Jozue 3 - Bibl Koad 21: Ar Bibl e Brezhoneg evit ar Vretoned

Pennad 3 Ar bobl a dremen ar Jordan

¹ Jozue a savas beure-mat, a yeas kuit eus Sitim hag a zeuas betek ar Jordan, gant holl vibien Israel. Hag e tremenjont eno an noz a-raok treuziñ.

² A-benn tri deiz e tremenas an ofiserien e-barzh ar c'hamp,

³ hag e rojont urzhioù d'ar bobl o lavarout: Pa welot arc'h emglev an AOTROU ho Toue hag an aberzhourien, al Levited, o tougen anezhi, ez eot kuit eus ho lec'hioù hag e kerzhot war he lerc'h.

⁴ Met bez' e vo un hedad, etre hi ha c'hwi, eus war-dro daou vil ilinad, evit na dostaiot ket outi. Evel-se e oueziot dre beseurt hent e vo ret deoc'h mont, rak n'hoc'h eus ket tremenet diagent dre an hent-mañ.

⁵ Jozue a lavaras d'ar bobl: En em santelait, rak warc'hoazh an AOTROU a raio en ho touez traoù burzhudus.

⁶ Jozue a gomzas d'an aberzhourien o lavarout: Dougit arc'h an emglev ha tremenit a-raok ar bobl. Neuze e tougjont arc'h an emglev hag e kerzhjont dirak ar bobl.

⁷ An AOTROU a lavaras da Jozue: Hiziv e krogin da sevel ac'hanout dirak daoulagad Israel, evit ma ouezint penaos, evel ma'z on bet gant Moizez, e vin ganit.

⁸ Ro urzhioù d'an aberzhourien a zoug arc'h an emglev o lavarout: Pa viot erruet e-kichen doureier ar Jordan, e chomot a-sav er Jordan.

⁹ Jozue a lavaras da vibien Israel: Tostait amañ ha selaouit komzoù an AOTROU ho Toue.

¹⁰ Jozue a lavaras: Dre gement-mañ e oueziot penaos emañ an Doue bev en ho touez, ha penaos e kaso kuit a-zirazoc'h ar Gananeiz, an Hitited, an Hevianed, ar Ferezianed, ar C'hirgazianed, an Amoreaned hag ar Jebuziz,

¹¹ setu, arc'h emglev Aotrou an douar holl a ya da dremen a-raok deoc'h ar Jordan.

¹² Bremañ kemerit daouzek den eus meuriadoù Israel, un den eus pep meuriad,

¹³ ha kerkent ha m'o devo lakaet sol o zreid an aberzhourien a zoug arc'h emglev an AOTROU , Aotrou an douar holl, e doureier ar Jordan, doureier ar Jordan a vo rannet, an doureier a ziskenn eus krec'h a chomo a-sav en ur bern.

¹⁴ Ar bobl a yeas er-maez eus he zeltennoù evit tremen ar Jordan, hag an aberzhourien a zouge arc'h an emglev a gerzhe a-raok ar bobl.

¹⁵ Kerkent ha ma en em gavas ar re a zouge an arc'h er Jordan, ha ma voe glebiet treid an aberzhourien a zouge an arc'h e bord an dour, hag ar Jordan a fenn dreist e ribloù e-pad holl amzer an eost,

¹⁶ an doureier a ziskenne eus krec'h a chomas a-sav, en ur bern, pell bras, tost da gêr Adam a zo eus tu Zartan, hag a re a ziskenne war-zu mor ar blaenenn, Mor an Holen, a voe troc'het holl. Hag ar bobl a dremenas a-dal da Jeriko.

¹⁷ An aberzhourien a zouge arc'h emglev an AOTROU a chomas start, a-sav, war ar sec'h e-kreiz ar Jordan, e-pad ma tremenas holl Israel war ar sec'h, ken n'o doe an holl bobl echuet tremen ar Jordan.