Nehemia 9 - Bibl Koad 21: Ar Bibl e Brezhoneg evit ar Vretoned

Pennad 9

¹ D'ar pevare deiz warn-ugent eus an hevelep miz, mibien Israel en em zastumas evit yunañ, gwisket gant seier ha goloet gant poultr.

² Ha re eus gouenn Israel, o vezañ en em zispartiet diouzh an holl ziavaezidi, en em zalc'has hag a anzavas o fec'hedoù ha direizhder o zadoù.

³ Sevel a rejont en o lec'h, hag e voe lennet e levr lezenn an AOTROU o Doue e-pad ur c'hard eus an deiz. E-pad ur c'hard all ec'h anzavjont hag ec'h azeuljont an AOTROU o Doue.

⁴ Jezua, Bani, Kadmiel, Shebania, Bunni, Sherebia, Bani ha Kenani a bignas war savenn al Levited, hag a grias a vouezh uhel d'an AOTROU o Doue.

⁵ Hag al Levited Jezua, Kadmiel, Bani, Hashabnia, Sherebia, Hodija, Shebania ha Petakja a lavaras: Savit, bennigit an AOTROU ho Toue a holl viskoazh da holl viken! Ra vo benniget da anv glorius, a zo savet uheloc'h eget pep bennozh ha pep meuleudi!

⁶ Te hepken eo an AOTROU! Graet ec'h eus an neñvoù, neñv an neñvoù hag o holl arme, an douar ha kement a zo warnañ, ar morioù ha kement a zo enno. Reiñ a rez buhez d'an holl draoù-se, hag arme an neñvoù a stou dirazout.

⁷ Te eo an AOTROU Doue, dibabet ec'h eus Abram, hag e lakaet da vont kuit eus Ur ar Galdeiz, ha roet dezhañ anv Abraham.

⁸ Kavet ec'h eus e galon feal dirazout ha graet ec'h eus gantañ un emglev, evit reiñ d'e lignez bro ar Gananeiz, an Hitited, an Amoreaned, ar Ferezianed, ar Jebuziz hag ar C'hirgazianed. Sevenet ec'h eus da gomz, rak reizh ez out.

⁹ Gwelet ec'h eus glac'har hon tadoù en Ejipt, ha klevet o garmoù e-kichen ar Mor Ruz.

¹⁰ Graet ec'h eus burzhudoù ha mirakloù a-enep Faraon, a-enep e holl servijerien, a-enep holl bobl e vro, rak gouzout a raes o doa en em renet gant lorc'h e-keñver anezho, hag ec'h eus graet dit-te da-unan un anv a chom betek hiziv.

¹¹ Faoutet ec'h eus ar mor dirazo, hag ez int tremenet e-kreiz ar mor war ar sec'h. Taolet ec'h eus en donder ar re a rede war o lerc'h, evel ur maen en doureier meur.

¹² O renet ec'h eus war an deiz dre ur golonenn a goabrenn, hag en noz dre ur ar golonenn a dan, evit sklêrijennañ an hent a dleent kerzhout warnañ.

¹³ Diskennet ec'h eus war Venez Sinai, ha komzet outo eus an neñv, ha roet dezho barnedigezhioù reizh, lezennoù gwir, reolennoù ha gourc'hemennoù mat.

¹⁴ Desket ec'h eus dezho da sabad santel, ha kemennet gourc'hemennoù, reolennoù hag al lezenn dre Voizez da servijer.

¹⁵ Roet ec'h deus dezho bara eus an neñvoù evit o naon, graet ec'h eus dont er-maez eus ar roc'h dour evit o sec'hed, ha lavaret ec'h eus dezho mont da berc'hennañ ar vro az poa savet da zorn reiñ dezho.

¹⁶ Met int, hon tadoù, a zo bet lorc'hus gant o gouzoug reut, ha n'o deus ket selaouet da c'hourc'hemennoù.

¹⁷ N'eo ket fellet dezho sentiñ ha n'o deus ket bet soñj eus ar burzhudoù az poa graet en o c'heñver. Met e reudjont o gouzoug, hag en o disentidigezh, e tibabjont ur penn evit distreiñ d'ar sklavelezh. Met te a zo un Doue a bardon, trugarezus ha truezus, gorrek da gounnariñ ha fonnus e madelezh, ha ne'c'h eus ket o dilezet.

¹⁸ Zoken pa rejont ul leue teuzet ha pa lavarjont: Setu da zoue en deus da lakaet da bignat eus an Ejipt, pa rejont dismegañsoù bras dit,

¹⁹ te, hervez da drugarez vras, ne'c'h eus ket o dilezet er gouelec'h. Ar golonenn a goabrenn ne baouezas ket da vezañ dreisto war an deiz evit o ren dre an hent, hag ar golonenn a dan en noz evit sklêrijennañ an hent a dleent kerzhout warnañ.

²⁰ Roet ec'h eus dezho da Spered mat evit m'o defe poell enno, ne'c'h eus ket lamet ar mann eus o genoù, ha roet ec'h eus dezho dour evit o sec'hed.

²¹ E-pad daou-ugent vloaz ec'h eus pourvezet d'o ezhommoù er gouelec'h, hep ma vankfe netra dezho, o dilhadoù n'ejont ket da fall, o zreid ne goeñvjont ket.

²² Roet ec'h eus dezho rouantelezhioù ha pobloù, ac'h eus lodennet dezho dre gornadoù. Hag e perc'hennjont bro Sihon, bro roue Hesbon, bro Og roue Basan.

²³ Kresket ec'h eus o mibien evel stered an neñvoù, hag o c'haset d'ar vro az poa lavaret d'o zadoù ez ajent enni d'he ferc'hennañ.

²⁴ O mibien a zeuas e-barzh hag a berc'hennas ar vro, izelaet ec'h eus dirazo ar Gananeiz, annezidi ar vro, hag o lakaet ec'h eus etre o daouarn, gant o rouaned ha pobloù ar vro, evit ma rafent dezho hervez o c'hoant.

²⁵ Hag e kemerjont kêrioù kreñv ha douaroù druz, hag e perc'hennjont tiez leun a bep seurt madoù, puñsoù toullet, gwini, olived ha gwez-frouezh e-leizh, hag e tebrjont hag o doe o gwalc'h, deuet int lart hag e vevjont er plijadurioù dre da vadelezh vras.

²⁶ Met e voent disentus hag en em savjont a-enep dit, hag e taoljont da lezenn a-dreñv o c'hein. Lazhañ a rejont da brofeded a zouge anezho da zistreiñ ouzhit, hag e rejont dismegañsoù bras dit.

²⁷ Neuze ec'h eus o lakaet etre daouarn o enebourien o deus gwasket anezho. En amzer o enkrez e klemmjont war-zu ennout, hag eus an neñvoù ec'h eus o c'hlevet, ha te, hervez da drugarez vras, ec'h eus roet dezho dieuberien o deus o saveteet diouzh daouarn o enebourien.

²⁸ Met kerkent ha m'o doe diskuizh, e tistroent d'ober fall dirazout, ha neuze o zilezes etre daouarn o enebourien a vestronie anezho. Hag adarre e klemmjent war-zu ennout, hag o c'hleves eus an neñvoù, hag evel-se, hervez da drugarez vras, ec'h eus o dieubet meur a wech.

²⁹ O douget ec'h eus da zont en-dro da'z lezenn, met kendalc'het o deus el lorc’hentez, hep selaou da c'hourc'hemennoù, ha pec'het o deus a-enep da varnedigezhioù, a laka da vevañ an hini a ra diouto. Tennet o deus ur skoaz a-dreñv, reudet o gouzoug, ha n'o deus ket selaouet.

³⁰ O gortozet ec'h eus pell, e-pad bloavezhioù niverus, hag ec'h eus o douget da cheñch dre da Spered ha dre da brofeded, met n'o deus ket o selaouet, hag ec'h eus o lakaet etre daouarn pobloù ar broadoù.

³¹ Koulskoude, hervez da drugarez vras, ne'c'h eus ket o c'haset da netra, ha ne'c'h eus ket o dilezet, rak te a zo un Doue trugarezus ha truezus.

³² Ha bremañ, hon Doue bras, galloudek ha spontus, a vir an emglev hag an drugarez, na sell ket evel nebeut a dra ouzh an holl drubuilhoù o deus hon tapet, ni, hor rouaned, hor pennoù, hon aberzhourien, hor profeded, hon tadoù ha da holl bobl, adalek amzer rouaned an Asiria betek hiziv.

³³ Bet out reizh e kement a zo erruet ganeomp, rak graet ec'h eus hervez ar wirionez, ha ni hon eus graet hervez ar fallentez.

³⁴ Hor rouaned, hor pennoù, hon aberzhourien hag hon tadoù n'o deus ket graet hervez da lezenn, ha n'o deus ket sentet ouzh da c'hourc'hemennoù, nag ouzh da destenioù a zouges a-enep dezho.

³⁵ N'o deus ket da servijet e-pad o rouantelezh hag e-kreiz ar madoù bras az poa roet dezho, er vro frank ha druz az poa lakaet en o dalc'h, ha n'int ket distroet diouzh o oberoù fall.

³⁶ Setu, hiziv ez omp sklaved er vro az poa roet d'hon tadoù evit debriñ he frouezh hag he madoù. Ha setu ez omp sklaved enni.

³⁷ Hag e ro gant fonnder d'ar rouaned ac'h eus lakaet warnomp en abeg d'hor pec'hedoù. Mestroniañ a reont hor c'horfoù hag hol loened, evel ma plij dezho, en doare ma'z omp en un enkrez bras.

³⁸ En abeg da gement-se hon eus lakaet dre skrid un engouestl start, hag hor pennoù, hol Levited hag hon aberzhourien a laka o siell.