa ajiq juwa alam kha kra phokuq tiikang. Kiimaq ngi raq tsangshiq ma Shiikeawe aming thun nai thung tri thun kra chongkuq tiikang.”

¹⁷ Kiijiishe Jethro raq nguto, “Ümniiraq klotlaü arka riikhaq li riimak.

¹⁸ Ümniika anü raili mirhaü. Kiimaq ara mungmaiqse armin aniiraili miraq. Arka ümnaq laqlaqse riili shammiika holai jonghea.

¹⁹ Ümchaü ngi raq ümniima lamlu ahea miitu tsii chongkuqpha. Kiimaq Shiikeawe ka ümniirai rai miraq. Ümniiraq mungmaiqse miitu Shiikeawe manna chaptlaü kriika riikhaqli. Laüta tsangshiq kha ka Shiikeawe ma kiinongtlaü.

²⁰ Ümniiriika tsangshiq ma Shiikeawe aming thun kra shrinke chang. Laüta kra aming thun ka tsangshiq raq jamkha laü wan chang wa kra chongkuqlaq. Raüta tsangshiq raq jamlai jaq sham chang wa kra chongkuqlaq.

²¹ Shatmaq kriithaq niimin, ümniiraq maiq asap atsintibi kra tsea laüta mungmaiqse khuthaq na welabi ma shonglaq: welabi ka maiq ahing thun pengtibi, ashi thun pengtibi, roqbiingi thun pengtibi, kiimaq aroq thun kra pengtibi kra shonglaq. Tsangshiq thun ka Shiikeawe ma haisong tsantsii rümtibi kiimaq maiq kamsea chang kiimaq tsiiqlap simakti riichang.

²² Tsangshiq ka rilung pattup mung khuthaq phowebi jaq sham chang. Tsangshiq riitiq kha tsinhea heati kriili ümniima mishokwa. Shatmaq khü akha aran setiim thun kriika tsangshiq raq phoke chang. Kra riihaüla holai ka ümniima achii miraq. Jamkhano ngukla holai ka tsangshiq riishe riishaho damtlo.

²³ Ümniiraq akha klo haüla, Shiikeawe raq aming kuqtlaq kra phan phan, ümniika atinkhan ka hun nü rai maü mirhaü. Kiimaq ara mungmaiqse thun kiimin maiqmii khü akha thun kra riipholot raütiishe maiqmii jam na miwa wan.”

²⁴ Kiimaq Mosheq raq Jethro tsii chong ka langto.

²⁵ Raüta Israilnok tlotli liipan wa maiq asap atsintibi thun ka tseato. Raüta apaiq raq tsangshiq ka welabi ma ahing thun thaq na, ashi thun thaq na, roqbiingi thun thaq na, kiimaq aroq thun thaq na apengti thun ma shongto.

²⁶ Tsangshiq ka mungmaiqse khuthaq na rilung pattup phowebi jaq shamto. Raüta kha atsin tsin kriili Mosheq ma shokto. Shatmaq kha aran thun ka tsangshiq riili phokuqtlo.

²⁷ Kra lot jai she Mosheq raq ahuchhiwe Jethro ma “waliijo” nguta kiimriiphea bomto. Kiimaq Jethro ka ajam na jang wanto.